Antartica

continente

Antartica es la plu sude de la continentes, e conteni la polo sude. Lo es un deserto artica e cuasi tota de sua surfas es covreda par neva e jelo tra la anio intera. On ave poca plantas e animales ala, ma la mares sirca Antartica ave multe spesies de ambos, incluinte pinguines, focas, e balenas.

Antartica
Antartica de "Blue Marble" de NASA

Lo es situada en la rejion antartica de la Emisfera Sude, cuasi intera a sude de la Sirculo Antartica, e es ensircada par la Mar Sude. A 14 000 000 cilometres cuadrida, lo es la continente sinco de la plu grandes. Lo ave cuasi la duple de la grandia de Australia. Sirca 98% de Antartica es covreda par jelo con spesia promedia de 1,9 cilometres, cual estende asta partes de la Penisola Antartica, estra la plu nordes.

Per promedia, Antartica es la continente la plu fria, seca e ventosa, e ave la altia promedia la plu grande de tota la continents. Antartica es un deserto, con presipita anial de sola 200 milimetres longo la costa e multe min a la interna. La temperatur en Antartica ia ateni −89,2 °C, an si la promedia per la cuatri tre (la parte la plu fria de la anio) es −63 °C. Entre 1000 e 5000 persones abita tra la anio a la stasiones de rexerca sperdeda tra la continente. Organismes nativa de Antartica inclui multe tipos de alges, baterias, fungos, plantas, protistas, e alga animales, como acaros, nematodos, pinguines, focas e tardigrados. Plantas, do los apare, es tundral.

An si mitos e divinas sur un tera sude es ja trovada en la eda antica, Antartica es notada como la rejion final sur la Tera cual umanas ia descovre e coloni en istoria rejistrada. Lo ia es prima videda en 1820 par la mision rusce de Fabian Gottlieb von Bellingshausen e Mikhail Lazarev sur Vostok e Mirny, ci ia vide la plano de jelo Fimbul. An tal, la continente ia resta jeneral iniorada tra la resta de la sentenio 19 par causa de sua ambiente enemin, sua manca de recursos fasil asedable, e sua isoli. La atera prima confirmada ia es fada en 1895 par un ecipo de norsces.

Antartica es par fato un poseseda comun, governada par partisipores consultante de la Sistem de Trata de Antartica. Des-du paises ia suscrive la Trata en 1959, e 38 ia suscrive lo a pos. La trata proibi ativia militar e mina per minerales, proibi esplodes nucleal e la desprende de dejetadas nucleal, suporta rexerca siensal, e proteje la ecozona de la continente. Esperimentas continuante es fada par plu ca 4000 siensistes de multe nasiones.


La Tera model
Continentes: Africa | America Norde | America Sude | Antartica | Asia | Australia | Europa
Otra areas de tera: Desertos | Isolas | Montes | Rejiones de Tera
Mares: Mar Artica | Mar Atlantica | Mar Pasifica | Mar Indian | Mar Antartica
Otra areas de acua: Lagos | Rios | Mares, golfos, e stretas
Popla: Nasiones | Sites | Linguas