Pinguin

Pinguines (ordina Sphenisciformes, familia Spheniscidae) es un grupo de avias de mar sin la capas de vola. Lo abita cuasi intera en la emisfera sude, con sola un spesies - la pinguin de la Galapagos - trovada norde de la ecuator. Pinguines es multe evoluida per vive en la acua. Los ave plumas oscur e blanca, e aletas, en loca de alas, per nada. La plu de pinguines ia come cril, pex, calamar, e otra formas de vive de mar, cual los catura en cuando nada su mar. Los spende sirca dui de sua vives sur tera, e la otra dui en la mar.

La spesie de Pinguin vivente la plu grande es la pinguin imperor (Aptenodytes forsteri): promedia, adultes es sirca 1.1 m en altia e 35 kg en pesa. La pinguin la plu peti es la pinguin blu (Eudyptula minor), acc la pinguin fe, cual es sirca 33 cm en altia e 1 kg en pesa. La pinguines grande tende abita la rejiones plu fria, en cuando la pinguines plu peti tende prefere climas plu modera o an sutropical. Alga spesies preistorial ia ateni grandias enorme, tan altia o pesosa como un umana adulte. Estas no ia es restrinjeda a la rejiones antartica; en loca, la rejiones suantartica ia ave un diversia grande, e a min un pinguin jigante ia abita un rejion alga 2000 km sude de la ecuator, 35 milion anios a ante, serta alga plu calda ca aora.

La pinguines orijinal ia vive sirca la tempo de la aveni de estingui de la cretasica-paleosene en la area jeneral de Zeland Nova sude e la Tera de Byrd de Antartica. Ante plu cambias de tetonica, esta areas ia es a la tempo min ca 1500 km aparte, e no la 4000 km de oji. La asendente la plu resente de la pinguines pote es datida a la borda campanian-maastrictian, sirca 70 a 68 milion anios a ante.

La fosil de un pinguin la plu vea es la Waimanu manneringi, cual vive en la epoca paleosene temprana de Zeland Nova, o sirca 62 milion anios a ante. An si los ia es no tan bon ajustada a vive en acua como pinguines moderna, Waimanus ia es avias alga simil a gavias ma ja nonvolante, con alas corta per tufa profonda. Los nada a la surfas usante xef sua pedes, ma la alas ia es ja ajustada per move su acua, en contrasta con la plu de otra avias tufante.

Pinguines jeneral reprodui en colonias grande, estra la pinguines de oios jala, e la pinguines fiordland. Esta colonias pote varia en grandia de tan poca como 100 duples per la pinguines gentoo, a alga 100 mil en la caso de pinguines re, macaroni, e chinstrap. Abitante en colonias resulta en un grado alta de interata sosial entre la avias, cual ia resulta en repertorios grande de mostras vidal e vosal en tota spesies. Mostras agresiva es xef de los intendeda per xasa a via, o per pasi e evita desacorda con, otra individuas.

Pinguines forma duples monogama per un saison de reprodui, ma la frecuentia de rejunta varia multe. La plu pinguines pone du ovos a un ves; la du spesie la plu grande - la pinguines imperor e re, pone sola un. Con la eseta de la pinguin imperor, de cual la mas fa tota debes solitar, tota pinguines comparti la debes de incuba. Esta turnos a incuba pote dura dias e an semanas en cuando un membro de la duple come a mar.

Un imperor sortinte de la acua
Pinguin adele, nuri sua enfante
Pinguin de magellan
Brincador de roca, a la Isolas Falkland
Pinguin peti
Pinguin crestida
Pinguin gentoo
Pinguin imperor