Verlan

Verlan es un jergo de la jovenes en la lingua franses, distinguida par la inversa de silabas en un parola, fundida sur un tradision vea en franses. La nom "verlan", per esemplo, es derivada de "l'envers" (la inversa), e "céfran" es derivada de "français".

La rapor Booba; verlan es comun usada en rap franses

Jeneral, la silabas reteni la pronunsia de la silabas orijinal. Parolas cual fini con un consonante o un "e" muda jeneral reteni un vocal (tipal "eu") pos la consonante, e cade la vocal orijinal final: "femme" deveni "meuf", per esemplo. Otra regulas es aplicada per parolas de un silaba e los con tre silabas o plu. Per esemplo, "cigarette" pote deveni "garetsi" o "retsiga"

Alga parolas verlan, como "meuf", ia deveni tan comun ce los es adotada en la disionarios franses. E algas es tan comun ce los nesesa un inversa du: "meuf" deveni "feumeu", e "beur", derivada de "arabe", deveni "rebeu".

Verbos traduida a verlan no pote es fasil conjugada, e un gramatica verlan no esiste. Jeneral, on usa la infinitiva, partisipio pasada, o la forma progresante: "J'étais en train de pécho une bebon" ("me ia es seduinte un fem sesosa") en loca de cualce cosa como "je péchais...".

Car verlan es xef un lingua parlada, lo no ave un spele normal. Jeneral, la parola nova es speleda como un aprosima la plu bon.

Verlan es min un lingua ca un modo per separa o asentua alga parolas. Multe parolas en verlan refere a seso o drogas, relatada a la intende orijinal de asconde comunicas de la autorias sosial. Tipal, verlan es limitada a un o du parolas sinifiante en un frase, e es miscada con un jergo franses plu jeneral.

Verlan es usada par persones per marca sua identias como membros en (o esclui de) un grupo spesifada, plu comun jovenes en la sites e banlieue (areas de clases plu basa).