Vestetas

Vestetas es vestes portada su vestes esterna, tipal contatante la pel, an si los pote es usada en plu ca un strato. Los servi per manteni la vestes esterna de deveni susia o danada par la move de la corpo, per redui la frica a la pel, per formi la corpo, e per asconda e suporta partes de la corpo. En climas calda, vestetas longa cual covre la gamas e brasos es a veses portada per furni proteje de la fria. Vestetas spesial pote ave sinifia relijiosa. Alga vestes es desiniada como vestetas, e otras, como camisas de T e alga tipos de pantalas, pote es usada como vestetas o vestes esterna. Si fabricada de un stofa conveninte, alga vestetas pote servi como vestes de note o per nade, e algas es intendeda per atrae o seso.

Un mosaica de Sisilia mostrante un fem roman antica con *strophium* e *subligaculum*

Vestetas es jeneral de du tipos: los cual es portada per covre la tronco e los cual es portada per covre la taie e gamas, e alga vestetas es portada per ambos. Stilos diferente de vestetas es portada par omes e femes, e plu varias esiste per bebes e enfantes. La vestetas portada par femes oji inclui portasenos e pantaletas, cuando omes porta tipal pantaletas e camisetas.

Istoria antica

La forma de vesteta la plu simple es la covreseso. Lo ia es probable la prima vesteta portada par umanas. En climas calda, la covreseso ia es comun la sola veste portada, an en la plu de sivilias antica. Lo pote es trovada en tre varias: la prima es un banda longa de stofa cual es pasada entre la gamas e alora sorca la taie. Arecolojistes ia trova la restas de los fadada de cuoro cual dati 7000 ante aora. La malo de Hawaii antica e alga stilos de la fundoshi de Japan ia es de esta tipo. Un otra forma ia es un triangulo de stofa con cordetas o anelos cual es usada per lia la triangulo entre la gamas e supra la jenitales. La re egiptian Tutankhamun (1341-1323 aec) ia es enterada con covresesos de esta stilo. Un plu forma es plu como un camisa: un peso de stofa es envolveda sirca la taie alga veses e alora liada con un sintur o banda.

Omes ia porta covreseso en Elas e Roma antica, ma lo no es clar si femes elinica ia porta vestetas. Algas sujeste ce sola sclavos ia porta covresesos e ce sitadanes no ia porta vestetas su sua camisones o robas. Mosaicas de la periodo roman indica ce femes (spesial en la contesto de atletisme) a veses ia porta strophiae (covresenos) de cuoro mol, con subligacula cual ia es en la forma de pantalas o covresesos, cual ia es ance portada par omes. La fabrica de covresesos ia es lana, lino, o un combina. Sola la clases alta ia pote compra los fabricada de seda.

La covreseso continua es portada sirca la mundo. Lo es la forma de vesteta tradisional en multe sosias en Asia, per esemplo. En cultures tropical la vestes de un om tradisional pote ancora es composada de sola un veste su la taie o an no veste intera. Vestestas es nonobligada en multe casos, como la dhoti e lungi de India, o la cilt de Scotland.

Edas medieval e la Renase

En la eda medieval, la vestetas de omes en la ueste ia deveni plu laxe. La covreseso ia es reponeda par braies, cual sembla pantalas o pantalones, cual es liada a la taie par un sintur e sirca la gamas a la media de la sura. Omes plu rica ia potra chausses ance, cual ia covre sola la gamas. Orijinal, braies (o braccae) ia es un tipo de pantalon portada par omes de tribus celta e germanica plu temprana. Per la edas medieval, los ia es usada sola como vestetas.

Per la eda de la Renase, la braies ia deveni plu corta per conveni la stilos plu longa de la chausses. Chausses ia es reponeda par calsones streta cual ia covre la gamas e pedes. La calsones de la sentenio 15 ia es comun de du colores, con cada gama de un fabrica diferente colorida. Ma multe tipos de braies, chausses, e calsones no ia es intendeda per es covreda par otra vestes, e donce no ia es vestetas en la sinifia esata.

Braies ia ave un ala fronte cual ia es botonida o liada cluida. Esta portseso ia permete ce omes urina sin la nesesa de desvesti sua pantalones. La portasesos ia es ance portada con calsones e un jaceta multe corta, cual permete ce la covreseso es vidable. Alga omes, spesial los de la clases alta (como la re) ia porta covresesos esajerada, posible per asentua sua masia.

Per la parte superior de sua corpos, omes e femes medieval ia tipal porta un camisa o camison streta. La asendente de la camisa moderna, lo ia es inserteda en la braies de omes, su sua vestes esterna. Femes ia porta los su sua robas, a veses con faldetas. Faldetas colxida o ornosa ia pote es mostrada par un roba cual pote es fisada abrida, en cual caso los ia servi como un falda. En la sentenio 16, un faldeta rijidada con bastetas de cana o salsa per estende la falda como un cono a via de la gamas.

Corsetas ia deveni ance es portada sirca esta eda. A prima, los ia es composada de un camiseta decorada sur un otra camiseta rijidada con canas, osos de balena, o otra materias. Los no ia restrinje la taie, como corsetas de la eda victorian, ma ia es reta per plati la seno. La senos ia es puiada a supra e deveni plu vidable.

La braies e calsones ia es ultima reponeda par pantalas e pantalones de coton, lino, o seda, plu comun asta la jeno, con un ala con botones a la fronte.

Persones portante sola camisones, sin pantaletas, pote es videda en obras como "La asina en la scola" par Pieter Bruegel la vea, en la Très Riches Heures de duc de Berry ("la tre oras rica de la duxe de Berry") par la Frates Limbourg, o en "La breviario de Grimani: la mensa Febrero" par Gerard Horenbout.

En la Castel Lengberg en Osteraic, lo es descovreda vestetas de lino e dentela simil a portasenos, un de cual sembla forte los de la eda moderna, ma datida a sentos de anios ante los ia es suposada per esiste.

La sentenios 18 e 19

La inventa de macinas de fili e per separa coton en la dui du de la sentenio 18 ia resulta en stofa de coton deveni plu otenable a cada person. Esta ia permete ce fabricerias produi vestetas en masa, e per la ves prima, persones ia comensa compra vestetas en boteca en loca de fabrica los a casa.

Corsetas de la sentenio 18 ia es liada a ante e trae la spalas a retro per forma senos alta e ronda e un posa ereta. Corsetas colorada ia es popular. Con la stilos plu destensa de la campania a la fini de la sentenio, la corsetas ia deveni plu corta e ia ave no o min osos. Cuando taies streta ia deveni popular en la desenio de 1820, la corseta ia es denova plen de osos e liada streta per forma la figur. Per la desenio de 1860, un taie peti ("vespin") ia deveni un simbol de belia. La lias estrema ia resulta, a veses, en femes nesesante a retira a la "sala de desmaia". Per la desenio de 1880, la promove per reforma de vestas fema ia campania contra la dole e dana a organos interna e la osos causada par la lias streta. Inez Gaches-Sarraute ia inventa la "corseta sana", con un fronte reta desiniada per aida suporta la musculos de la fem.

La corseta ia es plu comun portada supra un camiseta de lina, coton, o muselina lejera. Stilos de faldas ia deveni plu corta e pantaletas longa (pantalettes o pantaloones) ia covre la gamas. Los ia orijina en Frans en la sentenio 19 temprana, e ia sperde rapida a Britan e la SUA. Los pote es construida de un peso o du, un per cada gama, liada a la taie con botones o bandas. La entregama ia resta abrida per razonas de "ijenia".

Cuando la faldas (e robas) ia deveni plu plen de la desenio de 1830, femes ia porta multe faldetas per ateni un forma de un campania de la moda. Per la desenio de 1850, la faldas ia es estendeda par stofa rijida o anelos, e la faldas deveni an plu ronda. La strutur o cuxineta portada sur la gluteos per estende sua forma ia es usada a veses par femes per du sentenios, ma ia es la plu popular en la desenio de 1880 tarde, e ia desapare sirca la desenio de 1890.

Un otra vesteta comun de la sentenio 19 tarde per omes, femes, e enfantes, ia es la union suit, inventada en Utica, New York, e patentada en 1868, esta ia es un veste de un peso, botonida a fronte, tipal fabricada de stofa tricotada, con mangas estendente a la pulsos e gamas a la talos. Lo ia ave un ala botonida en la anterior per fasili visitas a la sala privata. Lo ia es la asendente de long johns, un veste simil de du pesos, un veste alta con mangas longa, e un pantalon. Los ia es posible nomida per un boxor american nomida John L. Sullivan, ci ia porta un veste simil en la anelo de boxe.

La jockstrap (portaseso) ia es inventada en 1874 par C. F. Bennett de Chicago, per dona comforta e suporta per bisiclistes turi la stradas de petras ronda de Boston, Massachusetts. En 1897, Bennett funda la Bike Web Company e patenti e comensa produi la strap en masa.

La sentenios 20 e 21

Per la sentenio 20 temprana, la susede de vestetas produida en masa ia forsa produores per inventa stilos nova per compete. La Hanes compania ia emerjida de esta compete e pone se como la fabricante la plu susedosa de la union suits, cua ia continua es popular asta la desenio de 1930. La tecnolojia de stofa ia continua boni e la tempo nesesada per fabrica un union suit ia cade de dias a minutos.

Entretempo, desiniores de vestetas per femes ia destensa la corseta. La inventa de stofas nova cual ia es flexable ma suportante ia permete ce la osos es sutraeda. La "camiseta de libria" ia ofre un alternativa a la corsetas restrinjente, e en Australia e Britan, los ia deveni la norma per xicas e femes.

La vestetas de omes ia es ance cambiante. Benjamin Joseph Clari, un migrante a Louisiana de New Jersey, ia funda un compania nomida Bossier. Un de sua produidas ia es panteletas streta cual sembla los de oji. La compania ia deveni bancarota, ma lo ia ave un efeto sur la desinia de vestetas per omes.

Anunsia per vestetas ia comensa sirca la desenio de 1910. La prima en la SUA ia apare en la Saturday Evening Post en 1911 e ia mostra depintas par J. C. Leyendecker de la Kenosha Klosed Krotch (un nom cual inclui eras intendeda de spele per "entragama cluida de Kenosha", un site en Wisconsin). Anunsia ia asentua la dura e comforta de sua produidas, e moda no ia es videda como importante per vende.

Per la fini de la desenio 1910, Chalmers Knitting Company ia fende la union suit, e ia inventa, en un modo, la vesteta e pantaleta moderne. Femes ia porta varias con plu dentela conoseta como la camisol e tap pants.

En 1913, Mary Phelps Jacob de New York ia crea la portaseno moderna prima par lia du teletas con banda. Sua intende orijinal ia es per covre la oso cual ia estende de sua corseta, cual ia es vidable su sua roba diafana. El ia comensa produi sua portaseno per familia e amis, e la idea ia sperde rapida. Per 1914, El ia ave un patenta per sua desinia e ia vende los tra la SUA, la prima comersiali susedosa e vasta adotada.

Per la fini de la desenio, bloomer (pantalas laxe), popularida par Amelia Jenks Bloomer ma inventada par Elizabeth Smith Miller, ia gania popularia con la Gibson Girls, femes joven ci ia joia ativias como bisicli e tenis. Esta interesa en atletisme ia aida la cade de la corseta. Un otra fator ia es la fato ce metal ia es nesesada per usa en la Gera Mundal 1.

Entretempo, soldatos en Gera Mundal 1 ia es donada pantalas con fronte botonida per vestetas. La botones ia es liada a un peso separada de stofa coseda a la fronte de la vesteta, e la stretia de la cabe ia es ajustada par lias a la lados. Esta desinia ia deveni tro popular ce lo ia comensa sustitui la union suit en popularia per la fini de la gera. Vestes raion ia deveni vasta otenable pos la gera.

En la desenio de 1920, fabricores move sua atende de dura a comforta. Anunsias per la Union suit ia parla deliriosa sur desinias nova patentida cual ia redui la cuantia de botones e crese asede. La plu de esta desinias esperimentes ia es la resulta de metodos nova per teni la ala cluida. Un stofa nova de texeda coton nomida nainsook ganiada popularia en la desenio de 1920 per sua dura. Vendores ia comensa vende vestetas ja petida.

Ance en la desenio de 1920, cuando la orlos de robas ia alta, femes la comensa porta calsones per covre sua gamas esposada. Bloomers ia deveni ance plu corta. Los ia deveni plu laxe e min suportante cuando la stilo xicin de la flapper. Per la fini de la desenio, los ia deveni conoseda como step-ins (fa-un-paso-a-en), multe como pantaletas ma con gamas plu larga. Los ia es portada per la libre de move ce los dona. La lias per calsones ia es inventada per preventi calsones de cade.

En 1928, Maidenform, un compania operada par Ida Rosenthal, un migror de Rusia, ia developa la portaseno e ia introdui la idea de varia de grandias per portasenos.

Vestetas moderna per omes ia es xef un inventa de la desenio de 1930. A 19 janero 1935, Coopers Inc ia vende la vestetas per omes prima en Chicago. Los no ia ave partes per la gamas e ia ave un ala supraponente en la forma de un Y. La compania ia nomi los Jockey car los ia ofre un grado de suporta simil a la jockstrap (portaseno), cual ia es inventeda per partisipa en sportes. Los ia deveni tan popular ce plu ca 30,000 ia es vendeda en tre menses de sua introdui. En 1938, los ia es introduida a Britan. En la mesma desenio, companias ia comensa vende boxers, un pantaleta nomida per boxores ci ia porta alga cosa simil.

Femes de la desenio 1930 ia reintrodui la corseta (aora nomida la girdle). Los no ave la osos de balena e suportas de metal, e tipal ave un portaseno (bra) e bandas de calsa ja liada. En la gera, alga femes ia reintrodui la corseta ancora, cual dona un taie "vespin" a la portor. Multe femes ia comensa porta un portaseno sin bretelas ance, cual ia gania popularia per sua capasia per puia la senos a supra e mostra la entreseno.

Ante la desenio de 1950, vestetas ia es tipal cosas simple e blanca, e no per mostra en publica. Ma pos esta periodo, vestetas ia comensa es comersialida como modo par se mesma. Fabricores ia rexerca la usa de raion, nilon, dacron, e spandex. Per 1960, vestetas per omes ia es comun primida con motifes colorosa, o con mesajes o imajes como cartunes.

La vestetas de femes ia comensa asentua la senos en loca de la taie. Per esemplo, la desenio ia vide la introdui de la bullet bra (portasenos puntida), seguente la "moda nova" introduida par Christian Dior. Portasenos cual puia la seno a supra, per esemplo par Wonderbra e Frederick's of Hollywood ia atrae atende. Pantaletas ia deveni plu colorosa e decorada, e per la desenio de 1960, ia es otenable en stilos peti como la hip-hugger ("abrasante de la coxas") e la bicini (nomida per un isola en la Mar Pasifica), frecuente en nilon diafana.

Pantyhose o tights ia combina pantetas e calsones de nilon como un vesteta en 1959, inventada par Glen Raven Mills de Carolina Norde. La compania plu tarde ia introdui pantyhose sin costuras en 1965, stimulada par la popularia de la minifalda. Par la fini de la desenio, la girdle es abandonada e femes ia eleje alternativas plu lejera, plu comfortosa, e plu sesosa. Ance, con la comensa de la promove fema en la SUA, la pantyhose ia ance comensa desapare.

Vestetas como moda ia ateni sua culmina en la desenios de 1970 e 1980, e la anunsiores ia oblida comforta e dua, e comensa vide seso como la plu efetosa, en la modas per nada ance. An per omes, desiniores como Calvin Klein ia usa modeles cuasi nuda en sua anunsias. La rica cresente de la comunia ge ia aida ance la diversia de elejes.

An si portada per desenios par dansores esotica, en la desenio de 1980, la G-string (tanga) ia gania popularia en America Sude, spesial en Brasil. Orijinal un stilo de veste per nada, la anterior de los ia deveni tan streta ce lo ia desapare entre la gluteos. Par la desenio de 1990, la desinia ia estende tra la mundo ueste. Oji, la tanga es la stilo de pantaleta la plu comprada par femes, e es ance portada par omes. La eda va es ariva en cual nudia es la plu comun forma de vesti. O, como en moda istorial, nos va reveni a alga stilos de la pasada.