Vicing
Vicinges ia es marinores de Europa norde, xef parlores de norsce vea, ma ance latvisces e estis, ci ia ataca e comersia de sua paises propre a areas larga de Europa norde, ueste, este, e sentral, entre la sentenio oto tarda e des-un tarda. La nom es comun estendeda en linguas moderna a la abitores de la comunias propre en la eda cual es comun nomida "la eda de vicinges". Esta eda de estende militar, comersial, e popla ia es un parte importante en la istoria medieval de Scandinavia, Esti, Britan, Er, Frans, Sisilia, e la paises de la Rus de Ciiv.
Aidada par capasias de naviga e cualias de sua barcones longa, la ativias de la vicinges ia estende a la paises costal de la Mediteraneo, Africa norde, e Asia ueste e sentral. Pos periodos estendeda de esplora, crese, e coloni, par mar o rios, comunias e governas vicing ia es instituida en areas diversa de Europa norde-ueste, Rusia european, la isolas de la Atlantica, e tan distante como la costa norde-este de America Norde. Esta periodo de estende resulta en un sperde de la cultur norsce, e a la mesma tempo, un introdui de influes forte de cultures strana a Scandinavia mesma, con implicas profonda de developa en ambos dirijes.
Consetas popular e moderna de la vicinges es comun multe diferente de la vista complicada cual emerji de la obras de arceolojistes e istoristes. Un imaje romantica de la vicinges como savajes nobil ia comensa developa en la sentenio 18, cual alora ia es sperdeda en la revive de la cultur vicing en la sentenio 19. Imajes de la vicinges como, a un lado, piratas violente e pagan o, a la otra lado, como aventurores corajosa, es plu la fonte de la mitos de la vicinges cual ia formi en la sentenio 20. La imajes no es sempre coreta: pe, los no porta elmos con cornos.
Nomes
editaLa nom es derivada de la norsce vea "víkingar", con du posible orijinas: Lo pote es un estende de la parola "vík", cual sinifia rieta o baieta, e donce pote refere a un person de un tal area. La otra sujesta ce lo deriva de la parola "vika", cual refere a un milia a la mar, pd un distantia de du turnos de remores. La forma "fara í víking" ia sinifia "viaja par turnos de remores".
Los ia es conoseda par multe otra nomes tra la edas:
- Ascomanni (deutx per omes de fresno, per la lenio de sua barcones)
- Dibgail e Finngail (eres per stranas oscur e blonde)
- Lochlanach (gailica per persones de lagos)
- Dene (anglo-sason per dansces)
- Rus' o Rhōs (de rōþs - remi - usada par arabis, slavicas, e bizantianes, la fonte de la nom Rusia)
- Varangianes (de la norsce vea Væringjar, omes fidal, usada par slavicas e bizantianes)
- Norman (om de norde, par la francas)