Vudu
Vudu es la nom comun per un grupo de relijios relatada cual ia es developada par la popla de la diaspora african en la Americas, spesial de la isolas e areas costal de la Mar Caribe e la Golfo Mexico. Los deriva de relijios tradisional african, con influes de otra tradisiones como cristianisme (spesial catolicisme) e los de la americanes orijinal de la area.
La cualias notable de la varias de vudu inclui la adora de la mor, un dio creante, e un panteon de otra spiritos divin. Ance comun es la usa de transes, majia, sani spirital, e spiritisme.
La dio creante es comun nomida par usa la terma franses Bon Dieu ("la bon dio") en formas como Bondye. El es videda como distante e nonconosedable, cual no es consernada con umanas. Adora es plu comun dirijeda a spiritos plu basa ca Bondye, nomida loas. Cada loa es cargada con un aspeta spesial de vive, con personalias cambiante e dinamica refletante la multe posibles en la aspetas de vive supra lo los rena. Per naviga vive dial, la credores atenta developa relatas personal con la loas tra la presenta de ofres, la crea de altares e ojetos dedicada, e partisipa en seremonias de musica, dansa, e posese par spiritos.
La orijin de vudu en Africa ia comensa xef en la area costal norde de la Golfo de Gine, spesial Ghana, Togo, Benin, e Nijeria, en la relijios de la popla fon, eue, e ioruba, e ance de la popla congo. Esta poplas ia es traeda a la isolas e costas de America como sclavos. An si los es forsada per deveni cristianes, los ia reteni partes de sua relijios orijinal, comun fusante la loas con santas. En la Americas, la relijio orijinal, nomida vodun en fon, deveni vodou en Aiti, vudu en la Republica de Dominica e Puerto Rica, vodu en Cuba, vodum en Brasil, e voodoo en Louisiana (SUA).