Abri la menu xef
La estende de cultiva en Europa temprana

Cultiva temprana en Europa comensa en Asia sude-ueste. Granes savaje ia es colieda e comeda de a min 20,000 aec. De sirca 9,500 aec, la oto cultivas orijinal de la neolitica ia es cultivada en la Levante: du tipos de trigo, orzo, lentil, piso, visia amarga, xixe, e lino. Segal es posible un cultivada nove. No multe plu tarde, bonis de cultiva, como iriga, alterna de cultivadas, e fertili ia es descovreda.

Un cambia de la clima en la Levante (e, natural, en otra areas ance) ia aveni pos la eda glasial final (sirca 11,000 aec), e multe areas ia deveni es propensada a saisones longa e seca. Esta situas favoreda la plantas anial cual mori en la saison seca, lasante un seme dorminte o un tuber. Con un abunda de granes e legumes fasil reservada, xasores-coliores en alga areas ia pote formi la viletas stable prima.

La revolui prima de cultiva, la parte la plu importante de la "paco neolitica", ia es la cambia grande de multe cultures en la neolitica de xasa e colie a cultures de cultiva e viletas, cual ia capasi un popla cresente grande. Esta comunias stable ia permete ce umanas oserva e esperimenta con plantas (e animales) per produi an plu reservas de comedas, e an plu grande sosias. Esta eda neolitica en Europa ia comensa entre 7,000 aec (la tempo de la comunias cultivante prima en Elas) e sirca 1,700 aec (la comensa de la eda de bronze en Europa norde-ueste. Esta es nomida la "estende neolitica", cual cambias de cultur ia move de sude-este a norde-ueste a sirca un cilometre per anio.

La istoria de cultiva en Europa comensa en Anatolia ueste. La sosias cultivante comedas en la costas de la mar Ejean ia es datida par carbono 14 a sirca 6.500 aec a Cnoso, la ava de Francti, e alga locas a tera xef en Tesalia. Grupos neolitica ia aveni pronto pos en la Balcanes e la isolas e costa de Italia (sirca 6,300 aec). Alora, los ia estende a la costas de la mar Mediteraneo ueste, la rios de Frans sude, e Europa sentral (sirca 5,800 aec). E los ia estende a la mar Atlantica, la mar Baltica, e a la stepes norde de la mar Negra. (sirca 5,300 aec). A sirca 4,300 aec, la plu parte de Europa inclui grupos de cultivores (an si con xasores-coliores miscada entre los, spesial en la montes e forestas densa). En sirca 3,500 aec, la popla de Er ia crea la sistemes de campos, ensircada par mures de petra, la plu vea conoseda en la mundo.

En la eda temprana de la istoria elinica, como on pote vide en la Odisea, la cultiva - e dieta - ia es fundida sur sereales, tipal en la forma de pan. 90% de produi de sereal ia es orzo. An si la elinicas ia conose ce trigo ave plu valua como un nurinte, la cultiva de orzo ia es min laborosa e plu produosa. Car tera cultivable ia es limitada en Elas, la nesesa de coloni ia deveni clar, e la cultur elinica ia comensa estende tra la Mediteraneo.

Esta cultivas sentral ia es aumentada par jardines de vejetales (coles, oniones, alios, legumes, xixes, favas), e jardines de erbas (salvia, menta, tim, oregano). Arborerias ia produi la figas, amandas, pomas, e peras. Plantas per produi olio ia es ance cultivada (lino, sesamo, e papavera).

A la otra lado, la tera de Elas ia es conveninte per olivos, cual produi olio de oliva. Lo deveni un parte major de la economia elinica, an si un arbor nesesa plu ca 20 anios per produi sua fruta, e produi esta fruta sola cada du anios. Car uvos crese bon en la tera rocosa de Elas, la cultiva de uvas ia deveni ance importante. Olio de oliva e vino ta developa a benes multe bon per comersia.

La otra partes de Europa segue la esemplo de Elas, etc, sustitui otra granes, vejetales, e frutas seguente la natur de sua tera e clima, con la ajunta de comedas de mar, la carne de avias e animales savaje, e la carne de animales domada - un otra parte multe importante de la "paco neolitica". La cuantia de popla continua a crese asta la grandia de comunias ia deveni tro grande per la strutures sosial de la tribus, e disputas limitada ia deveni geras de concista.