La ganglios basal es un colie de nucleos a ambos lados de la talamo, estra e supra la sistem limbica, ma su la cortex sinturin en la lobos temporal. An si glutamato es la neurotransmetador la plu comun, asi como a tota locas en la serebro, la neurotransmetador constrinjente - GABA - ave la rol la plu importante en la ganglios basa.

La ganglios basal

La grupo la plu grande de esta nucleos es nomida la striato , composada de la nucleo caudata, la putamen, la globo pal, e la nucleo acumben. Tota de esta strutures es duplida, un a cada lado de la divide sentral.

La caudata comensa prosima pot la lobo frontal, e curvi a retro asta la lobo osipital. Lo envia sua mesajes a la lobo frontal (spesial la cortex orbital, supra la oios), e pare es encargada con informa nos ce alga cosa no es coreta, e nos debe fa cualce cosa: Lava tua manos! Securi tua porte! Como esta esemplos sujeste, la sindrom de osesa e compulsa probable es asosiada con un caudata tro ativa. A la otra lado, un caudata no sufisinte ativa pote es asosiada con problemes variosa, como la manca de atende, depresa, aspetas de scizofrenia, e simple letarjia. Lo es ance asosiada con la sindrom de PAP, un perde de motiva resente descovreda.

La putamen es su e pos la fronte de la coda. Lo pare es asosiada con conduis automata coordinante como usa un bisicle, gida un auto, o labora a un linia de asembla. Problemes con la putamen posible esplica la sintomes de la sindrom de Tourette.

La globo pal es locada a la media de la putamen, con un parte esterna e un parte interna. Lo reseta informa de la caudata e la putamen e ave esflues a la sustantia negra.

La nucleo acumben es prosima su la nucleos ja discuteda. Lo reseta siniales de la cortex prefrontal (tra la teto ventral) e envia otra siniales a retro tra la globo pal. La entras usa dopamina, e multe drogas es conoseda como crese grande esta mesajes a la nucleo acumben.

Un otra nucleo de la ganglio basal es la sustantia negra. Locada en la parte superior de la serebro media, su la talamo, lo reseta sua color de neuromelanin, un relata prosima de melanin, la pigmento de pel. Un parte (la parte compata) usa neurones de dopamina per envia siniales supra a la striato. La funsion esata no es conoseda, ma on crede ce lo es asosiada con sircuitos de sasia. Ance, la maladia de Parkinson es causada par la mori de la neurones de dopamina asi.

La otra parte de la sustantia negra (la parte reticulal) es xef neurones de GABA. Sua rol major es la controla de moves de la oios. Lo es ance asosiada con la maladia de Parkinson, e ance epilesia.

Como on pote vide, multe problemes grava es asosiada forte con la ganglios. Per esemplo:

La maladia de Parkinson es marcada par trema, musculos rijida, difisiles con moves rapida e fasil, e difisiles con sta e pasea. Multe persones developa ance depresa e ansia e, plu tarda en la vive, problemes con memoria e dementia. La maladia es multe difisil per la pasiente e sua familia. Lo normal developa tarde en la vive, ma lo pote ance aveni en persones plu joven.

La maladia de Parkinson orijina en la mori de selulas en la sustantia negra e la perde de dopamina e melanin produida par esta selulas. Lo continua a otra partes de la ganglios basal e a la nervos cual controla la musculos, usante otra neurotransmetadores. Causas posible o fatores contribuinte inclui toxinas ambiente, trama de la testo, e jenetica.

On ave alga tratas cual lenti la curso de la maladia e boni la sintomes. La plu inclui repone o imita la dopamina o otra neurotransmetadores perdeda. Triste, la maladia continua lenta a la grado a cual tratas sola opera per poca oras. La maladia no causa direta la mori e alga pasientes vive multe anios con lo.

La maladia de Huntington es marcada par la perde de memoria e convulsas strana nomida corea ("dansa") Lo es un maladia eritada (con un jene dominante) cual causa mori de selulas en la nucleo caudata. Lo comensa normal en la desenio de 30, ma pote comensa a cualce eda.

On no ave un remedia, ma tratas esiste cual pote redui la sintomes. Lo es matante, an si lo es complicas de la maladia cual normal causa mori, e no la maldia mesma. Multe persones ci sufri de la maladia de Huntington suiside.

Persones con paralise serebral ave problemes de move variosa, como spasmas, paralise, e atacas neuromusculal. Spasmas es marcada par la rijidia de alga musculos, donce restrinje move normal. Esta es la razona per la posas strana de la brasos e manos cual on vide en persones con esta maladia.

Lo pare es causada par dana a la serebro, plu comun a alga tempo ante nase. Causas pote inclui infeta de la feto, toxinas de la ambiente, o osijen nonsufisinte.

An si paralise serebral es alga stable tra la vive de un person, lo no ave un remedia e es multe difisil per la person e sua familia.

PAP (de "perde de autoativi psical", ance nomida "sindrom atimormica") es marcada par un asentia strana de motiva. Un caso dramosa ia es lo de Sr M, ci en afocante, no ia atenta salva se, an si el ia es un bon nador.

Dana a la nucleo caudata pote causa ce no cosa ave sinifia emosial. Afoca? No freta. Persones con PAP ance iniora la motivas sosial e moral cual la plu de persones considera normal. Los no comprende ce sua nonata pote ave resultas importante.

Sin la influe motivante de la ganglios basal, la lobo frontal para considera la futur. Strana, la person pote ancora reata a motiva esterna, como un demanda par un amada, o un comanda par un autoria.