Inuit (lingua)

La lingua inuit es un colie de dialetos parlada par la popla inuit de la artica de America norde. La inuites abita jeneral en tre paises: Calalitnunat (o Gronland), Canada (spesial Nunatsiavut en Labrador, Nunavik en Quebec, Nunavut, e la Teritorios Norde-ueste), e la SUA (en la stato Alaska). La linguas relatada nomida yupik es parlada en Alaska e par un cuantia peti de persones en Rusia prosima a Alaska. La cuantia de persones ci parla inuit es difisil per estima. Estimas per Calalitnunat es sirca 50 000, per Canada sirca 35 000, e per Alaska 13 000. Sirca 7 000 persones ci parla inuit abita en Danmarc (de cual Calalitnunat es un parte political), e cisa plu ca 100 parlores abita en Rusia. La soma es sirca 90 000 persones. Inuit es la nom usada par linguistes, ma cada grupo de inuites ave un nom separada per sua propre dialeto, e no forma unida esiste, an si alga dialetos ave formas normal.

Dialetos de inuit

La lingua inuit es en la familia inuit-aleut. Lo es prosima relatada a la linguas yupik, e plu distante relatada a la lingua aleut. Lo no es relatada a otra linguas de la Americas o de Asia, ma alga linguistes ia proposa un relata entre inuit e la linguas uralica (como suomi e sami). La inuit orijinal ia es parlada par la popla cual antropolojistes nomi la popla thule. Esta popla ia suprasede la popla dorset sirca 1000 ec. Sirca 1300, la inuit ia estende a Calalitnunat, sirca la tempo cuando la colonia de la vicinges en Calalitnunat sude ia desapare.

Fonetica

La plu dialetos ave 15 consonantes e tre vocales. Ambos consonantes e vocales ave varias corta e longa. La dialetos inupiatun e qawiaraq (en Alaska) ave consonantes retroflexe, ma los ia desapare en tota otra dialetos.

La tre vocales es i, a, e u, con la varias longa cual es comun scriveda como ii, aa, e uu.

La consonantes:

		labial	alveolal		retroflexe1	palatal	velal	uvulal
			sentral	ladal
nasal		m	n				ŋ6
esplodente	sin vose	p	t				k	q
	con vose					(ɟ)2	g3	ɢ4
continuante	con vose	v		l	(ʐ)	j
	sin vose		s	ɬ5	(ʂ)

Notas:

1. /ʐ/ and /ʂ/ esiste sola en inupiatun, e los es scriveda como "r" e "sr".
2. /ɟ/ esiste sola en natsilingmiutut. En otra dialetos, lo ia es fusada con /j/. Lo no es scriveda con un letera unica.
3. /ɡ/ es cambiada a /ɣ/ en siglitun e entre vocales e semivocales en otra dialetos.
4. /ɢ/ (o /ʁ/) deveni /ɴ/ ante consonantes nasal. Lo es scriveda como "r" en nunavut, "ġ" en inupiatun.
5. /ɬ/ es scriveda como "ł" o "ll".
6. /ŋ/ es scriveda como "ŋ" o "ng".

Scrive

Car la inuites es sperdeda tra un area tan grande, divideda entre nasiones e otra poplas diferente, lo no ave un moda unica de scrive. La plu de la dialeto inuktitut en Nunavut e Nunavik es scriveda usante la alfabeta silabal inuktitut, cual es fundada sur la alfabeta de canadianes orijinal. La parte ueste de Nunavut e la Teritorios Norde-ueste usa un scema de la alfabeta latina nomida inuinnaqtun. En Alaska, un otra scema latina es usada. Nunatsiavut usa un scema creada par misionores moravian ci ia parla deutx. La yupikes de Sibir usa la alfabeta cirilica.

Morfolojia

La lingua inuit, como otra linguas inuit-aleut, ave un sistem morfolojial multe rica. Un serie de morfemes es ajuntada a radises per sinifia cosas cual, en linguas como elefen, nesesa multe parolas. Tota parolas en inuit comensa con un radis, e otra morfemes es ajuntada como sufisas. La lingua ave sentos de sufisas unica – en alga dialetos tan multe como 700. Ma, fortunosa per aprendores, la lingua ave un morfolojia multe coerente. Multe regulas esiste, multe complicada a veses, ma on no ave esetas como otra linguas.

Esta sistem permete la crea de parolas multe longa e cisa unica. Per esemplo, en Nunavut inuktitut:

• tusaatsiarunnanngittualuujunga – Me no pote oia multe bon.

Esta parola longa es composada de un radi tusaa- – oia – segueda par sinco sufisas:

• -tsiaq- – bon
• -junnaq- – pote
• -nngit- – no
• -tualuu- – multe
• -junga – person un, singular, tempo presente, moda indicante, nonspesifada

Un cualia de fonetica en inuit es nomida sandi par linguistes. Sandi refere a la cambia de du sonas cuando los veni a lado de lunlotra. En la esemplo a supra, la /q/ de "-tsiaq-", segueda par la /j/ de "-junnaq-", deveni /r/, cual reseta sua loca de pronunsia de la /q/ e sua moda de pronunsia de la /j/. La /q/ de "-junnaq-" es asorbeda par la /ŋŋ/ de "-nngit-" car inuktitut no permete tre consonantes en serie, e car la regulas per "-nngit-" esije ce on sutrae cualce consonante ante lo.

Esta forma de construi de parolas es normal en inuit e multe diferente de elefen. En un corpo grande de leteratur inuit – la Nunavut Hansard – 92% de la parolas apare a sola un ves.

Plu, la idea de clases gramatical es alga complicada en inuit. Un verbo plen infletada pote es usada como un nom. Per esemplo, la parola ilisaijuq sinifia "el studia", ma lo pote ance es usada como "studiante".