Iudi vagante
La iudi vagante es un om nonmortal de ci sua lejenda ia comensa sperde tra Europa en la sentenio 13.
El es la carater xef de un lejenda de un iudi ci ia burla Jesus a sua via a la crusi e ia es alora condenada a pasea la tera asta la reveni. La natur esata de sua peca e sua natur varia. El es, a veses, videda como un sapator o otra artisan, e en otra naras el es la portor a la imobila de Pontio Pilato.
La manoscrito esistente la plu vea con la lejenda es la Flores Historiarum par Roger de Wendover, do lo apare en la parte per la anio 1228, su la titulo De la iudi Josef ci es ancora vivente espetante la reveni de Cristo.
A min de la sentenio 17, la nom Ahasver ia es donada a la iudi vagante, cual pare es adotada de Ahasuero, la re persian en la Libro de Ester, ci no ia es vera un iudi, e de ci sua nom entre iudis medieval ia es un esemplo de un fol. Esta nom ia pote es posible elejeda car la Libro de Ester descrive la iudis como un popla persegueda e sperdeda tra cada provinse de la impero vasta de Ahasuero, simil a la diaspora iudi plu tarda en paises en cual cristianisme es forte.
Multe nomes ia es donada a la iudi vagante pos alora, incluinte Matatio, Butadeo, Paul Marrane, e Isac Lacedem (sua nom en Frans e Nederland, en la lejenda e en la novela par Alexandre Dumas). En la plu de casos, la nom es simple un varia de "la iudi vagante" o "la iudi eterna". En suomi, el es conoseda como la sapator de Ieruxalim.
Un lejenda es recordada en la Flores Historiarum par Roger de Wendover: An arcibispo de Armenia, cuando el ia visita England, ia es demandada par la monces de la Abaderia de San Alban sur Josef de Arimatea, ci ia parla a Jesus e ia es reportada como ancora vivente. La arcibispo ia responde ce el mesma ia vide un tal om en Armenia, e ce sua nom ia es Cartafilo, un sapator iudi, e ci, cuando Jesus ia para per un momento per recovre cuando portante sua crus, ia colpa el e ia dise a el "Vade plu rapida, Jesus! Vade plu rapida! Perce tu pigri?" Jesus ia responde "Me va sta e reposa, ma tu va vade asta la dia final". La arcibispo ia reporta ance ce Cartafilo ia converti a cristianisme e vive como un eremita promovente sua crede. Esta nara ia es repetada en formas variosa per multe anios e en multe paises.
La pecor condenada, forsada a vaga sin la espera de reposa en mori asta la reveni de Cristo, ia impresa se sur la imajina popular medieval, spesial referente a la nonmortalia parente de la popla iudi vagante. On ia ave declaras de vides de la iudi vagante tra Europa e la Americas, de la eda medieval (cuando lo ia es crededa como un fato) a sentenios plu resente.