La Sifra de Vinci (filma)
| La Sifra de Vinci The Da Vinci Code | |||
|---|---|---|---|
| Dirijor | Ron Howard | ||
| Produor | Brian Grazer John Calley | ||
| Scrivor | |||
| Atores xef | Tom Hanks Audrey Tautou Ian McKellen Alfred Molina Jürgen Prochnow Paul Bettany Jean Reno | ||
| Sinematografia | Salvatore Totino | ||
| Editor | Dan Hanley Mike Hill | ||
| Jenero | |||
| Compania de produi | Columbia Pictures Imagine Entertainment Skylark Productions | ||
| Distribuor | Sony Pictures Releasing | ||
| Data de lansa | 17 maio 2006 (Cannes) 19 maio 2006 (SUA) | ||
| Pais | Statos Unida de America | ||
| Lingua | engles | ||
La Coda da Vinci (da Vintxi) es un filma fundida sur la novela bonvendeda La Coda da Vinci scriveda par Dan Brown. Lo ia es prevideda en la note de mostra prima su la Festival de Filma en Cannes, a 17 maio 2006.
Per sua comprendes controversa e naral de la istoria de cristianisme, e la libro e la filma de La Coda da Vinci ia es criticada per la Eglesa Catolicisme Roman. Ance alga bispos ia recomenda forte ce sua membros boicota la filma. Multe mostras prima ia es acompaniada par protestores estra la sinemas, e la revisas prima ia es miscada. Ma en la fini de semana de sua mostra prima, la filma ia ave un mostra grande, sola min grande en numeros de vidores comparada a la mostra prima de la filma Presenta II de Gera de Stelas: Retalia de la Sith.
Soma
editaLa filma segue un profesor de simbolojia, Robert Langdon, de cuando on demanda ce el visita la sena de un asasina asustante en la Louvre. Langdon e un criptografiste joven franses, Sofie Neveu, atenta comprende la mesaje ala lasada par la vitim, sur la manteni de un secreta tenida tra dumil anios, consernante Jesus e Maria Magdalena, cual ta pote cambia profonda la cristianisme.
La nara
editaLa filma comensa con un om, Jac Sauniere, xasada par un person misteriosa con xapo e fusil, tra un de la alas de arte en la Louvre. La om atenta evade la person ma el es frontida par el ci revela se como Silas de Opus Dei. Silas demanda per la loca de la "clef de voûte" (clave de arco) de la Monceria de Sion, un sosia secreta. Ma Sauniere nara a el un menti cual ia es ance narada a el par tre plu gardores de la secreta de la Monceria, de cual cada ia es asasinada par Silas a ante. Silas fusili la om a la stomaco, e vade. La menti comun, cual dirije enemis sola a un testo "tu ia veni a asi, ma tu no vade plu", ia es finjeda par la Monces de Sion per la caso ce los va es menasada.
A la mesma tempo, la simbolojiste american Robert Langdon es en Paris per presenta un leson sur Simboles e la Fema Santa. El es contatada par la Interpol franses, e clamada a la Louvre per vide la sena crimal. Ala, el descovre ce Sauniere morinte ia crea un mostra complicada (como un desinia de Leonardo da Vinci) usante inca de lus ultravioleta, sua sangue e sua corpo. Capitan Bezu Fasce demanda a Langdon per comprende la sena enigmosa.
Sofie Neveau, la criptolojiste franses, es ance contatada par la polis. El informa discreta a Langdon ce el es en danjer, e el debe vade pronto sin causa suspeta. Langdon, confusada, vade a la saleta privata do el rencontra Sofie ci esplica a el ce capitan Fasce ia sutrae un linia ("PS trova Robert Langdon") de la scrive de Sauniere en inca de lus ultravioleta cual pare criminali Langdon, e el esplica ce Fasce crede ce Langdon es la mator.
Sofie crede ance ce Sauniere asasinada, ci ia es la avo de Sofie, ia vole dona a el un mesaje sifrida e ia vole junta el a Langdon per aida el a fesuri la coda. Los debe solve du misterios: Cual es la secreta protejeda par Sauniere cual ia culmina par sua mori? Ci es la jenio ci ia fa la asasina?
La duple susede crea alga tempo par destrae la polisiores franses. Los esplora la Louvre do los trova plu mesajes anagramida par Sauniere. Multe de esta mesajes pare relatada con la arte de Leonardo da Vinci. Ultima, la artes e rompetestas dirije los a trova un clave decorada con un adirije enscriveda a sua lado.
Los evade la Louvre, aora criminales xercada, e vade a la Banco de Zurich en Paris como la clave dirije. Ala los descovre ce Sauniere ia ave un caxa secur cual nesesa un codigo de 10 dijitos per abri lo. Esta esije prima ce los resolve otra rompetestas en la artes de Leonardo, incluinte la Mona Lisa e La Come de la Sera Ultima.
La comprende de mesajes ascondeda en la artes es relatada a la consepi de la Fema Santa. Los debe solve la misterio par solve un seri de rompetestas, anagrames e combinas de numeros. La informa es liada con la loca posible de la Calix Santa, la sosias misteriosa de Monceria de Sion e Cavalores de Temple. Ance Opus Dei, la organiza catolica, es envolveda.
Los susede, e la caxa a la banco en Paris es abrida. La caxa conteni un sifrador; un macineta cual pote es aliniada en multe modos, como la rompetesta cubo de Rubic. La macineta debe spele un parola secreta de 5 leteras per abri la mesaje contenida. Lo debe no es forsada, car la mesaje ta es destruida.
Secretas
editaLo pare, seguente la nara, ce la secretas de la Calix Santa, ascondeda e gardada par la Monceria de Sion, es la seguentes:
- La Calix Santa no es un tas fisical, ma un fem, Maria Magdalena, ci ia nase un enfante de Jesus.
- La parola vea per Calix Santa, San Grial, es vera Sangue Re-al de Cristo.
- La restas consernante la Calix Santa es testos sur la linia de familia e osos vera de Maria Magdalena.
- La restas ia es ascondeda par la Monceria de Sion en un tomba secreta, cisa su la Egleseta Rosalin.
- La Eglesa Catolica ia supresa la veria sur Maria Magdalena e la linia de sangue de Jesus tra dumil anios, xef car esta potia de omes ia es asustada par la potia de la fema santa.
- Maria Magdalena ia es naseda en un familia real, la Casa iudi de Benjamin, e ia es la sposa de Jesus de la Casa iudi de David. La Eglesa Catolica ia finje la malacusa ce el ia es un prostituta per oscuri la relata vera entre la du. A la tempo de la Crusi de Jesus, el ia es ensinta. Pos la Crusi, el ia fuji a Galia do el ia trova refuja con la iudistes de Marseille. Ala, sua fia ia nase, nomida Sara. La linia de sangue de Jesus e Maria Magdalena ia deveni la dinastia Merovinjian de France.
- La esistente de la linia de sangue ia es la secreta cual ia es contenida en testos descovreda par la Crusadores pos cuando los ia concista Ieruxalim en 1099. La Monceria de Sion e la Cavalores de Temple ia es organizada per garda esta secreta.