Lege relijial es fundida clar sur la prinsipes derivada de la credes de un relijio. Esemplos inclui la sistem de halaha en iudisme, e de xaria en islam, ambos de cual pote es traduida como "la via per segue". Lege de canon de cristiania ance survive en alga comunias eglesal. Comun, la implica de relijio per lege es sua natur noncambiable, car la lege de Dio no pote es cambiada o negada par judores o governas. Ma, un sistem legal completa nesesa jeneral alga interprete umana. Per esemplo, la curan ave alga leges, e lo ata como un funda de plu lege par interprete, qiyas (razona par analojia), ijma (acorda), e presedente. Esta es contenida xef en un corpo de lege e judi conoseda como xaria e fiqh. Un otra esemplo es la Sinco Libros de Moxe. Estas conteni la codigo fundal de lege iudi, cual alga comunias israeli eleje usa. La halaha es un codigo de lege iudi cual soma alga de la interpretes de la talmud. Ma lege israeli permete ce litigores usa leges relijial sola si los eleje lo.

Un litiga muslim en la Impero Osmanan en 1879

Lege de canon (de la parola elinica kanon, "un regla") es un colie de proclamas e regulas creada par la autorias de la eglesa, per la governa de un organiza o eglesa cristian e sua membros. Lo es un lege eglesal interna sola usada par membros de la Eglesa Catolica, la Eglesa Ortodox Este, e la eglesas de la Comunia Anglican. La modo en cual tal leges eglesal es legida, interpreteda, e a veses judida, varia entre esta corpos de eglesas. En tota tre tradisiones, un "canon" ia es orijinal un regula adotada par un consilio eglesa.

La Eglesa Catolica ave la sistem legal cual ia funsional continuante la plu vea en la mundo ueste, datinte ante la evolui de lege sivil o comun de Europa moderna. La Codigo de Lege de Canon de 1983 governa la eglesas latina sui juris (autonom). La eglesas este, cual ia developa praticas alga diferente, es governada par la Codigo de Canones de Eglesas Este. La lege de canon de la Eglesa Catolica ia influe la lege comun en la eda medieval tra sua conserva de prinsipes de lege roman como la suposa de inosentia.

Asta la sentenio 18, lege xaria ia es usada tra la mundo muslim en un forma noncodigida, con la Codigo Mecelle de la Impero Osmanan en la sentenio 19 como la atenta prima a codigi elementos de lege xaria. De la desenio de 1840 media, atentas ia aveni, en multe paises, per move lege xaria plu acordante con situas e consetas moderna. En tempos moderna, la sistemes legal de multe nasiones muslim ia usa tradisiones de lege sivil e lege comun en ajunta a lege e costum muslim. La constituis de alga nasiones muslim, como Egipte e Afganistan, reconose islam como la relijio de la stato, cual obliga ce la legeria adere a xaria. Saudi Arabia reconose la curan como sua constitui, e es governada sur un funda de lege muslim. Iran ia ance vide un ajunta de lege muslim en sua sistem legal pos 1979. En la desenios resente, un de la cualias de la promove per la reanima de lege muslim es la clama per xaria, cual ia jenera un cuantia grande de leteratur e ia afeta la politica mundal.