Mancala es un de la juas la plu vea cual es ancora juada oji. Mancala es la nom jeneral per un familia de juas de stratejia per du juores, juada con calculas, favas, semes, cauris, o simil pesos, e linias de bucos en un peso de lenio, petra, seramica, o an en la tera. La gol es tipal la catura de tota o un cuantia de la pesos de la juor oposante.

Juores a la la festa de juas en Cannes, Frans, 2013
Un table de ouare
Enfantes jua con un "table" la plu umil

La parola "mancala" (منقلة) deriva de la parola arabi naqala (نقلة), cual sinifia simple "move". No un jua esiste con esta nom, cual es simple un clasi de juas simil. La jua ia apare prima en Africa e, plu tarda, en Asia sude-este antica.

Alga istoristes crede ce mancala es la jua la plu vea en la mundo, fundida sur indicas arceolojial, como los trovada en Urdun cual dati a sirca 6000 aec. La jua ia pote es juada par la nabateanes antica. Otra escavas ia trova pesos datida a la sentenio 6 aec en Lubnan. On ave ance indicas de la jua en Egipte antica ante sirca 1000 aec. Lo ia sperde de Egipte a otra partes de Africa, probable par mercatores cual move sude par la Rio Nilo.

Indicas de la jua ia es trovada en Israel en la site Gedera en un casa de banio roman cual dati a la sentenios 2 o 3 ec. Otra indicas inclui fratos de seramica e alga talias de roca trovada en areas asosiada con la Impero de Acsum en Matara (Eritrea) e Lyeha (en Itiopia), datida a la sentenio 6 o 7 ec.

La similia de alga aspetas de la jua a ativias de cultiva, e la asentia de la nesesa de aparatos spesialida, dona la posible ce lo pote es datida a la comensa de sivilia mesma.

Plu tarda, la juas ia ateni Europa este. En la area de la Baltica, lo ia es multe popular como la bohnenspiel (jua de favas); en Bosnia, do lo es nomida ban-ban, lo es ancora juada oji. Mancala no ia deveni popular en Europa ueste.

En la SUA, on ave plu juores. Un varia nomida warra es ancora juada en Louisiana en la sentenio 20 temprana, e un varia fabricada en masa nomida kalah ia es popular en la desenio de 1940. En Capo Verde, lo es nomida ouril e es juada ala, e ia es portada a la SUA par migrantes de la isolas. Oji, lo es ancora juada en comunias de migrantes en Nova England.

La aparatos es tipal un table, construida de materias variosa, con un serie de cavetas ordinada en linias, plu comun du o cuatro. Alga tables ave bucos plu grande a la du finis de la table, nomida "reservas", cual es usada per la pesos caturada.

Ouare - un esemploEdita

Ouare es probable la forma la plu sperdeda en la familia mancala. Lo furni nos con un bon idea jeneral de la modo de jua la formas variosa de mancala.

Ouare es conoseda como la jua nasional de la site-stato axanti. La nom - cual sinifia "el sposi", es suposada como deriva de un lejenda de la popla axanti, sur un om e fem ci ia jua mancala continuante, e, afin los pote resta con lunlotra e continua jua, los sposi.

La jua nesesa un table, composada de du linias de ses bucos (nomida "casas") e du bucos plu grande a cada fini per la reservas. Ouare usa 48 semes, e la jua comensa con cuatro semes en cada de la des-du casas.

La gol de la jua es la catura de plu semes ca tua oposor. Car la jua ave sola 48 semes, catura 25 sufisi per gania la jua. Lo es posible per la jua fini egal, cuando cada juor ia catura 24 semes.

Juores ave turnos alternante en move la semes. En sua turno, un juor eleje un de sua ses casas a sua lado de la table. La juor estra tota semes de acel casa, e distribui los par cade un seme en cada casa contra orolojia de acel casa - un prosede nomida "semi". Nota ce la semes no es cadeda en la du reservas, e no en la casa orijinal de la semes. La casa orijinal resta sempre vacua en un turno. Si lo conteni 12 o plu semes (e donce la semi continua a o pos la casa orijinal), la juor debe salta la buco e continua pos lo.

En Ouare, catura aveni sola cuando un juor fini semi en un casa de sua oposor cual conteni esata du o tre semes cuando la seme final es semida en la turno. Esta catura la semes en acel casa, e posible plu: si la seme presedente es semida en un buco con du o tre semes, esta semes es ance caturada. E si la seme cual presede an acel seme es semida en un buco con du o tre, esta semes es ance caturada, etc. La continua asta on ateni un casa cual ave no semes, un seme, o plu ca du o tre, o no parteni a la juor oposante, la prosede de catura sesa. La semes caturada ia es poneda en sua reserva (o simple poneda a la destra de la table, si la table no ave reservas).

Si un turno ta catura tota semes de la oposor, la catura no ta aveni, car esta ta preveni la oposor de continua la jua, e la semes no es estraeda. Esta proibi de catura tota de la semes de la oposor es relatada a un idea plu jeneral, ce on debe eleje un move cual permete ce la oposor continua jua. Si la casas de la oposor es tota vacua, la juor corente debe semi en un modo cual dona alga semes a la oposor. Si no tal ta move es posible, la juor corente ta catura tota semes en sua propre casas, e la jua fini. Esta idea de aida la oposor no esiste en cualce otra familia de juas.