Neurosiensa
Neurosiensa (ance nomida neurobiolojia) es la studia siensal de la sistem de neurones. Lo es un ramo multicampal de biolojia cual combina fisiolojia, anatomia, biolojia moleculal, biolojia de developa, sitolojia, modeli matematical, e psicolojia per comprende la cualias fundal e emerjente de neurones e sircuitas neuronal. La comprende de la funda biolojial de aprende, memoria, condui, persepi, e consensa ia es descriveda par Eric Kandel como la "problem ultima" de la siensas biolojial.
La estende de neurosiensa ia deveni plu vasta tra tempo e inclui vias diferente usada per studia la sistem neuronal a proportias diferente e la tecnicas usada par neurosiensistes ia crese enorme, de studias moleculal e selulal de neurones individua a imaji de taxes sensal e motoral en la serebro. Neurosiensa ia crea a otra campos como neuroeduca, neuroetica, e neurolege.
Como un resulta de la cuantia cresente de siensiste ci studia la sistem neuronal, alga organizas notable per neurosiensa ia es developada per furni un foro per tota neurosiensistes e educores. Per esemplo, la International Brain Research Organization ("la organiza internasional per rexerca de la serebro") ia es fundida en 1960, la International Society for Neurochemistry ("la sosia internasional per neurocimica") en 1963, la European Brain and Behaviour Society ("la sosia european de la serebro e condui") en 1968, e la Society for Neuroscience ("la sosia per neurosiensa") en 1969.
A la nivel de cognisio, neurosiensa cognisial demanda como la funsiones psicolojial es produida par la sircuitos neuronal. La emerje de tecnicas nova e potiosa de mesura como neuroimaji (pe fMRI, PET, SPECT), eletrofisiolojia, e la analise de jenetica umana, combinada con tecnicals esperimental sofistica de psicolojia cognisial permete ce neurosiensistes e psicolojistes ataca demandas astrata como la modo en cual cognisio e emosia umana es refletada par sustratos spesifada de neurones. An si multe studias ave ancora un vide reduiste, xercante per un funda neurbiolojial de fenomenos cognisial, rexerca resente mostra ce on ave un interata interestante entre la descovres neurosiensal e rexerca consetal, solisita e integri ambos perspetivas. Per esemplo, rexerca neurosiensal sur empatia solisita un debata intercampal envolvente filosofia, psicolojia, e psicopatolojia. Plu, la identifia neurosiensal de sistemes multiple de memoria relatada a areas diferente de la serebro ia defia la idea de memoria como un reprodui leteral de la pasada, suportante un vide de memoria como un prosede jenerante, construinte, e dinamica.
Neurosiensa es ance aliada con la siensas sosial e condual e ance campos nova intercampal com neuroeconomia, la teoria de deside, neurosiensa sosial, e neurocomersia per investiga demandas complicada sur interatas de la serebro con sua ambiente. Un studia de repondes par consumores, per esemplo, usa EEG per investiga corelatas neuronal asosiada con la responda a naras sur la efetosia de enerjia.
Ultima, neurosiensistes ta gusta comprende tota aspeta de la sistem de neurones, incluinte como lo opera, como lo developa, como lo malfunsioni, e como lo pote es cambiada o reparada. La topicas spesifada cual formi la focos xef de rexerca cambia tra tempo, motivada par un funda sempre cresente de sabia e la dispone cresente de metodos tecnical sofisticada. En la dura longa, boni de tecnolojia ia es la propulsa xef de progresa. Developas de microscopios eletronica, computadores, imaji de funsiona serebral, e plu resente, jenetica e jenomica, ia es tota propulsores de progresa.