Pademelones es marsupiales australian de la jenera Thylogale. Los es membros peti de la familia Macropodidae. Sua nom comun es derivada de la parola badimiliyan, de la lingua dharuk, un lingua de la australianes orijinal de Porto Jackson, en la rejion de Sydney. Pademelones es comun trovada en forestas.

Un pademelon tasmanian
Un pademelon con colo roja

Pademelones, ualabis, e cangarus es multe simil en sua strutur fisical, e la tre nome refere a tre grupos de grandias diferente. En ajunta a sua petia, pademelones pote es distinguida de ualabis par sua codas plu corta, plu spesa, e poca capeles. Como ualabis, los move par brinca.

La pademelones con colos roja pote es trovada en la rejiones costal de Queensland e New South Wales, e en Gine Nova sude-sentral. En alga areas, sua estende ia es reduida sever.

La pademelones con adomenes roja, acc la pademelon tasmanian, es abundante en Tasmania, ma ia es trovada en la pasada tra la partes sude-este de Australia estra Tasmania.

La pademelones sombre abita Gine Nova e sua isolas prosima. Lo ia es nomida la ualabi de Isolas Aru, e ante esta, lo ia es nomida la philander ("flirtor"), cual es la nom arcivida en la libro Travels ("viajas") par Cornelis de Bruijn, publicida en 1711. La nom latina de esta spesies es nomida per De Bruijn.

La abita natural de la pademelon es bosces de arboretas densa o subosces de forestas densa. Los ance crea tuneles tra erbas longa e arboretas en areas pantanosa.

La carne e pelo mol de pademelones ia es valuada e ia es comeda par colonistes e australianes orijinal per sentenios. Sua cuantia ia es ance reduida par la introdui de predores nonativa, como gatos e canes savaje e volpes roja. La "esplode" de la cuantia de coneos ia causa problemes ance, car coneos come la mesma pasto como pademelones. Plu, la vacui de areas per construi casas ia forsa la ualabis e cangarus - cual es plu grande - a areas en cual la pademelones ia flori per milenios.

Pademelones tasmanian ia es importante per la dieta de la tigre tasmanian (Thylacinus cynocephalus), e la pademelones es ancora comeda par cuoles, diablos tasmanian, e agilas. An con esta predores, multe pademelones flori en Tasmania e sua isolas prosima, e cada anio, multe es matada per restrinje sua cuantia.