Abri la menu xef
Un mapa topografial de Gine Nova; la divide entre este e ueste es a la latitude de 141ยบ, estra un devia peti a la Rio Fly

Gine Nova (engles: New Guinea, tok pisin: Niugini, indonesian: Papua) es un isola grande norde de Australia. Lo es la isola du en grandia en la mundo, pos Calalitnunat (Gronland), con un area de sirca 790 mil km2, e la isola la plu grande en la emisfera sude e oseania. La cuantia de popla aora es sirca 11 milion.

La parte la plu grande es a la dui este de la isola, la stato autonom de Papua Gine Nova. La dui ueste ia es manejada par Indonesia de 1962 e composa la provinses de Papua e Papua Ueste.

Jeolojial, lo es un parte de la mesma plato tetonica como Australia. Cuando la mares mundal ia es basa, la du ia comparti costas (cual aora es 100 a 140 metres su mar) e combinada con paises aora su mar ia composa la continente Sahul. La du masas de tera comparti ance un colie simil de animales, como marsupiales (pe ualabis e oposumes) e la monotremo, la ecidna.

Antropolojial, Gine Nova es videda como un parte de Melanesia. Umanas ia abita a la isola a min 40,000 anios ante aora, la migras la plu vea de umanas de Africa. La montanias ia es un sentro temprana e autonom de cultiva, con evidentes de iriga de a min 10,000 anios ante aora. La longia de tempo en cual umanas ia abita la isola, e la tereno multe fratida, ia resulta en un cuantia enorme de linguas: sirca un mil.

La migrantes du a Gine Nova ia es la popla austronesian. Orijinal de moderna Taiuan, los ia popla la Isolas de Pilipinas, Indonesia, e la isolas peti de polinesia.

La prima contata con europeanes ia es par la marinores e tradores de Portugal e Espania en la sentenio 16. La nederlandes ia prende la isola como un parte de Indonesia en 1828. Plu tarda en la sentenio 19, deutxes e engleses ia prende la parte este, ma en 1920, la este ia es pasada a Australia. La ueste ia resta como un colonia de Nederland, ma la Nasiones Unida ia pasada lo a la nasion nova de Indonesia pos sua revolui en 1963. En 1975, Australia ia dona autonomia a la este, cual ia deveni Papua Gine Nova.