Preistoria de Er

Er preistorial ia comensa con la indicas prima de umanas en Er sirca 10,500 aec, e fini con la comensa de la arcivo istorial de sirca 400 ec. Ambos de esta datos es plu tarda ca multe de Europa e tota de Asia sude-ueste. La periodo preistorial inclui la paleolitica, mesolitica, neolitica, eda de cupre, eda de bronze, e eda de fero de la sosias de Er. Per la plu de Europa, la arcivo istorial comensa cuando la romanes invade; car Er no ia es invadeda par la romanes, sua arcivos istorial ia comensa plu tarda, con la ariva de cristiania.

Newgrange, la tomba con pasajes la plu grande de Er neolitica, sirca 3200 aec

La porton a Newbrange, e la petra de entra

La du periodos cual ia dona a nos la restas la plu merveliosa es la neolitica, con sua tombas megalital, e la joalas de oro de la eda de bronze, cuando Er ia es un sentro major de mina de oro.

Er ave multe areas de pantan, e un cuantia grande de trovas arceolojial ia es de esta areas. La situa nonairobial a veses pote conserva materias organica multe bon, como la casos de corpos de pantan, un trapa de pexores de vim de la mesolitica, e un peso de stofa delicata con borlas de capeles de cavalos.

Glasia e la paleolitica

Mapa de Er en la eda glasial

En la glasia cuatronaria la plu resente, telones de glasa plu ca 3000 metres de spesia ia covre la tera de Er, polvinte rocas e osos, e eliminante tota mostras de vilas de la umanas temprana en la periodo calda de Glenavian; restas umana cual dati ante la glasia final ia es descovreda en la sude estrema de Britan, cual ia evita apena la avansa de la glasias.

En la Masima Glasial Final (sirca 26,000 - 19,000 anios a ante, Er ia es un tundra artica. La efetos de esta periodo sur Er ia es nomida la Glasia Jeneral Interna. Lo ia es crededa a ante ce en esta periodo, jelo ia covre du tris de Er. Indicas plu resente ia mostra ce esta no es vera, e sujesta ce la telon de jelo ia estende ultra la costa sude de Er.

En la periodo entre 17,500 e 12,000 anios a ante, un periodo plu calda, nomida la Bølling-Allerød, ia permete la reabita de areas de Europa norde par coliores-xasores nomada.

Indicas jenetica sujesta ce esta reocupa ia comensa en Europa sude-ueste, e restas de animales sujesta ce un refuja en Iberia esiste cual estende tan norde ca Frans. Spesies como renos e uros ia es entre la spesies cual ia es atraeda par la norde. Alga locas tan norde como Sveria cual ia es abitada plu temprana ca 10,000 anios a ante, sujesta ce umanas ia usa la finis de la glasias como loca de cual los ia xasa predas migrante.

La esiste de predas e la cambias de clima ia trae umanas a la borda de la zonas sin jelo la plu norde par la comensa de la olosene, e esta ia inclui rejiones prosima a Er. Ma la clima de Er mesma no ia es multe bonveninte per la plu de animales e plantas european, e abita par umanas no ia es probable, an si pexa ia es posible.

Britan e Er ia es posible liada par un ponte de tera, ma car esta lia ia ta es taliada par niveles de la mar levante tan temprana en la periodo calda, probable par 16,000 aec, poca plantas e animales ia ta crusi a Er. Serpentes e otra retiles no ia pote repopla Er car cualce ponte de tera ia desapare ante temperatures ia deveni sufisinte calda per los. Cuando la niveles de la mar ia redui e relia Britan e Europa, cual permane multe plu longa, probable asta sirca 5600 aec.

La umanas moderna la plu temprana en Er dati a la eda paleolitica tarda. Dati radiocarbonal de un oso de un urso cual ia es taliada ia dona un dato de sirca 10,500 aec.

Un loca brites a la costa este de la Mar Eres, datida a 11,000 aec, ia indica de persones ia es en la area ia come un dieta maral cual ia inclui crustaseos e moluscos. Esta umanas ia pote ance posible coloni Er par crusi de Cerno. Otra locas cual ofre crusis fasil e entre Er e Cimri sude, e entre Er e Scotland a moderna Kintyre. Esta popla ia pote trova poca recursos estra pexa per crustaseos e moluscos e colie cuercas, e donce ia abita la area temprana. La costa temprana de Er es aora cuasi tota su mar, donce la confirma de la esiste de poplas costal es perdeda.

La reveni de un clima multe fria en la periodo de la Drias plu joven, cual ia dura de 10,900 a 9700 aec, probable despopla Er. La nivel de la mar ia continua leva e no ponte entre Britan e Er ia redevelopa.

Mesolitica (8000–4000 aec)

Un campa de la xasores-coliores, de la mesolitica

Un casa de la cultivores prima, de la neolitica

La eda glasial final ia fini en Er sirca 8000 aec. La indica de abita par umanas la plu temprana pos la retrae de la jelo ia es datida a la mesolitica, sirca 7000 aec. An si la niveles de la mar ia es ancora plu basa ca oji, Er ia es probable ja un isola par la tempo cuando la colonistes prima ia ariva par barco de Britan. La abitantes la plu temprana ia es marinores ci ia depende per la plu de sua nesesadas de la mar, e an colonias plu interna no ia es tro distante de la acua.

Indicas per xasores-coliores de la mesolitica ia es trovada tra la isola: Un cuantia de escavas clavin es la loca de colonia a Monte Sandel en Contia Londonderry, la senis a la riva de la Rio Shannon en Contia Limerick, e la campa a Lough Boora en Contia Offaly.

La xasores-coliores de la mesolitica ia vive sur un dieta variada de comedas de mar, avias, porcos savaje, e nozetas. On ave no indicas de servos en la mesolitica eres, e lo es probable ce la servos roja prima ia es introduida en la fases temprana de la neolitica. La popla ia xasa con lansas, arcos e flexas, e arpones, puntida con lamas peti de petra nomida microlitos, e aumenta sua dieta con nozas, frutas, e bacas. Los ia abita en campas saisonal, cual los ia construi par estende peles de animales o palia supra strutures de lenio. Los ia usa ximinerias estra casa per coce sua comedas. En la mesolitica, la cuantia de persones en Er ia es probable no plu ca alga miles. fabricadas survivente inclui lamas e puntos de microlitos peti, e utiles e armas de petra plu grande, e spesial la flocos multiusal de Bann (pesos grande sin multe refina).

Neolitica (4000–2500 aec)

Multe areas de Europa ia entra la eda neolitica con un "paco" de sereal de varias elejeda, animales domada (boves, capras, e oveas), vasos, tecnicas de texe, construi de casas, e cultures de entera, cual ia ariva simultan, comensante en Europa sentral como la cultur de vasos de bandas (LBK) sirca 6000 aec. En alga sentos de anios, esta cultur es videda en Frans norde. Un otra cultur neolitica, la cultur La Hoguette, ia ariva en Frans norde-ueste, e pare como un derivada de la cultur cardial de Iberia e Italia. Esta cultur ia eleva oveas e capras plu intensa. Per 5100 aec, on ave indicas de la usa de lete de bove en England sude, e boves simil a los de England oji ia comensa apare, de los cual ia es domada orijinal en la rejion de la Mar Ejean plu temprana. Esta animales ia es probable derivada de la boves de LBK. Sirca 4300 aec, boves ia ariva en Er norde en la mesolitica tarda. La servos roja ia es ance introduida a esta tempo.

Restas de esta paco neolitica en Er inclui la sereales, construidas (simil a los en Scotland), e monumentos de petra ia es trovada. La indicas clar de la esiste de neolitica cultivores en Er es a la Penisola Dingle, como osos de boves, un dente de un ovea, e un cotel de silica datida a 4350 aec. En Contia Mayo, un sistem de campos neolitica estendosa ia es conservada su un covre de pantan - un de la plu vea en la mundo. Composada de campos peti separada par mures de petras, la Campos Ceide ia es cultivada per alga sentenios entre 3500 e 3000 aec. Trigo e orzo ia es la sereales prinsipe. Vasos ia apare sirca esta periodo de cultiva ance, tipal simil a los trovada en Britan norde, apare en la mesma periodo en Ulster e Limerick. Tipal de esta vasos ia es boles con bocas larga e basas ronda.

Alga rejiones de Er ia mostra motifes de pastoria cual ia indica ce alga popla neolitica ia continua move, e ce ativias pastoral ia domina ativias cultival en multe rejiones, o ce on ave un divide de labora entre la du aspetas de la neolitica. A la culmina de la neolitica, la cuantia de persones de la isola ia es probable plu ca 100,000, e posible tan alta como 200,000. Ma lo pare ce un colasa de la economia de la isola ia aveni sirca 2500 aec, e la cuantia de persones ia declina per un periodo.

Monumentos

Un tomba con patio a Creevykee en Contia Sligo

Knowth, un tomba con pasaje a Brú na Bóinne

La dolmen Poulnabrone, un tomba con porton a la Burren

Un tomba cuneo a Glantane este

La cualia la plu stonante de la neolitica en Er ia es la apare subita e sperde dramosa de la monumentos megalital. La plu grande de esta tombas ia es clar locas de importa relijiosa e ritual per la popla. En la plu de la tombas cual ia es escavada, restas umana es trovada, plu comun (ma no tota) senida. Benes funeral - puntos de flexas, vasos, perletas, pendentes, axas, etc - ia es ance descovreda. Esta tombas megalital, plu ca 1200 de cual ia es aora conoseda, pote es divideda entre cuatro grupos larga, tota de cual ia es orijinal covreda con tera, ca en multe casos ia es erodeda a via per revela strutures de petra multe impresante:

Monumentos con patios per entra: Los es trovada cuasi tota en la norde de la isola, e es crededa como inclui la esemplos la plu vea. Mayo norde ave multe de esta tipos de megalitos - Faulagh, Kilcommon, Erris.

Tombas con pasajes: Estas es la grupo la plu peti en cuantia, ma los es la plu impresante en grandia e importa. Los es ance trovada tra Europa, e en Er es distribuida xef tra la norde e este, spesial en la cuatro semeteros grande neolitica de Contia Meath e Contia Sligo. La plu famosa es Newgrange, un de la plu vea monumentos astronomial aliniada en la mundo. Lo ia es construida sirca 3200 aec. A la solstisio de inverno, la raios prima de la sol levante brilia tra un caxa de lus supra la entra a la tomba e lumina la camera de entera a la sentro de la monumento. Un otra de la megalitos de Boyne, Knowth, ia es crededa como conteni la mapa la plu vea de la luna, siselida en petra.

Tombas con portones: Esta tombas inclui la dolmenes plu bon reconoseda. Los es composada de tre o plu petras vertical suportante un petra ultima orizonal. Los ia es orijinal covreda con tera per formi un tumulo, ma comun, sua covre ia es aora erodeda, cual revela un strutur de petra multe impresante. La plu de los es trovada en du consentras, a la sude-ueste de la isola e a la norde. Du en Contia Waterford es esemplos spesial.

Tombas cuneo: La plu grande e plu sperdeda de la cuatro grupos, la tombas cuneo es spesial comun en la ueste e sude-ueste. Contia Clare es spesial rica con los. Los es la tipos la plu tarda e parteni a la fini de la neolitica. Los deriva sua nom de la cameras de entera en la forma de cuneos.

Fabricadas portable

La axa de petra ia es la util xef e esensal per cultiveria, fabricada curante en un varia de stilo, e comun briliada. La produidas de la fabricerias de axas prosima a fontes de porselanita, un petra spesial bon, ia es intercambiada tra Er. La locas major ia es en Contia Antrim. On ave ance importas de Britan, incluinte la produidas de la industria de axas en Langdale, de la Distrito de Lagos (Britan).

On ave un clase plu rara de axas importada per sua prestijia, fabricada de jadeita de Italia norde. Estas pote es intercambiada lente tra Europa per ateni Er tra un periodo de sentenios, e mostra no indicas de usa. Axas miniatur, tro peti per usa, ia es ance fabricada. Un esemplo ave un fora per un corda, e es posible portada como joalas o como un joalas majiosa. Otra utiles de petra ia es siseles, axias, rompetestas, e puntos per lansas. Los pote ance es trovada un formas miniatur.

Perletas perforada e pendentes ia es trovada, e du colaretas de concas, es fabricada con multe cura, con concas de litorinas. Estas es trovada sur la corpos de du omes. Como un esemplo de la conserva estrema de la pantanes, parte de un saco, delicata texeda, con manicos sirculo, ia survive. Lo ia es fabricada de materia de cana, enrolada sirca bandas magra de lenio. Vasos decorada, probable fabricada per usa funeral, pare atenta imita la desinias de sestos.

Edas de cupre e bronze (2500–500 aec)

Un lunula de Blessington, 2400-2000 BC

Fisadores de vestes e un torce de oro, e un colareta de ambar, eda de bronze

Un covrecolo de oro de Gleninsheen

Un braseleta de Castlederg, eda de bronze

Un fisador de Clones en Contia Monaghan, 800-700 aec

Un model de un barcon, de la cumula de Broighter, Dublin, sirca 100 aec

Metalurjia ia ariva en Er con un popla nova, jeneral conoseda como la popla de la cultur de vasos campanin, nomida per sua vasos, cual ave la forma de un campania inversada. Esta ia es multe diferente de la vasos con un basa ronda. Lo es trovada, per esemplo, a Isola Ross, e es asosiada con la mina de cupre ala, cual ia comensa a min en 2400 aec. La rexercores no acorda sirca cuando la parlores de la lingua celta ia ariva prima en Er, ma alga crede ce los es la popla de esta cultur. Otras crede de la celtas ia ariva en la comensa de la eda de fero.

La eda de bronze ia comensa cuando cupre ia es aliada con stanio per produi fabricadas vera bronze, e esta ia aveni sirca 2000 aec cuando alga axas plata (de la tipo Ballybeg) e otra cosas de bronze ia es produida. La stanio ia debe es importada, tipal de Cuerno. En la periodo ante esta, en cual la plu de la axas plata ia es produida, es conoseda como la eda de cupre, comensante sirca 2500 aec.

Bronze ia es usada per la fabrica de armas e utiles. Spadas, axas, dagas, axetas, alabardas, alenas, copas, e trompas ia es alga de la cosas trovada a locas de la eda de bronze. Artisanes eres ia es spesial notada per la trompas, cual ia es fabricada par la prosede de sira perdeda.

La cupre usada en la fabrica de bronze ia es minada en Er, xef en la sude-ueste de la isola, e la stanio ia es importada de Cerno en Britan. La mineria la plu vea conoseda ia es a Isola Ross, cual ia opera entre 2400 e 1800 aec. Un otra mineria bon conservada ia es descovreda a Monte Gabriel en Contia Cork, cual ia opera per alga sentenios en la media de la milenio du aec. La minerias en Cork e Kerry ia produi tan multe como 370 tones de cupre en la eda de bronze.

Er ia es ance rica en oro nativa, e la eda de bronze ia ave la fabrica estendente prima de esta metal cara par artisanes eres. Plu cumulas de oro de la eda de bronze ia es descovreda en Er ca cualce otra loca en Europa. Ornas de oro eres ia es trovada tan distante como Deutxland e Scandinavia, e comersia relatada a oro ia es posible un fator major en la economia de Er en esta eda.

En la periodos temprana de la eda de bronze, la ornas de oro ia inclui lunetas simple ma delicata decorada, un tipo spesial eres, e plu tarda ance fabricada en Britan e Europa continental, e discos de folia magra de oro. Multe de estas pare es en usa per un tempo longa ante es deponeda. Plu tarda, la torce, magra e torseda, ia apare; esta ia es un colareta composada de un bara o banda de metal, torseda a un spiral. Otra tipos de joalas de oro fabricada en Er (e en Britan) ia inclui orealetas, discos de sol, brasaletas, fisantes per vestes, e en la eda de bronze tarda, la covrecolos grande e joalas majiosa sferin. Pos la eda de bronze, ojetos de oro sesa es produida en Er. Posible, la depones de oro en Er ia deveni consumada.

Construi de tombas cuneo ia diminui de sirca 2200 aec, e an si la tradision pasada de monumentos grande ia es multe reduida, la monumentos esistente ia continua es usada per rituos. A la fini de la eda de bronze, la caxones funeral ia apare. Los es composada de un caxa de petra, peti e retangulo, covreda con un bloco e enterada un distantia corte su la surfas. La corpo ia pote es senida, o no. Vasos decorada acompania frecuente la restas, e plu tarda la restas senida ia es poneda en la vaso, cual es inversada. Un cuantia de sirculos de petra ia es erijeda ance a esta tempo, xef en Ulster e Munster.

La eda de bronze es suposada la tempo en cual la plu de la construis fortida nomida cranoges en Er ia comensa, an si multe locas pare es usada, continuante o a veses, tra longa periodos, an a la eda medieval. Estas es casas de lenio construida en lagos basa per securia, comun con un paseria magra a la riva. Alga ia usa e estende isoletas natural, e la plu grande probable es abituada multe familias e sua animales.

La cumula grande de Dowris, orijinal de plu ca 200 cosas, la plu de bronze, ia dona sua nom a la periodo Dowris, la nom per la fase final de la eda de bronze de Er, sirca 900-600 aec. Con 48 esemplos, la cumula ia conteni cuasi tota de la crotales, clicadores en la forma de un testiculo de un bove, e 24 trompas, armas, e vasos. La "onca de carne" de Dunaverney (sirca 1050-900 aec), un strumento longa per tira pesos de carne de un calderon grande de ragu, sujesta ce bancetas grande de la elites ia es importante, e refleta influe de Europa. Calderones multe grande de bronze rebitida ia es ance fabricada. Cuantias grande de armas de bronze ia es produida, e formas tipal de spadas ia cambia de cortas per dagi e puxa sur pede, a longas, posible per un geror sur cavalo.

En la eda de bronze, la clima de Er ia dejenera, e desforesti estendeda ia aveni. La cuantia de persones en Er a la fini de la eda ia es probable plu ca 100,000 o tan alta como 200,000. Lo es posible no plu grande ca cuando a la culmina de la eda neolitica. La eda de bronze en Er ia dura asta 500 aec, plu tarda ca en Britan e Europa continental.

Eda de fero (500 aec – 400 ec)

Un model de un fortres sirculo de 100 BC

Un mapa de la tribus de Er, seguente Ptolemia

La eda de fero eres ia comensa sirca 500 aec e alora continua asta la eda de cristiania en Er, cual trae alga arcivos scriveda e alora marca la fini de Er preistorial. Ma alga dati radiocarbonal resente de la ase de lenio de un punto de fero trovada en la Rio Inny, dona un dato de entre 811 e 673 aec. Esta pote erode la crede, ancora tenida par alga, ce la ariva de fero ia marca la comensa de la ariva de la celtas a la isola.

A la otra lado, multe teni la vista ce esta ia aveni con la popla de la cultur de vasos campanin, probable parlante un lingua indoeuropean, ia ateni Er en la eda plu temprana de bronze. La linguas celta de Britan e Er es tipal divideda entre du: Goidelica e Britonica. La arcivos scriveda en celta ia apare en la sentenio sinco, en la forma de eres primitiva en Er, e en la forma de britonica comun en Britan.

La eda de fero inclui la periodo en cual la romanes ia rena la parte la plu grande de Britan. La interesa cual la romanes ia ave en la area, incluinte Er, ia resulta en la scrives plu temprana sur Er. La nomes de sua tribus ia es arcivida par la jeografiste Ptolemia en la sentenio du ec.

La tribus de Er ia inclui a min tre con nomes la mesma como o simil a tribus brites o galo: la brigantes (ance la nom de la tribu la plu grande en Britan norde e media), la manapii (posible la mesma como la menapii, un tribu beljes de Galia norde), e la coriondi (un nom simila lo de corinion, de Britan norde).

Asta sirca 150 aec, on ave multe trovas cual mostra la influe de stilos de Europa continental e alga importas direta. Pos acel dato, relatas con stilos brites domina, posible refletante alga move de poplas.

Esemplos de Er de la eda de fero de la stilo de la cultur La Tene es rara, cual es alga confusante. Estas es pos cuando arte celta en otra partes de Europa, incluinte Britan, ia es ja incluida en arte galo-roman e simil. An tal, lo ia es en Er ce acel stilo ia pare revive en la periodo cristian temprana, per formi la arte de la libro de Kells e otra obras mestral, posible influeda par la stilos roman tarda e brites pos roman. La cumula de oro de Broighter, de Ulster, de la sentenio prima aec, ia inclui un model de un barco peti, un torce grande con decoras relevada en un stilo clasica, e otra joalas de oro probable importada de la mundo roman, posible tan distante como Alesandria.

Lo es posible ce la capo de Drumanagh, prosima a Dublin, ia es un sentro per comersia con Britan roman. Lo es un esemplo de un fortres promontania cual usa la presipes, con un "colo" magra, per redui la estende de forti nesesada. En Er, estas pare es xef un marca de la eda de fero, con algas posible datinte a la eda de bronze, e continuante es usada en la eda medieval temprana. La plu de esta fortreses dati de la periodo istorial, ma alga de la sirca 60,000 de fortreses anelo en Er dati a retro a la eda de fero tarda. Estas varia multe en grandia, de abitadas per un familia e sua sclavos e un ensirca per animales, a algas multe plu grande cual ia ave clar un sinifia political e militar.

On ave alga fortreses anelo en la compleso sur la colina de Tara, cual pare ave sua orijinas en la eda de fero tarda, an si la loca inclui ance un entera con pasaje de la neolitica e otra tombas plu temprana, Esta es un de un cuantia de locas major liada en leteratur e mitolojia plu tarda con res, e probable ia ave un sinifia ritual e relijiosa, cual no pote es clarida aora. La fortres Navan, un otra loca sur un colina, ia ave un construida sirculo multe grande construida en sirca 100 aec. Lo ia es 40 metres diagonal, con 275 palos de arbores en anelos. La plu grande ia es la palo sentral, un arbor cortida sirca 95 aec. En un sola sentenio seguente, la tota construida ia es destruida en un modo ritual. Otra construis grande, cual nesesa multe organiza sosial, inclui murones de tera, probable per indica bordas e ata como blocos contra atacas per boves, e la vias de lenios tra areas de pantan, incluinte la via a Corlea, datida a 148-147 aec, e sirca un km longa e tre metres larga.

La eda de fero tarda ia vide cambias grande en ativia umana. Esta "eda oscur eres" ia es un periodo de stania economial e cultural, durante de 100 aec a 300 ec. La sentenios 3 e 4 ia vide recovre rapida. Lo ia es posible ce la recovre ia es liada a la "eda orosa" de Britan roman en sentenios 3 e 4. Esta es ance la tempo en cual alga arcivos ia comensa apare. Leteratur eres no ia es scriveda asta multe plu tarda, ma multe rexercores ia es preparada per aseta ce la sicles ia es conservada en alga forma la elementos de multe plu temprana, e dona alga comprende de la mundo de la elites final de Er preistorial.

Corpos de la pantanes

La corpo de la om de Clonycavan, conservada par la pantan

La areas grande de pantan en Er ia produi plu ca 10 corpos antica, la plu de la eda de fero. Algas ia es trovada e reenterada ante rexerca arceolojial e siensal ia es posible. Algas ia survive sola como sceletos. Ma la esemplos la plu bon conservada ia reteni la pel, capeles, e vestes completa. La plu vea es la om de Stoneyisland de la neolitica, posible la vitim de un asidente en un barceta sirca 3320-3220 aec. La om de Cashel ia es matada sirca 2500-2000 aec en la eda de bronze temprana, e es un mata posible ritual. Eruditas pensa aora ce estas ia es res deponeda sacrifiada pos un fali en sua rena, posible pos falis de la colies. Du esemplos de la eda de fero, ambos de sira 400 a 175 aec, pare es vitimes elite de matas ritual. Otra corpos pare es simple enteras normal.