Sclerose multiple

Sclerose multiple es un maladia desmielininte en cual la covre insulinte de neurones en la serebro e la medula spinal es danada. Esta dana disturba la capasia de partes de la sistem de nervos per comunica, resultante en un estende de sinias e sintomes, incluinte problemes fisica e mental. Sintomes pote inclui diplopia, sieca en un oio, debilia de musculos, problemes con sensa, e problemes con coordina. Lo ave formas variante, con sintomes nova aveninte en atacas isolada ("recorente") o crese tra tempo ("progresante"). Entre atacas, sintomes pote desapare intera; ma problemes neurolojial pote permane, spesial cuando la maladia avansa.

La progresa de sclerose multiple en la serebro; de alta sinistra: neuron, selulas de imunia, mielin sana, mielin destruida par la selulas de imunia

An si la causa no es clar, la mecanisme es probable la destrui par la sistem de imunia o la fali de la selulas cual produi mielin. Causas sujesteda inclui jenetica e fatores ambiente como infeta par viruses. Sclerose multiple es plu comun diagnoseda de la sinias e sintomes presente e la resultas de otra esaminas medical.

No remedia es conoseda per sclerose multiple. Tratas atenta boni funsiona pos un ataca e preveni atacas nova. Medisines usada per trata la maladia, an si cuasi efetosa, pote ave efetos ladal e no es fasil tolerada. Terapia fisical pote aida funsiona. Algas atenta usa tratas alternativa, ma la evidentes de benefia es mancante. La resultas tra tempo longa es difisil per previde, ma resultas bon aveni plu comun en femes, los ci developa la maladia temprana en vive, los con la tipo recorente, e los ci esperia poca atacas a la comensa. Espeta de vive es, a promedia, sinco a des anios min ca los sin la maladia.

Sclerose multiple es la disturba la plu comun de imunia cual afeta la sistem de nervos sentral. En 2015, sirca 2.3 milion persones ia es global afetada, con frecuentias multe variante en rejiones diferente e entre poplas diferente. En 2015, sirca 18,900 persones ia mori de la maladia, un crese de 12,000 de 1990. La maladia comensa tipal entre edas de 20 e 50 anios e es du veses plu comun en femes ca omes. Lo ia es prima descriveda en 1868 par Jean-Martin Charcot. La nom "sclerose multiple" refere a la sicatrises ("scleras") cual developa sur la materia blanca de la serebro e medula spinal. Un cuantia de tratas e metodos de diagnose nova es en developa.