Abri la menu xef


En filosofia, secularisme interprete vive sur prinsipes prendeda sola de la mundo material, sin depende de relijio. En politica, secularisme es la prinsipe de separa de instituis de governa e persones cargada con la representa de la stato de instituis e ofisiales relijial. Un mostra de secularisme es la capas de declara la direto per es libre de la rena o dogma de relijio, o, en un stato cual declara se como neutra sur cosas de crede, de la imposa de relijio o praticas relijiosa sur la popla par la governa. Un otra mostra es la crede ce ativias e desides publica, spesial political, no debe es influeda par credes o praticas relijiosa.

Secularisme ave sua radises inteletal en filosofistes elinica e roman como Zeno de Sitia, Epicteto, Seneca, e Marco Aurelio; erudites de la eda de Lumina como Erasmo, Baruch Spinoza, John Locke, Denis Diderot, Voltaire, James Madison, Thomas Jefferson, e Thomas Paine; e scrivores moderne como Robert Ingersoll, Bertrand Russell, e Christopher Hitchens. Lo move la foca de relijio a otra cosas de la mundo natural e umana, con asentua sur natur, razona, siensa, e developa.

La intendes e razonas suportante secularisme varia vasta. En Europa, laïcité (franses per secularisme) es videda como un move a moderni e a via de valuas tradisional e relijial. Esta tipo de secularisme, sosial o filosofial, ia aveni comun an si la stato suporta un ofisial eglesa o otra suporta de relijio. En la SUA, algas sujestes ce secularisme ia es usada plu per proteje relijio e la relijiosa de interfere governal, cuando secularisme en la sinifia sosial es min comun.