Senegal

Senegal
Informa jeneral
Capital:	Dakar
Lingua ofisial:	Franses
Dirije
Governa:	Republica semipresidental
- Xef de stato:	Macky Sall
- Xef de governa:	Mohammed Dionne
Otras
Area:	196 712 km²
Popla:	15 589 485 (2016)
Densia:	68.7/km²
PIB:
Mone:	CFA franc
Zona de ora:	GMT (UTC+0)
Numero de telefon:	+221
Interede:	.sn

Senegal (en franses: Sénégal), ofisial nomida la Republica de Senegal (en franses: République du Sénégal [ʁepyblik dy seneɡal]), es un pais en Africa ueste. Senegal es bordada par Muritania en la norde, Mali en la este, Gine en la sude-este, e Gine-Bisau en la sude-ueste. Senegal borda ance Gambia, un pais cual ocupa un ageta de tera longo la riva de la Rio Gambia, cual separa la rejion sude Cascamance de Senegal de la resta de la pais. Senegal ave ance un borda maral con Capo Verde. La capital economial e political de Senegal es Dakar. Lo es la pais la plu ueste en la continente de Afro-Eurasia, e deriva sua nom de la Rio Senegal, cual borda lo en la este e norde. La nom "Senegal" veni de la parola uolof "Sunuu Gaal", cual sinifia "nosa barco". La area de Senegal es sirca 196 190 cilometres cuadrida. La cuantia de popla, en la anio 2007, ia es sirca 12 521 851 persones, de cual la etnico uolof es sirca 40%. La clima es seca, ma lo ave un saison pluvosa.

La linguas major es franses (ofisial), uolof, pular, jola, e mandinca.

Etimolojia

Senegal es nomida per la Rio Senegal, la etimolojia de cual no es serta. Un teoria popular (proposada par David Boilat en 1853) es ce lo es derivada de la frase uolof sunu gaal, cual sinifia "nosa canoa" (o piroge), cual ia resulta de un malcomunica entre marinores portuges de la sentenio 15 e pexores uolof. La teoria de "nosa canoa" ia es popular abrasada en Senegal moderna per sua encantia.

Istoristes moderna crede ce la nom refere probable a la sanhadjas, berberes ci ia abita la lado norde de la rio. Un teoria competente es ce lo es derivada de nom de la vila medieval de "Sanghana" (ance speleda "Isenghan", "Asengan" o "Singhanah"), cual la jeografiste arabi al-Bakri ia descrive en 1068 como locada a la boca de la rio. Alga persones serer de la sude crede ce la nom de la rio es derivada de la parola composada de la parola serer Sene (de Roge Sene, la diva suprema en la relijio serer) e O Gal (cual sinifia "corpo de acua").