Sipres
Sipres es la nom comun de la familia de coniferes Cupressaceae, con un distribui tra la mundo. La familia inclui 27-30 jenera cual inclui la juniperes e secuoia, con sirca 130-140 spesies en tota. La cortex de arbores matur es comun brun oranjin o brun rojin e de un trama cordetin, frecuente despelinte o descascinte en bandas vertical, ma en alga spesies lisa, scamosa, o fratinte en cuadros.
Sipreses es trovada en tota continentes estra Antartica, de 71ºN en Noria artica a 55ºS en Txile sude. La juniperes indica ateni 5200 m supra mar en Tibet, la plu alta de cualce planta leniosa. Los no es comun en ambientes polal, en forestas pluvosa tropical, e en desertos. Ma, an si los es distribuida vasta, multe spesies ave estendes descresente, e multe es menasada par estingui.
Multe spesies de sipres es importante per la produi de lenio per fabrica casas e mobilas. Otras es ance importante en orticultur. Juniperes es arboretas importante, con multe varias. Chamaecyparis e Thuja (tuia) furni ance multe varias nanin e ornosa. Secuoias es ance usada per jardines per sua fortia, crese rapida, e fama como un "fosil vivente".
La sugi (Cryptomeria japonica) es la arbor nasional de Japan, e la aheuheute o sipres calva (Taxodium mucronatum) la arbor nasional de Mexico. Du spesies de secuoia es la arbor de la stato de California e es atraes per turistes, spesial en la parces famosa. La sipres calva (Taxodium) es la arbor de Louisiana. Estas, comun garlandida con mos espaniol, en pantanes de la sude de SUA es un otra atrae per turistes, spesial en Florida.
La polen de multe jenera de sipreses es alerjen, causante multe problemes en areas do los es abundante, notable par la sugis de Japan
La familia de sipreses es divideda entre sete sufamilias, fundida sur analise jenetica e morfolojial:
- Cunninghamioideae, plu comun en Xina
- Taiwanioideae de Taiuan
- Athrotaxidoideae de Tasmania
- Sequoioideae incluinte la secuoia jigante
- Taxodioideae incluinte la sipres calva e la sugi
- Callitroideae incluinte la sipres-pino e la alerce de America Sude
- Cupressoideae incluinte la tuia e la juniper