Spondilo
Spondilo es un jenera de bivalvo, la sola jenera en la familia Spondilide. La multe spesies varia multe en aspeta e estende. Los es grupida en la mesma suprafamilia como la petenes. Los no es prosima relatada a ostras, ma comparti alga abituas, como sementi se a rocas en loca de fisa se par sua biso.
La du duis de sua conca es juntada con un xarnier de la tipo bal-e-orbita, en loca de un xarnier dentida, como en la plu de bivalvos. Los reteni ance la "oreas" longo la linia de la xarnier, comun en petenes ma no en ostras.
Como tota petenes, spondilos ave oios multiple sirca la bordas de sua concas, e ave sistemes de nervos bon developada. Sua ganglios de nervos es consentrada en la rejion viseral, con lobos otical reconosable liada a la oios.
La jenera de spondilo ia apare en la eda mezozoica e es videda en la arcivos de fosiles de la letos triasica en Italia (235 a 323 milion anios a ante e pos. Sirca 40 spesies estinguida es conoseda. Los es trovada como fosiles tra la tota mundo. Los es presente en rocas cretasean en Texas e Columbia Brites, e en otra partes de America Norde ance. Aora, on pote trova spondilos en tota mares sutropical e (plu comun) tropical, xef prosima a la costas.
Sponilos adulte come par filtre cual abita sementida a un sustrato. Los es protejeda par spinos e un strato de epibios e, como ostras, pote produi perlas. La tipo de sustrato varia par spesies: multe fisa se sola a coral, e la diversia la plu grande de spesies es trovada en resifes tropical de coral; otras ia ajusta se a strutures artifisial e ia deveni un spesies invadente importante; e plu otras es trovada fisada a otra concas.
Usos edita
Trovas arceolojial indica ce la popla de Europa neolitica ia intercambia la concas de spondilo per fabrica ornas e joalas tra la plu de la periodo neolitica, spesial entre 5300 a 4200 aec. La concas ia es colieda de la mar Ejeo e ia es transportada a la media de la continente. En la culture de LBK e de Lengiel, los ia es usada per crea brasaletas e fibias; plu tarde, los ia prefere perletas barilin; e en la neolitca tarde, los ia prefere perletas plata e discin e plu peti, e ia es incluida en la tombas de femes e enfantes.
Spondilos ia es ance trovada de la costa de Colombia e Ecuador, e ia es importante per la popla de la Andes de la eda ante-ispanica. Los ia es usada como mone e como ofres a la Pachamama, la diva matrin de fertilia. Como en Europa, la concas ia es trovada a distantias grande, car la popla ante-ispanica ia intercambia los con popla tan distante como Mexico a norde e la Andes sentral a sude. La popla Motxe de Peru antica ia crede ce la mar e animales ia es santa; los ia usa concas de spondilos en sua arte e depinta spondilos en sua vasos. Spondilos ia es ance colieda de la golfo California e intercambiada a tribus de Mexico e la sude-ueste american.
An oji, on ave coliores de concas de spondilo, e un mercato comersial esiste per los. Plu, alga spesies es usada en acuerias de acua sal. La spondilo limbato ia es molida per mortero en America sentral. Alga spesies mediteraneo es comable e, spesial spondilo gederopo, es comeda en Sardinia. Ma la spesies tropical tende acumula un neurotosina (decarbamoylsaxitoxina), produida par dinoflajelatos en plancton.