Tuatara
La tuataras es retiles endemica a Zeland Nova. An si los sembla la plu de lezardos, los es un parte de un linia distinguida, la ordina rincosefalia. Sua nom deriva de la lingua maori e sinifia "culminas sur la dorso". La spesies singular de tuatara es la sola membro survivente de sua ordina, cual ia flori sirca 240 milion anios a ante. Sua asendente comun la plu resente con cualce otra grupo es con la scuamatos (lezardos e serpentes). Per esta razona, tuatara es interesante en la studia de evolui de lezardos e serpentes, e per la reconstrui de la apare e abituas de la diapsidos la plu temprana, un grupo de tetrapodos amnial cual inclui ance dinosauros, avias, e crocodilios.
Tuataras es brun verdin e gris, e mesura 80 cm de testa a fini de coda, e pesa asta 1.3 kg. Los ave un cresta spinosa, spesial protendente en la mases. Los ave du linias de dentes en la mandibula alta cual suprapone un linia en la mandibula basa, un ordina unica en spesies vivente. Los es ance strana per sua oio protendente fotosensante, la oio tre, cual es posible envolveda en la coordina de siclos dial e saisonal. Los pote oia, an si no orea esterna esiste, e ave cualias unica en sua sceleto, algas de cual posible retenida de sua evolui de pexes. Tuatara es a veses nomida "fosiles vivente", cual ia jeneral debate siensal. Cuando mapante sua jenom, rexercores ia descovre ce la spesies ave entre 5 e 6 bilion bases duple de la segues de ADN, cuasi du veses lo de umanas.
La tuatara (sfenodon punctato) ia es protejeda par lege de 1895. Un spesies du, la tuatara de la Isola Brothers (sfenodon gunteri) ia es reconoseda en 1989, ma de 2009, lo ia es clasida como un suspesie (sfenodon punctato gunteri). Tuataras, como multe de la animales nativa de Zeland Nova, es menasada par la perde de abitada e la introdui de xasores como la rata polinesian (rato exulans). Tuatara ia es estinguida a la tera xef, con poplas restante restrinjeda a 32 isolas de costa, asta la relasa prima a la Isola Norde de Zeland Nova en la Refujeria Karori forte sercida en 2005.
En labora costumal de manteni a la refujeria en 2008 tarda, un nido de tuatara ia es descovreda, con un enfante nova trovada la autono seguente. Esta es posible la caso prima de tuataras reproduinte en la tera savaje a la Isola Norde en plu ca 200 anios.