Africa susaharan es la area de la continente de Africa cual es sude de la deserto Sahara. Lo contrasta con Africa norde, cual es xef un parte de la mundo muslim e arabi. An si Africa susaharan ia es serta influeda par esta mesma cultures, lo conteni un varia enorme de etnicos, con diferente linguas, tradisiones, etc, e adere plu comun a cristiania o relijios tribal.

Mapa de Africa, con distingui entre la norde e la susaharan
La familias de linguas de Africa
Zonas de clima

La usa de la terma "Africa susaharan" ia es criticada, car lo sujesta ce la rejion e sua popla es en alga modo primitiva o an inferior. La sentenios de sclavia, opresa, e colonialisme ia divide Africa de la perspetiva de europeanes, e no de sua abitantes.

La arcivo arceolojial mostra ce umanas ia abita Africa sude e este de a min 100,000 o 150,000 anios a ante. Entre 50,000 e 60,000 anios a ante, sua estende estra Africa ia comensa la coloni de la planeta par umanas moderna. Per 10,000 aec, umanas ia sperde a cuasi tota areas de la mundo. Esta estende de nosa spesies es suportada par studias de linguas, cultures, e jenetica.

LinguasEdita

Africa susaharan conteni plu ca 1000 linguas, o prosima un sesi de la tota linguas en la mundo. Cuatro familias grande de linguas es representada:

La linguas afroasiatica inclui linguas plu norde, como egipte antica, ivri, e arabi. La ramo txadica es distribuida en Africa sentral e ueste. Hausa, la membro la plu grande, servi como un lingua franca en Africa ueste (Nijer, Gana, Togo, Benin, Camerun, e Txad).

Un familia multe vea (ma aora peti) es la linguas coisan. Los es probable orijinal a Africa sude, e inclui la coicoi e la san. Los vive en modos simple en areas seca, incluinte desertos de Sudafrica.

La familia de linguas nijer-congo es la plu grande en la mundo per cuantia de linguas (1436). Lo conteni la ramo major de linguas bantu, cual covre plu teritorio ca la resta de la familia combinada. Parlores de linguas bantu representa la majoria de abitantes de Africa sude, sentral, e sude-este.

La linguas nilosaharan es trovada en la partes alta de la Rio Txari e Rio Nilo de Africa sentral e sude-este. Los es xef parlada par popla nilotica e ance en Sudan par la popla fur, masalit, nubian, e zagaua.

JeneticaEdita

Analise de jenomes completa de poplas moderna ci abita Africa susaharan ia indica a min cuatro grupos: Un es portada par la pigmeos mbuti e biaca de Africa sentral; un otra es portada xef par la popla ci parla linguas coisan en Africa sude; la grupo la plu grande es liada a la popla ci parla la linguas nijer-congo; un grupo es portada par la popla ci parla la linguas nilosaharan en la vale de la Nilo e la Lagos Grande de Africa; e un plu grupo ia es trovada entre la poplas ci parla la linguas afro-asiatica en la Corno de Africa e la vale de la Nilo. Natural, esta grupos ia misca tra multe miles de anios, e ia reseta contribuis plu resente par otra grupos de estra Africa, como de India e Europa.

Probable de 3500 aec, la rejiones saharan e susaharan de Africa ia es separada par la clima estrema de la Deserto Saharan, cual formi un parador efetosa, interompeda sola par la Nilo en Sudan. La teoria la plu comun es ce la Sahara ia ata como un "pompa", forsante plantas e animales (incluinte umanas) per departe de Africa e penetra Asia sude-ueste e ultra.

Rejiones ecolojialEdita

Africa susaharan ave un varia de zonas de clima e ambiente:

La Sahel estende tra tota Africa a un latitude de sirca 10º a 15º norde. Paises cual conteni partes de la Deserto Saharan en sua teritorios norde comun inclui la Sahel en sua rejiones sude: Muritania, Mali, Nijer, Txad, e Sudan. La Sahel ave un clima calda e semi-seca.

Sude de la Sahel, un banda de savana estende de la Mar Atlantica a la montanias de Itiopia. Rejiones plu umida de foresta-savana como Gine e la Congo es locida entre la savana e la forestas ecuatoral.

La Corno de Africa inclui un clima calda de deserto longo la costa, ma un calda semi-seca plu interna, contrastante con la savana e la forestas moiada de la montanias de Itiopia.

Africa tropical inclui la forestas tropical pluvosa estende longo la costa sude de Africa ueste, e tra la plu de Africa sentral ueste de la Lagos Grande de Africa.

En Africa este, bosces, savanas, e planos pote es trovada en la zona ecuatoral, incluinte la ecosistem de Serengeti en Tanzania e Cenia.

Forestas e savanas de la montanias de Africa es trovada en la montes e cadenas alta de Africa este, de la montanias de Itiopia a Sudafrica.

Sude de la forestas ecuatoral, la rejiones de foresta-savana de la Congo ueste e sude es zonas de cambia entre la forestas tropical e la banda de bosces de miombo cual estende de Angola a Mosambic e Tanzania.

La desertos Namib e Calahari es en Africa sude-ueste, e es ensircada par semidesertos, incluinte la Caru de Sudafrica ueste. La savanas de la Bushveld es a la este de la desertos.

La rejion de la Capo es a la culmina sude de Africa, e es la abitada de un varia grande de forestas sutropical e temperada, bosces, e savanas.