Copula (gramatica)
En linguistica, un copula es un parola usada per lia la sujeto de un frase con un completinte. La copula e la completinte combinada opera como la predica de la frase. La copula es comun un verbo o un parola verbin, ma esta no es la caso universal.
Ave tre usas comun per la copula:
- Identia: "Me vole es me mesma." "Cuando la area ante la para-rio pleni, el va es un lago." "La stela de matina es la stela de sera." "Xicos va es xicos."
- Membria de un clase: "El debe es un dotor." "Canes es carnivores." "Moscva es un site grande".
- Cualias: "Esce la casa va es sufisinte grande?" "La gal fema es prosima a la gal mas." "Me va es fatigada pos core."
La plu de linguas ave un copula major simil a la parola "es" en elefen, e el pote es cambiada per tempo, moda, aspeta, persones, etc, como otra verbos. Otra parolas cual opera simil inclui "deveni", "senti", e "pare".
En linguas polisintesal como inuit, la copula es comun un afisa cual causa ce un nom ata plu como un verbo.
La copula es asente en multe linguas, comun en situas spesial:
- Con un completinte ajetival (pe creol aitian, xines, melaiu, indonesian);
- En la tempo presente (pe rusce, ivri, arabi, magiar, cetxua);
- Con un sujeto de person tre (pe magiar, cetxua).
En la linguas xines, e states e cualias es espreseda jeneral con verbos de state con no nesesa per un copula, per esemplo, en putong, "es fatiga" (累 lèi), "es fame" (饿 è), "es a (un loca)" (在 zài), "es stupida" (笨 bèn), etc. Esta verbos es normal presededa par un averbo como 很 hěn ("multe") or 不 bù ("no"). Pote ave ance simple un pronom e verbo, pe 我饿。 wǒ è (me es fama). Sola frases con un nom como completinte, como "esta es me sore", usa la verbo "es": 是 shì.
En la linguas su, como dacota, cuasi tota parolas, incluinte ajetivos e nomes, pote ave un strutur verbal. Per esemplo, wičháša es la parola per "om" e per "el-es-un-om". Ma la usa de héčha ("es") es plu comun, pe wičháša héčha ("el es un om").