La etruscas ia es un popla con un lingua e cultur propre en la eda de scrive la plu temprana de Europa. Los ia flori en la eda de fero de la Mediteraneo en la dui du de la milenio prima aec. Los ia abita tra la vale Po e alga de la lados de la Alpes, e a la sude longo la costa ueste de Italia, e la plu intensa en Etruria, con enclaves tan sude como Campania e a interna en la montes Apenina. On pote segue sua preistoria con sertia a sirca 1000 aec. A sua culmina, sirca 500 aec, los ia es un potia de mar con presentia en Sardinia e la Mar Ejeo.

Depinta mural etruscan de Tifon, de Tarcinia.

A prima, los ia ave multe influe en la constitui e la condui de la rena roman. Ma plu tarda, los ia combate la Republica Roman en un serie de geras, e los ia es concistada e integrada en la cultur roman. Multe de la relijio e la mitolojia de la etruscas ia deveni un parte de la cultur clasica de Roma, incluinte la panteon roman. La senato roman ia adota elementos sentral de la relijio, cual ia es continuada par haruspices e familias nobil roman ci ia reclama linias familial etrusca, a multe anios pos cuando la popla jeneral ia oblida la lingua.

En la anios final de la Republica Roman, la relijio ia deveni min popular e ia es satirida par persones notable como Marco Tullio Cicero. La familia de Julio-Claudio, spesial Imperor Claudio, ci ia declara ce los desende de etruscas, ia manteni un sabe de la lingua e relijio per un tempo peti, ma ance esta ia sesa final. Un cuantia de obras autorial en la lingua etrusca ia survive asta la media de la milenio prima ec, ma ia es destruida par eda e par cristianes en la sosia roman.

La sistem de crede de la etruscas ia es un politeisme imanente – pd: tota fenomenos ia es considerada como un revela de un potia divin, e acel potia ia es corpida en dios ci ata continuante a la mundo, ma ci pote ance es convinseda o desconvinseda par umanas mortal.

A edas pos la asorbe de la etruscas, Seneca joven ia dise ce la difere entre la romanes e la etruscas ia es ce...

Nos crede ce lampo es relasada como un resulta de la xoca de nubes, ma los crede ce la nubes xoca per relasa lampo. Car los atribui tota cosas a la dios, los es conduida a la crede, no ce cosas ave sinifia car los aveni, ma ce los aveni car los debe ave sinifia.

Sirca la mun o muni (tombas) ia es la man o mani (manes en latina), la spiritos de la asendentes. En la icones pos la sentenio sinco aec, la mores es mostrada como viajante a la sumundo. En alga esemplos de arte etrusca, como los en la tomba François en Vulci, la spirito de la mor es identifiada par la parola hinthial, leteral "(un ci es) a su.

Un dio ia es nomida un ais (plu tarda, eis), con la plural aisar. La abitada de un dio ia es un fanu o luth, un loca santa, como un favi, un tomba o un temple. Ala, on ta nesesa dona un fler (plural flerchva) o ofre.

Tre niveles de dios ia es mostrada en la arte etrusca. Un nivel inclui la dios minor de orijinas nativa: Catha e Usil (la sol), Tivre (la luna), Selvans (un dio sivil), Turan (la diva de ama), Laran (la dio de gera), Leinth (la diva de moria), Maris, Thalna, Turms, e la dio Fulfuns, de ci sua nom es relatada en alga modo nonconoseda a la site Populonia e la populus Romanus.

Renante supra los ia es la dios plu alta cual pare refleta la sistem indoeuropean: Tin o Tinia (la sielo), Uni (sua sposa, Juno), e Cel (la diva de tera).

La nivel tre ia es la dios elinica cual la etruscas ia adota en la eda de influe par la este (750/700 a 600 aec). Esemplos inclui Aritimi (Artemis, Diana), Menvra (Minerva, Atena), e Pacha (Baco, Dionisio). Ultima, la truple prima ia deveni Tinia, Uni e Menvra.

La etruscas ia crede ce sua relijio ia es revelada a los par previdores. La du previdores xef ia es Tages – un enfantin ci ia nase de tera aradida con la capasia de previde – e Vegoia, un fem.

La etruscas ia crede a la contata direta con la divin, e ia ata nunca sin consulta la dios e sua sinias. Tota esta praticas ia es tota adotada par la romanes.

La scrives santa ia es un colie de testos nomida la Etrusca disiplina. Esta nom apare en Valerio Maximo, e Marco Tullio Cicero refere a un disiplina en sua scrives sur la sujeto.

Massimo Pallottina resoma la scrives conoseda (ma no esistente) como la Libri haruspicini, cual conteni la teoria e la regulas de divina de la intestines de animales; como la Libri fulgurales, cual descrive la divina de lampo; e la Libri rituales. La "Libri rituales ia inclui la "Libri fatales, cual dona detalias de la metodos coreta de fundi sites e locas santa, vacui campos, formi leges e proclamas, mesura spasio e tempo; la "Libri acherontici", cual conserna la vive pos mori; e la Libri Ostentaria", cual conteni la regulas per interprete indicas de la futur. La revelas de la profeta Tages ia es presentada en la Libri tagetici, cual inclui la Libri haruspicini e la "Acherontici, e los de la profetesa Vegoia en la Libri Vegoici, cual inclui la Libri fulgurales e un parte de la Libri rituales.

Esta obras no ia presenta predises o scrives santa en la sinifia comun: la Etrusca disciplina mesma predise nunca. La etruscas no ia ave un sistem de relijio o morales, e no revelas grande. En loca, los ia foca a la problem de la voles de la dios: si la dios ia crea la universo e umanas e ave un intende per tota, perce los no ia crea ance un sistem per comunica sua voles en un modo clar?

La etruscas ia aseta la difisilia de conose la voles de sua dios. Los no ia atenta esplica la atas o intendes de la dios. Per responde a la problem de conose la voles de la dios, los ia developa un sistem complicada de divina, pd: los ia crede ce la dios dona un flue continuante de sinias en la vive comun cual, si coreta lejeda, pote dirije la vive. Esta revelas pote es alga noncomprendable, e nonplasente o difisil, ma duta los es perilosa.

Cicero ia dise:

Car un aseta fretante de un opina erante es desonorante en cualce caso, e spesial en un demanda sur la cuantia de influe cual nos debe dona a divinas, rituos santa, e oservas relijiosa; car nos risca fa un crimin contra la dios si nos iniora los, o deveni envolveda en un superstisio de femes vea si nos aproba los.

Alora Cicero ia broma, regardante la divina de la cantas de ranas:

Ci ta suposa ce ranas ave esta previde? E an tal los ave par natur alga capasia de previde, sufisinte clar par se mesma, ma tro oscur per es comprendeda par umanas.

Demandas a la dios ia es la taxe de la pretes, ci la romanes ia nomi haruspises o sacerdotes; Tarquini ia ave un scola de sesdes de los. La etruscas ia usa parolas diversa per los: capen, maru, eisnev, hatrencu (pretesa). Los ia nomi la arte de divina zich nethsrac.

Un governor, la cechase, ia manteni la cosas santa (cecha o rath). Ma cada om ia ave sua obligas, cual ia es espresada par un asosia santa (la alumnathe o slecaches). No aveni publica ia comensa sin la netsvis (divinor mas) o nethsra (divinor fema), ci ia leje la bultos sur la figato de un ovea sacrifiada. Nos ave un model de un figato, de cual sua sinifia es ancora un cosa de debate, cual es marcada en partes cual esplica cisa la sinifia de cada bulto. Esta tradision ia ave sua orijinas en Asia sude-ueste.

La credes etrusca sur la vive pos mori pare es un combina de influes variosa. Los ia comparti la credes jeneral de la sosias temprana de la Mediteraneo, como la crede egiptian ce la survive e ricia en la vive pos mori depende de la trata de la restas de la mor. Tombas etrusca ia imita casas comun e ia inclui salas spasiosa, pintis mural, e mobilas. En la tomba, spesial sur la sarcofago, on ia ave representas de la mor a sua apico, comun con sua sposa o sposo. No tota ia ave un sarcofago; a alga veses, la mor ia es reclinada sur un banca de petra. Car la etruscas ia usa e la entera e la seni (la proportio depende de la periodo istorial), on ia pote pone la senes e osos en un vaso con forma de un casa o de la person.

La mundo de la mores ia es simil a la hades de la elinicas. Lo ia es renada par Vanth, e la mor ia es gidada ala par Charun, la personi de moria, ci ia es blu e ci ia porta un martel. Esta hades etrusca ia es plen de carateres mital elinica, con ance alga como Tuchulcha, ci ia combina carateres elinica e etrusca.