Galo (lingua)

Galo ia es un lingua celtica antica cual ia es parlada en partes de Europa ante e en la periodo de la Impero Roman. En la sinifia streta, galo ia es la lingua parlada par la abitores celtica de Galia, pd la rejion de Frans, Luxemburg, Beljia, la plu parte de Suiz, Italia norde, e partes de Nederland e Deutxland a la riva ueste de la rio Reno. En un sinifia plu vasta, lo inclui ance varias de celtica cual ia es parlada tra multe de Europa sentral, partes de la Balcanes, e Turcia (en la forma "galatian"), cual ia es sujesteda como prosima relatada. La lingua lepontica de Italia norde es a veses incluida su galo.

Enscrive galo-elinica ϹΕΓΟΜΑΡΟϹ ΟΥΙΛΛΟΝΕΟϹ ΤΟΟΥΤΙΟΥϹ ΝΑΜΑΥϹΑΤΙϹ ΕΙωΡΟΥ ΒΗΛΗϹΑΜΙ ϹΟϹΙΝ ΝΕΜΗΤΟΝ (Segomaros Uilloneos toutius Namausatis eiōru Bēlēsami sosin nemēton) "Segomaros, fio de Uillu, sitadan de Namausos, ia dedica esta refujeria a Belesama"

Con lepontica e la lingua celtiberian parlada en la penisola iberian, galo ia composa la grupo jeografial de linguas celtica continental. La relatas linguistica esata entre los, e ance entre los e la linguas celtica moderne (pd eres, gailica, cimrica, manes, e bresonica), es nonserta e un caso de debata par sua atesta minimal.

Galo es trovada en alga 800 enscrives, comun fratal, incluinte calendarios, contas de seramica, monumentos funeral, dedicas corta a la dios, enscrives sur monetas, declaras de posese, e otra testos, incluinte los cual es posible tabletas de maldises. Testos ia es prima scriveda en la alfabeta elinica en Frans sude e en un varia de la alfabeta italica vea en Italia norde. Pos la concista par la romanes de esta rejiones, scrive ia cambia a la usa de la alfabeta latina.

Galo en Europa ueste ia es recambiada par latina demotica e linguas germanica variosa de sirca la sentenio 5 ec a pos. Lo es crededa como estinguida alga anio sirca la sentenio 6 ec tarde.