Abri la menu xef
Cicero con sirca 60 anios

Humanitas es un parola latina cual sinifia natur umana, sivilia, e compatia, prosiminte la parola lfn umania.

Orijina de la parolaEdita

La parola latina coresponde a la consetas elinica de philanthropia (la ama cual fa ce nos es umana) e paideia (educa) cual ia es combinada con un serie de cualias cual composa la codigo tradisional e nonscriveda de condui roman (mos makorum). Cicero (106–43 BC) ia usa humanitas cuando descrivente la formi de un parlor ideal ce el ia crede debe es educada per posese un colie de virtuas conveninte per un vive bon e sasiante e un vive ativa de la servi publica; estas ta inclui un reserva de aprende otenida de la studia de bonae litterae (bon leteratur, pd leteratur clasical, spesial poesia), cual ta es ance un fonte de cultur e plasir continuante en recrea e jubila, jovenia e veia, e fortuna bon e mal.

A la grado ce humanitas coresponde a philanthropia e paideia, lo ia es spesial aplicable a gida la eserse conveninte de potia supra otras. Donce la consela par Cicero a sua frate ce "si destinia ia ta dona a tu la autoria supra africanes o espanioles o galos, nasiones savaje e barbar, tu ta debe ancora a tua humanitas per es consernada sur sua comfortas, sua nesesas, e sua securia." Resona Cicero plu ca un sentenio plu tarde, Plinio (61-112 A.D.) ia defina humanitas como la capasia per gania la ama de poplas peti sin intrui a la plu grande (Ep. IX, 5).

La revive en la Renase italian tempranaEdita

La conseta ia es de importa grande en la redescovre de antica clasical en la eda de la Renase par la umanistes italian. Comensante con la poesiste italian Petrarca, ci ia revive la comanda par Cicero per cultiva la siensas umana, ia comprendeda en la Renase como gramatica, retorica, poesia, istoria, e etica.

En 1333, en Liège (dise "li-ej"), Beljia, Petrarca ia trova e copiada, en sua propre scrive, un manuscrito de la parla par Cicero Pro Archia, cual ia conteni la pasaje famosa cual defende poesia e leteratur:

Haec studia adolescentiam alunt, senectutem oblectant, secundas res ornant, adversis perfugium ac solacium praebent, delectant domi, non impediunt foris, pernoctant nobiscum, peregrinantur, rusticantur. (Tradui: "Esta studias susta jovenia e diverti veia, los boni ricia, e ofre refuja e consola en malfortuna; los joia nos cuando nos es a casa sin impedi nos en la mundo plu vasta, e es con nos a note, cuando nos viaja e cuando nos visita la campania.")

Petrarca ia gusta esta sita e ia refere a lo frecuente, e do Cicero ia usa la espresa litterarum lumen ("la lus de leteratur"), Petrarca ia scrive en la borda Lumen litterarum a lado e ia desinia un candela o lampa ala. La manuscrito de Liège ia es perdeda e ance es la copia par Petrarca, ma la copia par Petrarca ia es preservada en tota estra un de la manoscritos plu tarde e conserva la notas par Petrarca. Como un om de la eda medieval, Petrarca ia regreta ce Cicero no ia es cristian e el ia crede ce el ia ta es un cristian si el no ia mori ante la nase de Cristo. Per Petrarca e otra humanistes de la Renasa ci segue el, la humanistas de Cicero no ia es videda como desacordante con cristianisme. En esta, los ia segue la padres de la eglesa de la sentenio sinco como Jeromo e Augustino, ci ia ensenia ce la educa e leteratur de la elinicas e romanes ia es donadas de Dio e modeles de eselentia, con esije ce los ia es filtrada e purida per servi cristianisme.

Humanitas en la Lumina fransesEdita

Seguente la istoriste Peter Gay, la filosofistes de Frans en la sentenio 18, ia trova ce la paganisme de Cicero, tinjeda con stoicisme, multe amin:

La idea de humanitas ia es prima traeda a Roma par la sirculo filosofiste sirca Scipio e plu developada par Cicero. Per Cicero, humanitas ia es un stilo de pensa, no un prinsipe formal. Lo asentua la importa de un person como un esente culurida, en control de sua universa moral. La om ci ia pratica humanitas ia es confidente de sua valua, cortes a otras, brava en sua condui sosial, e ativa en sua rol political. Plu, el ia es un person ci fasa vive con sceticisme corajosa: el conose ce la consolas de relijio popular es plu per esentes plu credosa ca el mesma, ce vive es nonserta, e ce pesimisme dur es superior a otimisme autoenganosa. Un person deveni un person cuando el redefini se mesma; el an deveni simil a un dio: Deus est mortali iuvare mortalem - ia scrive Plinio, traduinte un stoiciste elenica - "Per aida un person es sua dio vera."

Final, la person ci pratica humanitas cultiva sua sensas estetica como el escuta a sua razona: Cum musis - scrive Cicero - id est, cum humanitate et doctrina havere commercium. Virtua, Cicero ia insiste, es no plu ca natur perfetida e developada a sua culmina, e donce on ave un sembla entre umanas e dio: Est auten virtus nihil aliud quam in se perfecta et ad summum perducta natura: est igitur homini cum deo similitudio.

La humanitas de Cicero... reaparente en la sentenio prima en la declara de Seneca - fada en la media de un lamenta sur la bestinia roman - ce la umana es un cosa santa per umanas: homo res sacra homini; e ia reapare un ves plu en la sentenio 18 en la clama par Kant per autonomia umana e en la comanda seria par Voltaire: "Recorda tua dinia como un umana." En la comensa de sua Meditias, Imperor Marco Aurelio ia detali un cataloga vera de cualias cual, intera, composa la virtuas cual Cicero ia nomi humanitas e cual la filosofistes franses ia espera ce los posese en bon mesura: umilia, autocontrola, masia, bonvole, praticalia, jenerosia, razona, tolera, e obedi a la comandas de natur.

La revive en Deutxland en la sentenios 18 e 19Edita

En la Aufklärung (o la varia deutx de la Lumina de la sentenio 18), la terma humanitat ia es usada per indica la formi inteletal, fisical, e moral, de un "umana plu bon" (pd, umanisme). Lo ia es usada, per esemplo, par la teolojiste Johann Gottfried Herder en sua Briefe zur Beföderung der Humanität ("leteras per la avansa de umania", 1792) e par Friedrich Schiller, entre otras.

La Humanität de Herder es un coseta vasta cual es defina variante como la reali gradal de la potensia umana la plu bon, la ateni de razona e justia en tota clases e en tota consernas de umanes, e la produi juntada de la atas creosa de lejistes, poesistes, artistes, filosofistes, inventores, e educores tra la edas.

An ce Herder es considerada la orijinor de nasionalisme etnica, el no ia es un "chauviniste". El ia declare ce cada person ama sua propre nasion, familia, lingua, e costumes, no car los es plu bon ca los de otra persones, ma car los ia es la sua. Ama per tua propre individua debe condui a respeta per lo de otras. Per Herder, la imaje de Dio ia es impresada en cada umana, ance con un impulsa per autoboni e developa. La istoriste William McNeil scrive ce Herder proclama osante ce:

Cade eda e cada person corpi ideales e capasias spesifada a se mesma, donce permetente un espresa plu plen e plu completa de la potensias multiformal de umania ca los cual ta pote aveni en otra modo. Herder ia nega espresosa ce un popla o sivilia ia es plu bon ca un otra. Los ia es sola diferente, en la mesma modo ce la lingua deutx difere de franses.

En la umanisme de la romanes, bonvole (benevolentia) ia es videda como un cualia de humanitas. Esta idea es spesial asentuada en la obras de Cicero e Seneca. En esta contesto, bonvole propulsa la idea de umania e es comprendeda como un senti de ama o compatia, afin lo causa "algun ci vole partisipa, a la nivel de senti, en cualce es umana." Tal partisipa implica un vole per partisipa en e la sufri umana e la joia umana. Esta ia es resonada en la conseta de Kant sur ama, do la pensor ia sita ce la bonvole razonal es propulsada par joia e compatia natural simpatiosa.

Otra pensores ia discute ance la bonvole en umanisme moderne. Max Scheler, per esemplo, ia usa lo como un elemento importante en sua discute sur simpatia. En un de sua obras, el lia bonvole e la conseta de senti compartida, cual permete ce autoama, eleje autosentrida, solipsisme, e egoisme es suprapasada total e final. Scheler ia egali spesifada la bonvole con umanisme, esplicante ce esta consetas - con senti compartida - abrasa tota umanas, "simple car los es umanas"

Humanitas como bonvole es ance un prinsipe xef de la francamasones e un funda per sua crede ce nasionalia e relijio no importa, sola umania universal. Alga ordinas de francamasones es nomida "humanitas".