Abri la menu xef
Tor batalia contra la jigantes

Mitolojia norsce es un corpo de mitos de la popla germanica norde, orijinal de paganisme norsce e continuante pos la cristiani de Scandinavia, e a la folclor scandinavian de la periodo moderne. La mitolojia es composada de dios e divas, jotunes, nanos, elfos, e eroes, derivada de multe fontes ante e pos la periodo pagan, incluinte manuscritos, representas arceolojial, e tradisiones de folclor.

La testos fontal nomi multe dios, como la dio de tona Þórr (Tor), ci branda un martel grande e proteje umanas de sua enemis; la dio saja Óðinn (Odin), el de un oio, ci xerca per sabe tra la mundos e ia dona la runas a umania; la diva Freyja (Freia) bela, ci pote usa la sorsoria seiðr; la diva (o jötunn, "jigante") Skaði (Scadi), ci sci en la montanias en inverno; la dio Njörðr (Niord) la potiosa, ci pote calma mar e foco e dona ricas e tera; la dio Freyr (Frei), asosiada con clima e cultiva; la diva Iðunn (Idunn), ci reteni la pomas cual dona jovenia eterna; la dio Heimdallr (Heimdall), naseda de nove madres, pote oia la crese de erbas, e garda la ponte de arco de sielo entre la casas de umanas e dios; la dio Loki (Loki), ci trae trajedia a la dios par desinia la mori de Baldr (Balder) la bela, e causa la fini de la mundo, e multe otra dios.

La plu de la mitolojia survivente sentri sur la aventures de la dios e sua interata con otra esentes variosa, como umanas e la jötnar (jigantes), esentes ci pote es amis, amores, enemis, o membros de la familia de la dios. La universo en mitolojia norsce es composada de nova mundos cual ensirca la arbor sentral, Ygdrasil. Unias de tempo e elementos de la cosmolojia es personida como dios o otra esentes. Formas variosa de un mito de crea es narada, do la mundo es creada de la carne de la esente primeval Ymir, e la du umanas prima Ask e Embla. Esta mundos es prediseda como es renaseda pos la aveni de Ragnarok, cuando un gera enorme entre la dios e sua enemis, e la mundo es envelopada en flamas, e nova renaseda. Ala, la dios survivente va congrega, e la tera va es fertil e verde, e du umanas (Líf and Lífþrasir) ci va emerje de Ygdrasil e va repopli la mundo.

Mitolojia norsce ia es la sujeto de debata entre mitolojistes de la sentenio 17, cuando testos clavin ia es traeda a la atende de la sirculos inteletal de Europa. Par mitolojia comparada e linguistica istorial, studiantes ia identifia elementos de mitolojia germanica cual estende tan distante en la pasada como a mitolojia protoindoeuropean.