La oligosene es un epoca jeolojial de la periodo paleojen cual estende de sirca 34 milion a 23 milion anios ante aora. La nom deriva de la elinica antica parolas oligos ("poca") e kainos ("nova"), cual refere a la poca formas de moluscos. La epoca es presededa par la epoca eosene, e es segueda par la epoca miosene, e lo es la epoca tre e final de la periodo paleojen.

La continentes e mares en la epoca oligosene
Astrapothere
Macrauchenia
Copepteryx hexeris
Desmostylia

(Vide Scala de edas jeolojial per detalias)

La oligosene es comun videda como un tempo importante de traversa, un lia entre la mundo antica de la eosene tropical e la ecosistemes plu moderna de la miosene. Cambias major en la oligosene ia inclui un estende global de stepe e savana, e un regresa de la forestas tropical de arbores de folias larga a la banda ecuatoral.

La comensa de la oligosene es marcada par la aveni de un estingui grande nomida la Grande Coupure (pd "rompe grande"), cual inclui la recambia de animales european par animales asian, estra la familias de rodentes e marsupiales. La borda entre la oligosene e la miosene no es un caso de un aveni grande, ma sola par un borda entre la oligosene alga plu calda e la miosene alga plu fria.

Anjiospermas ia continua sua estende tra la mundo cuando la forestas tropical e sutropical ia es recambiada par forestas caduca de climas temperada. Planos abri e desertos ia deveni plu comun e erbas ia estende de sua abitadas prosima a acua a estra. Ma savanas moderna no ia es ancora comun.

En America Norde, spesies de plantas sutropical ia domina, con anacardios e litxis, pinos e faias ia es comun. La legumes ia sperde, e siperos e filises ia continua sua estende.

La vistas abri ia permete ce animales deveni plu grande ca plu temprana. Animales de mar ia deveni plu moderna, como la vertebratos a tera. Esta ia es probable causada plu par formas plu vea morinte ca par la evolui de formas moderna. Multe grupos, como ecuidos, enelodontidos, rinoserotidos, mericoidodontidos, e camelidos, deveni plu capas de core en esta tempo, ajustante a la planos. La felido prima, proailuro, ia orijina en Asia en la oligosene tarda e ia sperde a Europa. A la otra lado, multe spesies ia deveni estinguida

America Sude ia es isolida de otra continentes e animales diferente de los sur otra continentes ia evolui en la oligosene. America Sude ia deveni la abitada per animales strana como la piroterios e astrapoterios, etc, e la avia de teror famosa.

La animales de mar de la oligosene sembla animales de oji, como bivalvos. Balenas e otra setaseos ia apare, ma la varias plu vea ia deveni estinguida, posible car los no ia evolui ecoloca, cual ia es multe usosa en mares plu fria e nebulosa. La desmostilio ia esiste ancora - un animal de mar simil a un ipopotamo, e la pinipedios ia ariva en esta epoca en la forma de un asendente simil a un lutra