La Rio Amur (rusce: река́ Аму́р, xines: 黑龙江 - Hēilóng Jiāng, mandju: Sahaliyan Ula; mongol: Амар Мөрөн o Хар Мөрөн) es la rio des de longia en la mundo, e formi la borda entre la Rusia de Asia este, e Xina norde-este. Lo es bon conoseda per sua pexes: la sturiones caluga, cual pote ateni 5.6 metres, txanas norde, lusios, salmones sibir, pexes gatin, carpas, etc. Lo ave ance la grupos la plu norde de la tortuga de armur mol e la nelumbo indian.

La Amur, la rio pasosa
Un mapa de la basin de la Amur
La ponte Habarovsc

La rio comensa en la colinas en la parte ueste de Xina norde-este a un altia de 303 metres. Lo flue este como la borda entre Xina e Rusia, e fini en un estuario e ultima en la streta de Tartaria.

Per multe sentenios, la abitantes de la vale de la Amur ia es composada de la popla tungus (pe la evenci, la jurxen, etc), mongol, alga ainu, e prosima a la boca de la rio, la nivhi. Per multe de esta grupos, pexa en la Amur e sua conflues ia es sua fonte xef de vive. Asta la sentenio 17, esta poplas no ia es conoseda par la europeanes, e minimal a la xines.

La area de la Amur ia es tirada entre la xines e la rusces. Prima, la mongoles, ci ia rena la rejion como la dinastia Yuan de xina, ia ave alga presentia militar en la sentenios 13 e 14. Ma en la sentenio 15, misiones de la cozaces de Rusia ia comensa esplora la area. La promove de cristiania ortodox par la rusces entre la popla orijinal longo la Amur ia es videda como un menasa par la dinastia Qing.

La rejion ia resta como un frontera nonimportante de la Impero Qing per la sentenios seguente. La rusce reapare longo la rio en la sentenio 19 media, forsante ce la mandju sede tota teritorio norde e este de la rio a la Impero Rusce. La gania de la teritorio ia es segueda par la migra de colonistes rusce a la rejion e la construi de sites como Blagovextxensc e, plu tarda, Habarovsc.