Turcestan (farsi per "pais de la turcicas") refere a un rejion major en Asia sentral entre Sibir a la norde, Iran, Afganistan, e Tibet a la sude, la Mar Caspio a la ueste, e la Deserto Gobi a la este. Lo inclui Cazacstan, Cirgistan, Tadjicistan, Turcmenistan, Uzbecistan, e Xinjiang de la eda moderna. A veses, on inclui ance partes de Afganistan norde.

Un mapa par Mahmud al-Kashgari, mostrante la distribui de tribus turcica en la sentenio 11
Moda de la varia grande de poplas de Turcestan

Lo es conoseda como Turan par la persianes, e la parte ueste ia es conoseda istorial como Sogdiana, Ma wara'u'n-nahr par la arabis, e Transoxiana par viajores de la ueste. Turcestan nomi un rejion en Asia sentral cual es poplida xef par popla turcica; ma la rejion conteni ance popla nonturcica, como la tajicis e la rusces.

La istoria de Turcestan es datida a min a la milenio tre aec. Multe cosas ia es fabricada en acel periodo, con multe comersia. La rejion ia es la area sentral per difusa cultural car la Via de Seda ia traversa lo. Turcestan ia oteni la identia turcica comensante a la sentenio ses ec con la migra de popla turces de la area de Lago Baical e de Mongol norde e ueste.