Verjilio
Publio Verjilio Maro (70–19 aec) ia es un poesiste roman, e la autor de la obra mestral Eneida, la obra de leteratur la plu influente en tota Roma antica. En 19 aec, Verjilio ia comensa un viaja a Elas e Asia, con la intende de revisa la Eneida, e alora de dedica la resta de sua vive en studia de filosofia. El ia deveni malada ante parti de Atina e ia mori pronto pos sua ariva a Brundisio (aora Brindisi, Italia).
En 37 aec, Verjilio ia completi sua obra prima major: la des poesias pastoral, la Campaniales. Per crea un umor pastoral, Verjilio ia descrive la conversas amin de la pastores e sua cantas de ama, sua lamentas, e sua concursos de canta. Ma el ia dona a la Campaniales un natur orijinal e plu nasional, par introdui persones e avenis real en la poesias, e par refere, en metafor, a otra poplas e avenis.
La Cultivorales, o Arte de cultiva, un poesia sur la vive de la cultivor, ia es scriveda de 36 a 29 aec. La poesia revela la perfetia artistal la plu alta trovada a cualce tempo en poesias latina.
Verjilio ia dedica sua des anios ultima a la crea de la Eneida, un epica mital descrivente la vagas de la eroe Eneas pos la cade de Troia en la Gera de Troia asta sua vinse militar en Italia. Eneas ia fuji de Troia, portante sua padre senesente sur sua spalas, e gidante sua fio joven Ascanio par mano. El ia asembla un marina e ia vela tra la Mar Mediteraneo este con la troianes survivente a Tracia, Criti, Epiro e Sisilia, ante la destrui de la marina sur la costa de Africa. Asi, Dido, rea de Cartago, ia cade en ama a Eneas. Ma el ia suiside cuando Eneas ia parti plu tarda. Pos para a la boca de rio Tiber en Italia, Eneas ia mata Turno, la re de la rutulianes.
La moda e la trama de la Eneida ia es derivada de la Iliada e Odisea, la epicas elinica antica atribuida a Homero. La Eneida es regardada como la epica grande prima, e Verjilio ia intende lo como un atenta de glori Roma.
La moda de la poesia verjilin ia influe poesistes engles como Geoffrey Chaucer, Edmund Spenser, John Milton, e Alfred Tennyson.
Sitas
edita- "Timeo Danaos et dona ferentes". Me teme la elinicas, an si los porta donadas.
Obras
edita- Campaniales (Bucolica o Eclogae)
- Cultivorales (Georgica)
- Eneida (Aeneis)
Bibliografia
edita- Quinn, S., ed. Why Vergil? A Collection of Interpretations. Wauconda: Bolchazy-Carducci, 2000.
- Syed, Y. Vergil's Aeneid and the Roman Self: Subject and Nation in Literary Discourse. Ann Arbor: University of Michigan Press, 2005.
- Sainte-Beuve, Étude sur Virgile, Garnier, 1857. Texte de cette étude annoté par Henri Goelzer en 1895.
- Karl Büchner, Virgilio. Il poeta dei Romani, Brescia, Paideia, 1986. [Stuttgart, Alfred Druckenmuller, 1955].
- Tenny Frank, Virgilio, Lanciano, Carabba, 1930.
- Pierre Grimal, Virgilio. La seconda nascita di Roma, Milano, Rusconi, 1986.[Paris, Arthaud, 1985]
- William F.J. Knight, Vergil's, secret art, in «Rivista di cultura classica e medievale» IV, 1964, p. 121 ss.
- José Oroz Reta, Virgilio y los valores del clasicismo y del humanismo, in «Helmantica», XXIV, 1973, p. 209 ss.