Violeta (color)

Violeta es la color de ametista, lavanda, e calicarpa. Sua nom es derivada de la flor violeta.

Violeta es la color a la lado de la spetro de lus vidable entre blu e ultravioleta, cual es nonvidable. Violeta ave un longia de onda entre 380 e 450 nanometres, ma en esperimenta con constrinje spesial, persones ia vide a 310 nanometres. Lus con un longia de onda plu basa ca violeta ma plu longa ca raio X e raio gama es nomida ultravioleta. En la rota de colores istorial usada par depintores, violeta es entre blu e purpur.

Sur la scermos de computadores e televisadores, un color cual aspeta simil a violeta es creada con la sistem de colores RGB, par misca roja e blu, usante blu con un cuantia de brilia multiplida par la duple de la cuantia de brilia de la roja. Lo no es violeta vera, car lo es creada par misca colores de longias de onda plu longa, e violeta vera es un longia de onda sola, plu basa ca la longia de onda de blu.

Violeta e purpur aspeta multe simil; ma violeta es un color vera, cual ave sua propre colie de longias de onda, en cuando purpur es un color composada, creada par combina blu e roja.

En istoria, violeta e purpur ia es longa asosiada con reia e gloria. La imperores de Roma ia porta togas purpur, e ance la imperores bizantian ia porta estas. En la eda medieval, violeta ia es portada par bispos e profesores de universias, e ia es frecuente usada en arte per la color de la robas de la Virjin Maria.

Longo sondas en Europa e la SUA, violeta es la color la plu asosiada con estravagantia e individuisme, noncostumales, artifisia, e ambiguia.

Colores											cambia
Negra	Gris	Blanca	Ros	Purpur	Blu	Azul	Verde	Jala	Orania	Roja	Brun