Alia Hansa

La Alia Hansa ia es un federa comersial e defende de sindicas de mercatores e vilas mercatal en Europa norde-ueste e sentra. Cresente de alga vilas en Deutxland norde en la desenio 12 tarde, la alia ia domina per tre sentenios longo la costas de Europa norde. Sua teritorios ia estende de la Mar Baltica a la Mar Norde e enterna de los en la Eda Medieval tarde, e ia diminui lenta pos 1450.

Hansa (plu temprana Hanse) ia es un parola de Deutx alta vea per un convoia, e esta parola ia es aplicada a grupos de mercatores viajante entre la sites de la Hansa, par tera o par mar.

Grupos de mercatores ia institui la alia per proteje la intereses economial e la vantajes diplomatal de la sindicatos en sua sites e paises aliada, incluinte longo la vias de comersia cual la mercatores ia usa. La sites ia ave sua propre sistemes de leges e ia maneja sua propre armadas per proteje e aida mutua. Ma on con esta, la organiza no ia es un stato o un federa de site-statos; sola un cuantia multe peti de la sites en la alia ia es autonom o ave la librias como los de la sites imperial libre.

Istoristes trasa jeneral la orijinas de la Alia Hansa a la reconstrui de la vila de Lubeck en Deutxland norde en 1159 par Hendric la Leon, dux de Sason e Baiern, pos cuando el ia catura la area de Adolf 2, conte de Schauenburg e Holstein. Aventures comersial, atacas, e piratia ia aveni plu temprana tra la rejion baltica - marinores de Gotland ia naviga tan distante como Novgorod, per esemplo - ma la grandia de comersia internasional en la rejion baltica ia resta nonsinifiante ante la crese de la Alia Hansa.

Sites deutx ia ateni domina de comersia en la Baltica con un rapidia stonante en la sentenio 13, e Lubeck ia deveni un nodo sentral en la comersia maral cual ia lia la areas sirca la Mares Norde e Baltica. La ejemonia de Lubeck ia culmina en la sentenio 15.

La comensa

Lubeck ia deveni un base per mercatores de Sason e Westfalen, intercambia a este e ueste. Ante la Hansa, mercatores en sites diferente ia comensa formi sindicatos con la intende de intercambia con vilas ultra la mares, spesial en la rejiones min-developada economial de la Baltica este. Esta area ia es un fonte de lenio, sira, ambar, resinas, e pelos, con segal e trigo portada sur barcasas de la interna a la mercatos portal. La vilas ia leva sua propre armadas, con cada sindicato esijeda per furni labor forsada cuando nesesada. La sites de la Hansa ia aida lunlotra, e barcos comersial ia es comun usada per porta soldatos e sua armas.

Visby ia funsiona como la sentro xef en la Baltica ante la Hansa. Par naviga este, la mercatores de Visby ia fundi un stasion comersial a Novgorod nomida Gutagard (acc Gotenhof) en 1080. Mercatores de Deutxland norde ia reposa a Gutagard en la periodo temprana. Plu tarde, los institui sua propre stasion en Novgorod nomida Peterhof, cual ia es plu alta sur la rio, en la parte prima de la sentenio 13. En 1229, mercatores deutx a Novgorod ia es donada vantajes cual fa ce sua diretos ia es plu secur.

La sosias de la Hansa ia labora per sutrae restrinjes sur comersia per sua membros. Ante la funda ofisial de la alia en 1356, la parola "Hansa" no ia aveni en la linguas de la Baltica. Gotlanders ia usa la parola varjag. La Hansa es notada (ma sin la nom) en London en 1157, pos cuando la mercatores de la Hansa en Koln ia convinse Henry 2, re de England, per libre los de tota peajes en London e permete ce los ta comersia a la ferias tra England. Lubeck, la "Rena de la Hansa", a do la comersores ia es comandada per transfere benes de barcon a barcon entre la Mar Norde e la Mar Baltic, ia gania vantajes imperial per deveni un site imperial libre en 1226, como sua asosiada de comersia, Hamburg, ia reseta en 1189.

En 1241, Lubeck, con asede a la areas de pexa en la Mares Norde e Baltica, ia fundi un alia - un presedente de la alia - con Hamburg, un otra site comersial, cual controla asede a la vias de la comersia en sal de Luneburg. La sites aliada ia gania controla sur la plu de la comersia en pex e sal, spesial la mercato de Scania; Koln ia junta con los en la Asembla de 1260. En 1266, Henry 3, re de England ia dona a la Hansa de Lubeck e Hamburg un constitui per funsiones en England, e la Hansa de Koln ia junta con los en 1282 per formi la colonia Hansa la plu potiosa en London. Multe de esta forsa per esta coopera ia veni de la natur fratida de la governas teritorial cual esiste, cual ia fali furni securia per comersia. Tra la 50 anios seguente, la Hansa mesma ia emerji con acordas formal per federa e coopera cual covre la vias comersial ueste e este. La site xef e cavilin resta Lubeck, con la prima asembla de la Hansa conduida ala en 1356.

Estende comersial

La loca de Lubeck a la Mar Baltica ia furni asede per comersia con Scandinavia e la Rus ciivan con sua sentro comersial maral a Novgorod, cual ia pone lo en compete direta con la scandinavianes ci ia controla a ante la plu de la vias comersial baltica. Un trata con la Visby Hansa ia para es compete; tra esta trata, la mercatores de Lubeck ia gania asede a la porte interna rusce de Novgorod, do los ia construi un stasion de comersia nomida un Kontor (leteral "un ofisia"). An si tal alias ia formi tra la Impero Santa Roman, la alia ia ateni nunca un organiza formal e streta manajeda. Asemblas de la vilas de la Hansa ia congrega periodal en Lubeck per un Hansetag (un asembla de vilas) de 1356 e seguente, ma multe vilas ia eleje no atende e no envia representores, e la desides no ia es restrinjente per la sites individua. Tra la periodo, un rede de alias ia crese per inclui un colie flexable de 70 a 170 sites.

La alia ia susede institui plu "kontores" en Bruje, Bergen, e London. Esta stasiones ia deveni sinifiante. La stasion en London, instituida en 1320, ia es ueste de la Ponte London prosima a la Strada de Temes superior, la loca abitada aora par la stasion de Strada Cannon. Lo ia crese a un comunia murida sinifiante con sua propre benerias, un casa de peseria, un eglesa, ofisias, e casas, cual refleta la importa e grandia de la ativa a la loca. La refere prima a lo como la Steelyard (en deutx: Stahlhof, en lfn "complesa de aser") es de 1422.

Comensante con comersia en stofa de lana ru, la alia ia ave la efeto de trae comersia e industria a Deutxland norde. Cuando comersia crese, stofas de lana e lino nova e plu refinada, e an seda, ia es fabricada en Deutxland norde. La mesma refina de produis estra la industria casetal ia aveni en otra campos, pe grava, siseli de leno, produi de armor, grava de metales, e lenio turnada. La monopolio de naviga e comersia par la Alia Hansa cual ia dura sentenios, ia serti ce la Renasa ia ariva en Deutxland norde ante multe de la resta de Europa.

En ajunta a la "kontores" major, portes individua de la alia ia ave un mercator represente e un beneria. En England, esta ia aveni en Boston, Bristol, Bishop's Lynn (aora King's Lynn, cual ave la sola beneria hansal restante en England), Hull, Ipswich, Norwich, Yarmouth (aora Great Yarmouth), e York.

La alia ia comersia xef en lenio, pelos, resina (o catran), lino, miel, tribo, e segal de la este a Flandre e England com stofa (e, sempre plu, benes fabricada) en la otra dirije. mineral (spesial cupre e fero) e arenge ia veni sude de Sveria.

Colonistes deutx en la sentenios 12 e 13 ia coloni en multe sites sur o prosima a la costa baltica este, pe Elbing (Elblag), Thorn (Torun), Reval (Tallinn), Riga, e Dorpat (Tartu), cual ia deveni membros de la Alia Hansa, e alga de cual reteni ancora multe construidas hansa e la stilo de sua dias en la alia. La plu de los ia es donada "lege de Lubeck", nomida per la site xef de la alia. La lege ia insiste ce los ia debe apela tota cosas legal a la comite de la site de Lubeck. La Federa Livoniania asorbe Esti e partes de Latvia e ia ave sua propre asemblas hansa; tota de sua vilas major ia deveni membros de la Alia Hansa. La lingua dominante de comersia ia es platdeutx media, un dialeto con afetas sinifiante per paises envolveda en la comersia, spesial svensce, norsce, dansce, suomi, esti, e latvisce.

La culmina

Mapa de la sites e vias comersial de la Alia Hansa

La alia ia ave un strutur fluinte, ma sua membros ia comparti alga cualias; la plu de la sites hansa ia comensa como sites autonom, o ia gania autonomia tra la potia de negosa coletiva de la alia, an si tal autonomia resta limitada. La sites libre hansa ia debe alia direta a la Imperor de la Impero Santa Roman, sin cualce lia familial media de obliga a la nobiles local.

Un otra similia ia es la locas stratejial de la sites longo vias de comersia. A la culmina de sua potia en la sentenio 14 tarde, la mercatores de la Alia Hansa ia susede usa sua potia economial, e a veses sua potia militar, per influe la politica imperial.

La alia ia mostra potia ance a stranjer. Entre 1361 e 1370, lo gera contra Danmarc. A la comensa, los no ia susede, ma en 1368, vilas hansa, aliada con la Federa de Koln, ia saca Kobenhavn e Helsingborg, e ia forsa Valdemar 4, re de Danmarc, e sua fio par lege Haakon 6, re de Noria, per dona a la alia 15% de la profita de la comersia dansce en la trata de pas de Stralsund cual seguente, alora ganiante un comersia efetosa e un monopolio en Scandinavia. Esta trata favorable ia marca la culmina de potia de la Hansa. Pos la Gera Dansce-Hansa (1426-1435) e la bombarda de Kobenhavn (1428), la vantajes comersial ia es renovada en la Trata de Vordingborg en 1435.

La Hansa ia ance batalia enerjiosa contra piratas. Entre 1392 e 1440, comersia maral de la alia ia fasa peril de la atacas par la "Frates Furninte" (Vitalienbrüder) e sua desendentes, piratas "privata" empleada en 1392 par Albert, re de Sveria, contra Margaret 1, rena de Danmark. En la Gera Nederlandes-Hansa (1438–41), la mercatores de Amsterdam ia xerca per e ultima gania asede libre a la Baltica e rompe la monopolio de la Hansa.

La plu de sites stranjer ia restrinje la mercatores hansa a areas per comersia e a sua propre stasiones. Los no ia interata multe con la abitantes local, estra en la curso de comersia. Multe persones local, mercatores e nobiles egal, ia invia la potia de la alia e ia atenta diminui lo. Per esemplo, en London, la mercatores local ia presa continual per la revoca de vantajes de la Hansa. La refusa par la Hansa per ofre acordas resiprocal a la mercatores engles ia crese la tensa. Edward 4, re de England ia reconfirma la vantajes de la alia en la Trata de Utrecht (1474) an ce la tensa continua, partal per la contribui finansial sinifiante par la alia a la lado de York en la Geras de la Rosas. En 1597, Elizabeth 1, rena de England ia espulsa la alia de London, e la "Steelyard" ia clui en la anio seguente. Ivan 3, prinse grande de Rusia ia clui la Kontor hansa en Novgorod en 1494. La esiste de la alia e sua vantajes e monopolios ia crea tensas economial e sosial cual ia estende comun a la competes entre membros de la alia.

La crese de potias competente

La crise de la sentenio 15 tarde no ia eseta la Hansa. Ma ultima, sua competores futur ia emerje en la forma de la statos teritorial, nova o renovida, e no sola en la ueste; Polsca ia vinse la Cavalores Teutonica en 1466; Ivan 2, prinse grande de Moscva, ia fini la autonomia de la stasion en Novgorod en 1478. Modos de credito ia es importada de Italia, do contablia par duple-entra ia es inventada en 1492, e ia suprapasa la economia hansa, en cual monetas de arjenta ia continua es usada, en loca de biletas de intercambia.

En la sentenio 15, tensas entre la rejion prusen e la sites "wendes" (Lubeck e sua visinas este) ia crese. Lubeck ia depende de sua rol como sentro de la Hansa, car lo ia es a la costa ma sin un rio major. Lo ia es sur la entra de la via teran, ma esta via pote es pasada par mar sirca Danmark e tra la Kattegat. La interese major de Prusen, a la otra lado, ia es la esporta de produis como gran e lenio, cual ia es multe importante per England, Nederland, e, plu tarde, ance per Espania e Ialia.

En 1454, la anio de la sposi de Elisabeth de Osteraic a la re jogailan, la vilas de la Federa Prusen ia rebela contra la Cavalores Teutonica, e ia demanda de Casimmir 4, re de Polsca, per aida. Danzig (Gdansk), Thorn, e Elbing ia deveni parte de la Rena de Polsca par la trata de pas du de Thorn (1466). Polsca ia es suportada par la Impero Santa Roman tra lias familial e par aida militar su la Dinastia Habsburg. Krakow, alora la capital de Polsca, ia ave un asosia lejera con la Hansa. La asentia de bordas con duanas a la Rio Vistula pos 1466 ia aida per crese gradal la esportas de gran polsce, transportada a la mar longo la Vistula par du mil persento de la sentenio 15 a 17. La comersia en gran transportada par mar dominada par la Hansa ia resulta en Polsca deveninte un de la areas major de la ativia de la Hansa, e ia resulta en Danzig deveninte la site la plu grande de la Hansa.

Un vantaje economial major per la Hansa ia es sua controla de la mercato de construi de barcones, spesial en Lubeck e Danzig. La Hansa ia vende barcones tra Europa, incluinte Italia. Los ia forsa la nederlandeses a estra, car Nederland ia desira favori Brujes como un mercato jigante de benes esensal a la fini de un via de comersia. Cuando la nederlandeses ia comensa compete con la Hansa en la construi de barcones, la Hansa ia atenta para la flue de tecnolojia de la vilas hansa a Nederland. Ma Danzig ia es un asosior de Amsterdam, e ia permete ce la barcones nederlandes ta move gran de la site direta. Nederlandeses ia ance move sirca la vilas hansa par comersia direta con prinses de Deutxland norde en vilas estra la Hansa. Car la custas de transporta ia es multe min ca los de la Hansa, la Hansa ia deveni escluida como ajentes media.

Cuando Bruje, Antwerp, e Holland ia deveni parte de la Duxia de Burgundia, los ia atenta ativa per prende la monopolio de comersia de la Hansa, e la mercato de benes esensal de Bruje ia es transfereda a Amsterdam. La mercatores nederlandes ia defia combatosa la Hansa e ia ave multe susedes. La sites hansa en Prusen e Livonia ia suporta la nederlandeses contra la sites cor de la Hansa en Deutxland norde. Pos alga geras a mar entre Burgundia e la flotilas de la Hansa, Amsterdam ia gania la posto de la porto xef per gran de Polsca e la Baltica de la sentenio 15 e pos. La nederlandeses ia regarda la comersia de gran de Amsterdam como "la madre de tota comersia" (Moedernegotie).

Nuremberg en Franconia ia developa un via teral per vende produidas cual ia es dominada par la Hansa en la pasada, de Frankfurt tra Nuremburg e Leipzig a Polsca e Rusia, intercambia stofa flames e vino franses per gran e pelos de la este. La Hansa ia profita de la comersia de Nuremberg par permete ce la nuremberganes coloni en vilas hansa, cual la franconianes esplotada par prende controla de la comersia con Sveria ance. La mercator nuremburgan, Albrecht Moldenhauer ia es influosa en la developa de la comersia con Sveria e Noria, e sua fios Wolf e Burghard Moldenhauer ia institui se en Bergen e Stockholm, deveninte xefes de la ativias local de la Hansa.

La fini de la Hansa

A la comensa de la sentenio 16, la alia ia descovre se en un posa plu debil ca lo ia ave per multe anios. La crese de la Impero Svensce ia prende controla de multe de la Mar Baltia. Danmarc ia regania controla de sua propre comersia, la stasion en Novgorod ia clui, e lo en Bruje ia deveni morinte. La sites individua de la alia ia comensa ance per pone sua propre intereses supra sua intereses comun como sites de la Hansa. Final, la autoria political de la prinses deutx ia comense crese, restrinjente la autonomia de la mercatores e vilas hansa.

La alia ia atenta trata con alga de esta cosas: el ia crea la posto de xef de syndic, la xef de la sindicato en 1556, e ia eleje Heinrich Sudermann como un ofisial permanente con educa legal, ci ia labora per proteje e estende la acordas diplomata de la membros. En 1557 e 1579,, acordas revisada ia detalia la debes de vilas e alga progresa ia aveni. La stasion en Bruje ia es moveda a Antwerp e la Hansa ia atenta abrinte vias nova. Ma la alia no pote preveni la competa cresente, e alora un declina longa ia comensa. La stasion en Antwerp ia clui en 1593, segueda par lo en London en 1598. La stasion en Bergen ia continua asta 1754; de tota la Kontores, sola sua construidas, la Bryggen, ia survive.

La barcon de gera jigante, la Adler von Lubeck, la plu grande en la mundo, ia es construida per usa militar contra Sveria en la Gera de Sete Anios norde (1563-1570), ma ia es usada nunca, cual ia esempli la atentas vana de Lubeck per reteni sua posto comersial longa vantajosa en un clima economial e political cual ia cambia rapida.

Per la sentenio 16 tarde, la alia ia implode e no pote trata plu con sua propre lutas interna. La cambias sosial e political cual acompania la Reforma Protestante, incluinte la asende de la mercatores nederlandes e engles e la presa par la Impero Osmanan sur la Impero Santa Roman e sua vias comersial. Sola 9 membros ia atende la asembla final en 1669, e sola tre (Lubeck, Hamburg, e Bremen) ia resta como membros asta la mori de la Hansa en 1862, pos la crea de la Impero Deutx su Kaiser Wilhelm 1. Sola esta tre reteni la parolas "Site de la Hansa" en sua titulos ofisial.