Istoria temprana de la turces
Lo es jeneral acordada ce la popla turcica prima ia abita en un rejion cual estende de Asia sentral este a Sibir, con la majoria de los abitante en cual es aora Xina. Lo es posible ce la popla turcica ia orijina a alga loca en Mandju o Xina norde-este e plu tarda ia adota un modo de vive nomada e ia comensa migra a la ueste. La grupo la plu temprana de popla turcica ia apare a la periferia de la federa de xiongnu sirca 200 aec, contempora con la dinastia Han de Xina. Los pote es relatada a la xiongnus, dinglinges, e tieles.
Tribus turcica, como la hazares e petxeneges, ia abita probable como nomadas per multe anios ante fundi la Hagania Turcica o la Impero Gocturc en la sentenio 6 ec. Los ia es pastores e nobiles ci ia xerca pastos nova e ricias. La prima refere a turces ia es en un testo xines cual nota comersia entre tribus turcica e la sogdianes longo la Via de Seda
La usa prima de la parola "turce" ia es en un refere en la sentenio 5 ec a cual es aora pronunsiada como Tujue. Un clan de turcicas ia migra a la Hagania Rouran per proteje de la xines. La tribu ia es forjores famosa e ia es donada un area con un monte escavada cual pare como un elmo, cual es la fonte de sua nom xines. Un sentenio plu, e la turcicas ia concista la ruoranes per crea la Hagania Turcica.
La popla turcica ia usa orijinal la runas orhon, e plu tarda la alfabeta uigur. Simboles nasional e cultural tradisional de la popla turcica inclui lupos, la color blu, fero, e foco. La blu nomida turcesa (cual deriva de la parola franses cual sinifia "turces") es la color de la petra ancora usada en joalas e como proteje contra la "mal oio".
On ia sujesta ce la xiongnu ia es parlores de un prototurcica. An si no multe es conoseda sur la lingua de la xiongnu — lo es posible un lingua linguas mongol — lo es probable ce a min un parte sinifiante de la tribus xiongnu ia parla turcica. La xiongnu ia es probable un federa miscada de etnicos e linguas, como multe imperos e haganias de Asia sentral.
En la sentenio 6, 400 anios pos la colasa de la xiongnu, la gocturces ia prende la xefia de la popla turces. Orijinal un parte de la federa de la xiongnu, la gocturces ia erita la sistemes de governa e la tradisiones de la xiongnu. Los ia uni la tribus nomada turcica en la Hagania Gocturc en Mongol e Asia sentral. Sua nom deriva de goc, cual sinifia "blu" o "sielo". La gocturces ia eleje sua haganes tempora de la clan de Axina, ma los ia es suordinada a la autoria de la consilio de xefes tribal.
La hagania ia reteni elementos de sua relijio orijinal, un forma de animisme e xamanisme cual ia evolui plu tarda a tengrisme. Los ance ia reseta misionores de monces budistes, e ia fusa budisme con sua relijio orijinal.
Popla turcica e grupos relatada ia migra a ueste de Xina norde-este, Mongol, Sibir, e Turcestan, a Europa este, Iran, e Anatolia en multe ondas. Pos multe batalias la turces oguz ueste ia fundi sua propre stato e plu tarda ia construi la Impero Osmanian.
En la Eda Medieval, soldatos turces en la armada de la Califia Abasi ia emerji como la renores vera de la plu de Asia sude-ueste (estra Suria e Egipte), spesial pos la sentenio 10. La oguz e otra tribus ia domina otra paises su la xefia de la dinastia Seljuc, ci ultima catura la teritorios de la abasis e la Impero Bizantian.
En la mesma eda, la cirgiz de la Rio Ienisei ia alia se con Xina per destrui la Hagania Uigur en 840. La popla cirgiz ia coloni ultima la rejion aora nomida Cirgistan. La balgares ia move entre la Mar Caspio e Mar Negra en la sentenio 5 e 6 ec, segueda par sua concistores, la hazares, ci ia converti a iudisme en la sentenio 8 o 9. Pos los, la petxeneges ia veni, creante un federa grande, cual ia es seguente prendeda par la cumanes e la ciptxaces.
Un grupo de balgares ia resta en la rejion de la Rio Volga e miscada con la suomis de la Volga, per deveni la balgares de la Volga en cual es oji Tatarstan. Esta balgares ia es concistada par la mongoles seguente sua puxa su la gida de Txingis Han en la sentenio 13. Otra balgares ia move a Europa sude-este en la sentenio 7 e 8, e miscada con la popla slavica, ultima adotante la lingua slavica cual nomida per la balgares: balgarsce.
