Serebro umana

La serebro es la organo sentral de la sistem de nervos umana, e con la medula spinal composa la sistem de nervos sentral. La serebro es composada de la telensefalo, la tronco de ensefalo e la serebreta. Lo controla la plu de la ativias de la corpo, prosedente, integrante, e coordinante la informa cual lo reseta de la organos de sensa, e fa desides sur la instruis enviada a la resta de la corpo. La serebro es contenida en, e protejeda par, la osos de la cranio de la testa.

La telensefalo, la parte la plu grande de la serebro umana, es composada de du emisferas serebral. Cada emisfera ave un nucleo interna composada de sustantia blanca, e un surfas esterna – la cortex serebral – composada de sustantia gris. La cortex ave un strato esterna, la neocortex, e un alocortex interna. La neocortex es composada de ses stratos neuronal, ma la alocortex ave tre o cuatro. Cada emisfera es divideda en cuatro lobes – la lobes fronte, tempal, parietal, e osipital. La lobe fronte es asosiada con funsionas de esecuta incluinte autorestrinje, plani, razona, e pensa astrata, ma la lobe osipital es dedicada a vide. En cada lobe, areas cortexal es asosiada con funsionas spesifada, como la rejiones sensal, motor, e de asosia. An si la emisferas sinistra e destra es jeneral simil en forma e funsiona, alga funsionas es asosiada con un lado, como lingua a sinistra e capasia vidal-spasial a destra. La emisferas es liada par vias de nervos, la plu grande esente la corpo calo.

La telensefalo es liada par la tronco de ensefalo a la medula spinal. La tronco de ensefalo es composada de la mesensefalo, la ponte, e la medula longida. La serebreta es liada a la tronco de ensefalo par tre duples de vias de nervos nomida pedunculos serebral. En la telensefalo es la sistem ventriculal, composada de cuatro ventriculos interliada en cual la licuida serebrospinal es produida e sirculinte. Su la cortex serebral es alga strutures importante, incluinte la talamo, la epitalamo, la glande pineal, la ipotalamo, la ipofise, e la sutalamo; la strutures limbica, incluinte la amigdalas e la ipocampos, la claustro, la nucleos variosa de la ganglios fundal, la strutures de la serebro fronte fundal, e la tre organos sircoventriculal. Strutures de la serebro cual no es a la plano media esiste en duples, per esemplo, on ave du ipocampos e du amigdalas. La selulas de la serebro inclui neurones e selulas glial suportante. On ave plu ca 86 bilion neurones en la serebro, e un cuantia plu o min egal de otra selulas. Ativia de la serebro es posible par la interlias de neurones e sua relasa de neurotransmetadores en responde a impulsas de nervos. Neurones lia per formi vias neuronal, sircuitos neuronal, e sistemes complicada de redes. La sircuitos intera es propulsada par la prosede de neurotransmete.

La serebro es protejeda par la cranio, suspendeda en licuida serebrospinal, e isolida de la flue de sangue par la blocinte sangue-serebro. Ma, la serebro es ancora capas de sufri dana, maladias, e infetas. Dana pote es causada par trauma, o un perde de furni de sangue conoseda como un ataca serebral. La serebro es capas de sufri desordinas dejenerante, como la maladia de Parkinson, dementias incluinte la maladia de Alzheimer, e sclerose multiple. Disturbas psiciatrica, incluinte scizofrenia e depresa clinica, es crededa como asosiada con malfunsionas de la serebro. La serebro pote ance es la loca de tumores, e noncanserosa e canserosa; estas orijina xef de otra locas en la corpo.

La studia de la anatomia de la serebro es neuroanatomia, ma la studia de sua funsiona es neurosiensa. Tecnicas diversa es usada per studia la serebro. Esemplos de otra animales, cual pote es esaminada microscopial, ia furni tradisional multe informa. Tecnolojia de imaji medical como neuroimaji funsional, e eletroensefalografes (EEG) es importante en la studia de la serebro. La istoria medical de persones con dana serebral ia furni intui a la funsiona de cada parte de la serebro. Rexerca de neurosiensa ia estende notable, e rexerca continua.

En cultur, la filosofia de mente ia atenta tra sentenios solve la demanda de la natur de consensia e la problem mente-corpo. La pseudosiensa de frenolojia ia atenta locali cualias de personalia a rejiones de la cortex en la sentenio 19. En naras siensal, transplanta de serebros es imajinada en naras como La Serebro de Donovan de 1942.