Alfabeta mianmar

La alfabeta mianmar (ance nomida la alfabeta burman) es un abugida usada per scrive la lingua mianmar. Lo es un desendente de la scrive brami, tra la alfabeta cadamba o palava de India sude, e plu resente un adapta de la scrives mon vea o piu. La alfabeta es ance usada per la linguas relijiosa pali e sanscrito. En desenios resent, otra alfabetas relatada, como xan e mon moderne, ia es restruturida seguente la norma de la alfabeta mianmar, cual es aora dominante.

La consonantes de la alfabeta mianmar

Un poster indicante la nom de un pagoda "Kyaik hmaw won ye le" (Yangon)

La alfabeta usa multe diacritos. Un consonante sin un diacrito ave la vocal [a], comun reduida a [ə] cuando un otra silaba segue en la mesma parola. Alga diacritos cambia esta vocal a un otra vocal (mianmar ave oto vocales e cuatro diftongos). La alfabeta ave ance diacritos per indica nasalia, tonos, e otra detalios. Mianmar es scriveda de sinistra a destra e neses no spasios entre parolas, an si scrive moderne tipal inclui spasios entre cada proposa per boni lejabilia.

La atesta plu temprana de la alfabeta es de 1035 ec, ma un molda fabricada en la sentenio 18 de un enscrive en petra sujeste 984 ec. Caligrafia mianmar ia segue orijinal un forma cuadro, ma la forma corente ia deveni plu comun de la sentenio 17 cuando scrives popular ia condui a la usa de folias de la palma e paper pliada nomida parabaics. Un stilo ta talia esta folias cuando on scrive linias reta. La alfabeta ia es multe alterada per conveni la fonolojia evoluinte de la lingua mianmar.