Area linguistica
Un area linguistica - ance conoseda como un area de converje, area de difusa, o sprachbund (deutx per federa de linguas, pronunsiada "xprahbund") - es un grupo de linguas cual ave cualias comun cual resulta de prosimia jeografial e contata lingual. Los pote es nonrelatada jenetical o sola destante relatada. Cuando partenis jenetical no es clar, la cualias de la area linguistica pote ave un aspeta falsa de relata. Cualias areal es la cualias comun de un grupo de linguas en un area linguistica.
Esemplos:
- La area balcan (xcip, romanian, elinica, turces, linguas slavica sude, e romani)
- La sucontinente indian (linguas indoiranian, linguas dravidian, linguas munda, e linguas bod-miama)
- Asia sude-este continental (linguas xinotibetan, linguas miau-iau, linguas tai-cadai, linguas austronesian, e linguas austroasiatica)
- Asia norde-este (linguas mongolica, linguas turcica, linguas tungusica, corean, e japanes)
- Australia (linguas de australianes orijinal)
- Mesoamerica (linguas uto-asteca, maia, linguas totonacan, linguas oto-mangean, e linguas mixe-zoce)
- Pueblo (zuni, linguas tanoan, ceres, hopi, e navaho)
- Costa norde-ueste de America norde (linguas salix, linguas uacaxan, linguas penutian, cutenai, linguas tximacuan)
- e otras.
On pote inclui ance la linguas de Europa, spesial la linguas romanica e linguas germanica, cual ia influe lunlotra de la eda de la Impero Roman.