La epoca pliosene es un epoca jeolojial cual estende de sirca 5.3 a 2.6 milion anios ante aora. Lo es la epoca du e la plu joven de la periodo neojen en la era senozoica. Lo segue la miosene e es segueda par la plestosene. La comensa de esta epoca es marcada par la inonda de la Mediteraneo, e la fini es marcada par la comensa de la glasis de la plestosene. La nom es de la elinica pleion ("plu") e kainos ("nova").

La temperatures de la surfas de la mares en la pliosene
Esemplos de intercambia de spesies entre la du Americas

(Per plu, vide Scala de edas jeolojial)

La temperatur promedia mundal en la pliosene media ia es 2 a 3 grados plu alta ca oji, la cuantia de diosido de carbono ia es la mesma como oji, e la altia promedia de la mares ia es 25 m plu alta. La glasias en la emisfera norde ia es efemera ante la comensa de la glasia estendeda sur Gronland cual ia aveni en la pliosene tarda sirca 3 milion anios ante aora. La formi de un glasia polal de la artica es indicada par un cambia subita en la proportio de isotopos de osijen e la cuantia de deponedas a la solo de la mares cual ia es transportada par jela flotante. Un periodo de fri cual ia aveni en la pliosene ia stimula probable la desapare de forestas e la sperde de savanas.

Paleojeografia edita

La continentes ia continua vaga, movente de locas a 70-250 km de sua locas presente. America Sude ia deveni liada a America Norde par la istmo de Panama en la pliosene, cual ia permete la intercambia de spesies e un elimina cuasi completa de la marsupiales grande e ungulatos nativa de America Sude. La formi de la istmo ia ave efetos major sur la temperatures global, car la corentes calda a la ecuator ia es parada e un sicle de fria de la Mar Atlantica ia comensa, con acuas fria de la artica e antartica ia causa un descrese de temperatures en la Atlantica aora isolida.

La colide de Africa e Europa ia crea la Mar Mediteraneo par bloci lo a la ueste e este. La borda entre la miosene e la pliosene es ance la eda de un crise en cual la Mediteraneo ia seci cuasi completa e ia deveni multe salosa, asta la Streta de Jibraltar ia abri 5.3 milion anios ante aora.

La cambias de la nivel de la mares ia esposa la ponte de tera (nomida Beringia) entre Alaska e Asia.

En la pliosene, partes de Noria e Sveria sude cual ia es prosima la nivel de la mares ia leva. En Noria, esta ia leva la plato de Hardangervidda a 1200 m. En Sveria, moves simil ia leva la montanias de la sude, cual forsa la Rio Eridanos antica de sua via orijinal a un via sude de Sveria.

Plantas e animales edita

La cambia a un clima plu fria, seca, e saisonal ia ave efetos grande sur la plantas pliosene, reduinte la spesies tropical mundal. Forestas de arbores caduca ia flori, forestas de coniferes e tundra ia covre multe partes de la mundo, e savana ia sperde. Forestas tropical ia es limitada a un banda magra sirca la ecuator, e desertos ia apare en Asia e Africa.

La animales ia es esensal moderna, an si los sur la continentes ia es alga plu primitiva ca oji. La omines reconosable - australopitecines - ia apare en la pliosene.

La colides de continentes ia furni lias per migras grande e la misca de spesies pasada isolida. Erbivores ia deveni plu grande, e la xasores spesialida ance. La mares de la pliosene ia conteni manatis e dugonges, focas e leones de mar, e selacos.

En America Norde, rodentes, mamutes, gomfoterios, e oposumes ia continua susedente, en cuando animales con ungulas ia diminui, incluinte la cameles, servos, e cavalos. Rinoseridos, nanipos, oreodontes, protosertidos, e calicoterios ia deveni estinguida. Borofajines, relatas de canes, e agrioterios, relatas de ursos, deveni estinguida. Ma otra carnivores, incluinte jeneras de mustelas, canes, e ursos. Bradipos teran, gliptodones (armadilos enorme), e armadilos vade norde pos la formi de la istmo de Panama. Tortugas jigante ia flori ancora en America Norde.

En Eurasia, rodentes ia susede bon, ma primates ia declina. Elefantes, gomfoterios, e stegodontios ia susede en Asia, e iracos ia migra a norde de Africa. La diversia de cavalos ia declina, ma tapires e rinoseros ia susede. Boves e antilopes ia susede, e alga spesies de camel ia migra a Asia de America Norde. Ienas e smilodones ia apare. Aligatores e crocodiles ia es estinguida en Europa cuando la clima ia deveni plu fria. Jeneras de serpentes venenosa ia continua crese cuando plu rodentes e avias ia evolui. Crotales ia apare prima en la pliosene.

Africa ia es dominada par ungulatos, e primates ia continua sua evolui, con la australopitecines ia apare en la pliosene tarda. Rodentes ia susede, e la cuantias de elefantes ia crese. Boves e antilopes ia continua diversi e ia pasa porcos en cuantias de spesies. Jirafas temprana ia apare. Cavalos e rinoseros moderna ia apare. Ursos, canes, e mustelas ia veni de America Norde e ia junta con gatos, ienas, e sivetas como xasores african, cual ia forsa ce ienas ajusta como forajores spesialida.

America Suda ia es invadeda par spesies de America Norde, e rodentes e primates norde ia misca con formas sude. Litopternos e notoungulatos, nativa a America Sude, ia es cuasi estinguida, estra la macraucenidos e toxodontios, cual ia survive. Mustelidos peti, coatis, e ursos ia migra de la norde. Gliptodontios, bradipos teran, la asendentes de cavias, pampaterios, e armadilos ia migra a la norde. La avias jigante deveni plu rara, e sola la titanis ia survive per un tempo, e ia migra a la norde.

La marsupiales ia resta la forma dominante de mamales australian, con erbivores incluinte uombates, cangarus, e la diprotodon enorme. Marsupiales carnivor ia continua xasa en la pliosene, incluinte dasiuridos, la tilasinos canin, e la tilacoleos gatin. La rodentes prima ia ariva en Australia. E la ornitorincos ia apare en Australia en la pliosene.