Abri la menu xef
Un mapa de Galia en la sentenio prima aec
Un elmo de oro de la sentenio 3 aec
Un sculta de Vercingetorix en Frans

La galos (latina: galli, elinica antica: Γαλάται) ia es un grupo de popla celta de Europa ueste en la eda de feto e la periodo roman (sirca de la sentenio 5 aec a la sentenio 5 ec). La area do los ia abita ia es conoseda como Galia. Sua lingua galo ia es la ramo major de la linguas celta continental.

La galos ia emerji sirca la sentenio 5 aec como la portores de la cultur de La Tene norde de la Alpes (sperdeda tra la area entre la rio Sen, la rio Reno media, e la rio Elbe alta). Per la sentenio 4 aec, los ia sperde tra multe de la area cual es aora Frans, Beljia, Espania, Portugal, Suiz, Deutxland sude, Osteraic, Txesco, e Slovensco, la resulta de sua controla de la via de comersia longo la sistemes de rios de la rios Ron, Seine, Reno, e Danubio, e los ia estende se rapida en Italia norde, la Balcanes, Transilvania, e Galatia en Anatolia.

Galia ia es nunca unida su un renor o governa singular, ma la tribus galo ia es capas de uni sua fortes en operas militar grande. Los ia ateni la culmina de sua potia en la sentenio 3 aec temprana. La Republica Roman ia crese pos la fini de la Gera Punica Prima, e ia crese la presa sua la area de influe de la galos. La Batalia de Telamon de 225 aec ia marca la comensa de un declina gradal de la potia galo en la sentenio 2 aec, asta la concista ultima de Galia en la Geras Galo de la desenio de 50 aec. Pos esta, Galia ia deveni un provinse de la Impero Roman, e la galos ia ajusta cultural a la mundo roman, e ia comensa la formi de la cultur ibride galo-roman.

La istoriste elinica Diodoro Siculo de la sentenio prima aec, ia descrive la galos como grande, forte, con pel blanca, capelas blonde e longa:

La galos es grande de corpo, con musculos ondante, e blanca de pel, e sua capelas es blonde, o no sola par natur, ma los ave la abita de crese esta color distinguinte cual natur ia dona. Per los es lava sua capelas en acua calcosa, e los trae sua capeles a retro de sua fronte a la nuca de sua colo... Alga de los rasa sua barbas, ma otra lasa lo crese un poca; e la nobiles rasa sua jenas, ma lasa la mustax crese asta lo covre sua boca.

En 58 aec, Julio Cesar ia comensa la Geras Galo e ia concista tota Galia per 51 aec. El ia nota ce la galos ia es un de la tre poplas xef en la area, con la acuitanianes e la belgas. La motiva de Cesar per la invade ia pare es sua nesesa per oro per paia sua detas e per un mision militar susedente per alti sua carera politica. La popla de Galia ia pote furni ambos. Tan multe oro ia es furada de Galia ce, pos la gera, la custa de oro ia cade par tan multe como 20%. An si los ia es tan corajosa como la romanes, la divide interna entre la tribus galo ia garantia un concista fasil per Cesar, e la atenta par Vercingetorix per unia la galos contra la invade roman ia aveni tro tarda. Pos la propri de Galia, un cultur miscada de galos e romanes ia comensa emerji.

La sosia galo orijinal ia es dominada par la clase de pretes nomida la druidas. La druidas ia es no la sola forte politica, e la sistem de politica ia es complicada. La unia fundal de politica galo ia es la tribu, cual es composada de un o plu de cual Cesar ia nomi pagi (la radis de la parola "pais"). Cada tribu ia ave un consilio de persones vea e saja, e a la comensa un re. Plu tarda, la esecutante ia es un judor sivil elejeda anial. Entra la tribu Aedui, per esemplo, la esecutante ia ave la titulo de vergobret, un rol simil a un re, ma sua potias ia es restrinjeda par la regulas donada par la consilio.

La grupos tribal ia es organizada en grupos supra-tribal plu grande cual la romanes nomi civitates (la radis de la parola "site"). Esta grupos ta es prendeda par la romanes en sua sistem de controla local, e esta civitates ta es ance la funda de la divides de Frans plu tarda entre bispias, cual ta continua asta la Revolui Franses.

An si la tribus ia es cosas political cuasi stable, Galia ia es divideda political, con minimal unia entre la tribus diversa. Sola en tempos spesial difisil, como la invade de Cesar, la galos ia pote uni su un xef singular como Vercingetorix. An alora, la linias entre la fratos ia resta clar.

La galos ia pratica un forma de animisme, donante cualias umana a lagos, rios, montes, e otra cosas natural, e dona a los un state cuasi divin. Ance, la adora de animales ia es comun. La animal la plu santa per la galos ia es la senglar, cual pote es trovada sur multe banderas militar, simil a la agila roman.

Sua sistem de dios e divas ia es flexable, con alga divines cual probable tota galos adora, e ance divines tribal e familial. Multe de la dios major ia es relatada a la dios elinica e roman. La dio xef adorada a la tempo en cual Cesar ia ariva ia es Teutates, la corespondente galo de Mercurio. La dio padral en adora galo ia es Dis Pater. Ma on ave no rejistra de un teolojia formal, sola un colie de tradisiones relatada e evoluinte.

Posible la parte la plu interesante de la relijio galo ia es la pratica de la druidas. Sua orijina no es serta conoseda, ma lo es clar ce los ia garda la secretes de sua ordina e ia ave potia forte sur la popla de Galia. Los ia declara sua direto per determina demandas de gera e pas, e donce ia ave un state "internasional". En ajunta, la druidas ia direta la relijio de galos comun e ia es cargada con la educa de la aristocratas. Los ia pratica ance un forma de esclui de la congrega de adorores, cual en Galia antica ia sinifia ance un separa de sosia secular.

Tra Galia, arceolojistes ia descovre multe minas de oro preroman (pe a min 200 en la Pirineos), cual sujesta ce los ia es multe rica. Lo es ance mostrada par trovas grande de mone e fabricadas variosa de oro. Arceolojia moderna sujesta forte ce partes de Galia ia es multe sivilida e rica. La plu ia ave contata con mercatores roman, e algas ia joia alias politica e stable con Roma. E los ia importa vino mediteraneo en cuantias grande.