Nederlandes (lingua)

Nederlandes (Nederlands)
Parlada en:	Nederland, Beljia, e Suriname, e ance par grupos plu poca en partes de Frans, Deutxland, e colonias nederlandes de la pasada.
Area:	Europa, America Sude e La Mar de Caribe
Tota parlores:	28 miliones
Ordina:
Familia:	Linguas germanica
State ofisial
Lingua ofisial de:	Nederland, Antiles Nederlandes, Beljia e Suriname
Regulada par:	Nederlandse Taalunie
Sifras
ISO 639-1	nl
ISO 639-2	dut (B)/nld (T)
SIL	nld
Locas do nederlandes es parlada.
Vide ance: Lingua – Lista de linguas

Nederlandes es un de la linguas germanica ueste, parlada par sirca 23 milion persones, la plu parte en Nederland, Beljia, e Suriname, e ance par grupos plu poca en partes de Frans, Deutxland, e colonias nederlandes de la pasada. El es relatada prosima a la otra linguas germanica ueste, como frisce, engles, e deutx, e plu distante a la linguas germanica norde. Nederlandes es un desendente de franco vea e es la jenitor de la lingua africans, un de la linguas ofisial de Africa Sude. Nederlandes e africanes es per la plu parte comprendable un a la otra, ma ave normas de spele e disionarios diferente e comites de regula separada. Nederlandes normal es la lingua normal de la areas major de parlores nederlandes e es regulada par la Nederlandse Taalunie ("Uni de Lingua Nederlandes").

La gramatica de nederlandes es simil a el de deutx, ma min complicada, como engles. La sistem de consonantes no ia ave la move de consonantes de deutx alta, e sembla plu la consonantes de engles e la linguas de Scandinavia. Como la plu de linguas germanica, nederlandes ave un sistem de silabas cual permete grupos complicada de consonantes. Multe persones nota la usa comun de fricantes velal (spesial ch e g, pronunsiada prosima la garga). La vocabulo de nederlandes es la plu germanica, plu ca engles. Nederlandes usa nomes composada de juntas de morfemes multe longa, simil a deutx e la linguas de Scandinavia.

Un dialeto de nederlandes, clamada vlaams, es parlada en Nederland sude-ueste e Beljia norde-ueste. La diferes es no plu ca la diferes entre engles en la Rena Unida e la SUA, e la plu en pronunsia. Ambos usa la mesma norma per scrive.

Per un esemplo, asi es la prea de nos Senior:

 Onze Vader,
 die in de hemelen zijt,
 geheiligd zij Uw naam.
 Uw rijk kome,
 Uw wil geschiede op aarde als in de hemel.
 Geef ons heden ons dagelijks brood,
 en vergeef ons onze schulden,
 gelijk ook wij vergeven aan onze schuldenaren.
 En leid ons niet in bekoring,
 maar verlos ons van het kwade.

Fonolojia

Consonantes

Nederlandes ave alga diferes notable de otra linguas germanica:

• Lo no ia partisipa en la move de consonantes cual ia aveni en deutx alta. tien /ti:n/ vs deutx zien, peper /pe:pər/ vs deutx pfeffer;
• Lo ia reteni la consonantes fricante velal de protogermanica cual ia es perdeda en la plu de otra linguas germanica. goed /ɣut/, nacht /naxt/;
• Lo ia desvosi plosivas final. brood /bro:t/, vs engles bread;
• Lo ia vosi la fricantes comensante parolas (estra alga dialetos de Holland norde). zeven /ze:və/, vs engles seven, deutx sieben;
• Lo ia sustitui /d/ per /θ/ como la plu de linguas germanica. donder /dondər/, vs engles thunder;
• Lo ia sustitui /ss/ per /xs/. vossen /vosən/, vs engles foxes, deutx Füchse;
• Lo sustitui /xt/ per /ft/. sacht /saxt/, vs engles soft.

	Bilabial	Labio-dental	Alveolal	Postalveolal	Velal/ Uvulal	Glotal
Nasal	m		n		ŋ
Esplodente	p b		t d		k	(ʔ)
Fricante]		f v	s z	ʃ ʒ	x ɣ	ɦ
Vibrante			r/ɾ/ʀ/ʁ dependente de dialeto
Prosiminte	ʋ		l		j

Vocales

Nederlandes ave un colie multe grande de vocales e diftongos:

Corta, laxe

	Fronte Nonronda	Fronte Ronda	Sentral	Retro
Cluida	ɪ	ʏ
Media	ɛ		ə	ɔ
Abrida				ɑ

Longa, tensa

	Fronte nonronda.	Fronte ronda.	Back
Cluida	i ~ i:	y ~ y:	u ~ u:
Media-cluida	e:	ø:	o:
Media-abrida	ɛ:	œ:	ɔ:
Abrida	a:

Corta, laxe

	Fronte nonronda	Fronte ronda	Retro
Cluida
Media	ɛi	œy	ɔi
Abrida			ɑu ɑi

Longa, tensa

	Fronte nonronda	Fronte ronda	Back
Cluida	iu	yu	ui
Media	e:u		o:i
Abrida	a:i

Spele

Nederlandes es scriveda con la alfabeta latina. Lo usa un letera estra: la digram IJ/ij (pronunsiada /ɛi/). La spele es cuasi fonemal, con la usa de leteras duple per indica la vocales longa e otra trucos. Sinietas es rara.

Gramatica

Nederlandes es simil gramatical a deutx. Ma lo ave sola un caso per nomes, no cuatro como deutx, e du sesos, no tre como deutx. Jeneral, la gramatica es plu simple.

Pronomes

La lingua usa du sesos - comun e neutra. En Beljia, los reteni la distingui entre mas e fema, cual ia es combinada en la comun en la norde.

On ave du series de pronomes personal - sujeto e ojeto - e formas per determinantes de posese. Alga de los ave un distingui entre formas asentuada e nonasentuada (la nonasentuada es en brasetas, a su).

person	sujeto	ojeto	det. de posese
1 singular	ik ('k)	mij (me)	mijn (m'n)
2 singular, nonformal	jij (je)	jou (je)	jouw (je)
2 singular, formal	u	u	uw
3 singular, mas	hij (ie)	hem ('m)	zijn (z'n)
3 singular, fema	zij (ze)	haar ('r, d'r)	haar ('r, d'r)
3 singular, neutra	het ('t)	het ('t)	zijn (z'n)
1 plural	wij (we)	ons	ons
2 plural, nonformal	jullie (je)	jullie (je)	jullie (je)
2 plural, formal	u	u	uw
3 plural, person	zij (ze)	hun (ze)	hun
3 plural, cosa	zij (ze)	die (ze)	-

Determinantes

La sistem de casos en nederlandes, como la usa de la sujuntiva, ia es, per la plu parte, desapareda. Per la pronomes, la dativa vea ia sustitui per la caso acusativa.

	Masculine	Feminine	Neuter
Definite singular	de man	de vrouw	het huis
Definite plural	de mannen	de vrouwen	de huizen
Indefinite singular	een man	een vrouw	een huis

En alga espresas fisada, la jenitiva e dativa (e la distingui entre mas e fema) esiste ancora en la articles:

	Mas singular	Fema singular	Neutra singular	Plural
Nominativa	de	de	het	de
Jenitiva	van de / des	van de / der	van het / des	van de / der
Dativa	(aan / voor) de	(aan / voor) de	(aan / voor) het	(aan / voor) de
Acusativa	de	de	het	de

Alga de esta espresas usa un corti de "des": 's morgens (en la matina), 's ochtends (en la sera).

Nomes

Plural

La plural de nomes es la plu comun formida par la ajunta de -en (pronunsiada como /ən/ or /ə/), o de -s. Parolas de un silaba normal usa -en:

deur "porte" → deuren

boot "barcon" → boten

huis "casa" → huizen

dief "furor" → dieven

Parolas cual fini con /ə/ usa comun -s, ma multe usa -n, spesial nomes derivada de ajetivos:

tante "tia" → tantes

chocolade "xocolada" → chocolades

grote "grande (nom)" → groten

Parolas relativa moderna cual fini en un vocal longa usa -'s, estra ce los fini en -ee o -é, cual usa simple -s:

pizza "piza" → pizza's

radio "radio" → radio's

Alga nomes ave plurales noncoerente:

dag "dia" → dagen "dias"

schip "barcon" → schepen "barcones"

ei "ovo" → eieren "ovos"

kind "enfante" → kinderen "enfantes"

Diminuintes

En nederlandes, la forma diminuinte de nomes es usada comun, e inclui diferes de sinifia sutil cual es difisil per aprendores. La fini difere dependente de la letera final de la radis:

• -je per radises cual fini con -b, -c, -d, -t, -f, -g, -ch, -k, -p, -v, -x, -z o -s: neef → neefje ("sobrino, cusin mas")
• -pje per radises cual fini con -m: boom ("arbor") → boompje
• -kje per radises cual fini con -ing: koning ("re") → koninkje
• -tje per radises cual fini con -h, -j, -l, -n, -r, -w, o vocales estra -y: zoen ("besa") → zoentje

La diminuinte pote es usada ance con alga numeros, pronomes, verbos, e an preposadas en espresas idiomal. Notable es la ajetivos e averbos con un diminuinte:

• groen ("verde") → noun: groentje ("comensor")
• even ("mera") → adverb: eventjes ("mera un minuto").

Cuando usada con tempo, la diminuinte pote indica esce un person trova lo plasente o no:

• een uurtje kletsen ("parleta per un ora peti")

Lo pote es ance usada per indica alga cosa negativa:

• Hij was weer eens het "mannetje". ("el ia ata como el ia es la om peti")

Nomes composada

Como la plu de linguas germanica, nederlandes forma nomes composada en cual la nom prima ajunta defini a la categoria de la nom du, pe hondenhok (casa de la can), boomhuis (casa en un arbor), etc. A veses, esta nomes composada pote deveni multe longa. Un de la plu longa es ziektekostenverzekeringsmaatschappij (compania de asecura de sania).

Ajetivos

La infleta de ajetivos es plu complicada. Con un nom neutra, nondefinida, e singular, la ajetivo ave no afisa; en tota otra casos, lo fini con -e.

	Mas o fema singular	Neutra singular	Plural
Definida (con article definida o un pronom)	de mooie fiets (la bisicle bela)	het mooie huis (la casa bela)	de mooie fietsen (la bela bisicles) de mooie huizen (la casas bela)
Nondefinida (con article nondefinida o no article o pronom)	een mooie fiets (un bisicle bela)	een mooi huis (un casa bela)	mooie fietsen (bisicles bela) mooie huizen (casas bela)

Un ajetivo ave no -e si lo es en un rol predicativa.

Cuando usada como un completinte, ajetivos usa nunca la -e: De soep is koud.

Verbos

Nederlandes ave cuatro tipos de verbos: debil, forte, noncoerente, e miscada.

La verbos debil es la plu comun - sirca 60%. En estas, la tempo pasada e la partisipio pasada es formida con -de o -te.

Verbos forte es numero du en cuantia. Asi, la pasada es formida par cambia la vocal de la radis. Esta no es tota coerente, e nederlandes distingui entre sete clase de verbos forte, de cual sinco ave un varia interna cual permete 12 sistemes.

Clase	Verbo		Presente	Pasada	Perfeta
1	kijken	(regarda)	kijk	keek	gekeken
2a	bieden	(ofre)	bied	bood	geboden
2b	stuiven	(jeta)	stuif	stoof	gestoven
3a	klimmen	(trepa)	klim	klom	geklommen
3b	zenden	(envia)	zend	zond	gezonden
4	breken	(rompe)	breek	brak	gebroken
5a	geven	(dona)	geef	gaf	gegeven
5b	zitten	(sede)	zit	zat	gezeten
6a	dragen	(porta)	draag	droeg	gedragen
6b	heffen	(leva)	hef	hief	geheven
7a	roepen	(clama)	roep	riep	geroepen
7b	vangen	(catura)	vang	ving	gevangen

Verbos miscada es los con un tempo pasada debil (-de o -te), ma un partisipio pasada forte (-en), o un tempo pasada forte, ma un partisipio pasada debil.

La verbos noncoerente es la min comun, ma la plu usada.

Conjuga

Infinitiva	-en
Indicante
	Presente	Pasada debil	Pasada forte
1 sing.	-	-de, -te	-
2 sing. jij	-(t)	-de, -te	-
2 sing./plur. u	-t	-de, -te	-
3 sing.	-t	-de, -te	-
Plural	-en	-den, -ten	-en
Sujuntiva
	Presente	Pasada debil	Pasada forte
Singular	-e	-de, -te	-e
Plural	-en	-den, -ten	-en
Imperativa
Jeneral	-
Plural	-t
Partisipios
	Presente	Pasada debil	Pasada forte
	-end	ge- -d, ge- -t	ge- -en

Ordina de parolas

Como deutx, nederlandes ave un ordina de parolas sujeto-ojeto-verbo, ma en proposas major, la verbo major es moveda a la loca du, un sistem conoseda como V2 ("verbo du"). Per esemplo: On ta dise Ik kan mijn pen niet vinden omdat het veel te donker is, cual pote es traduida como "Me no pote trova mea pen car lo (la sala) es multe tro oscur". Si on rompe la frase a un proposa major e un proposa minor, on pote vide plu clar la lojica:

• Ik kan mijn pen niet vinden
  • "me pote mea pen no trova"
• omdat het veel te donker is
  • "car lo multe tro oscura es"

Verbos es poneda en la loca final, ma la verbo conjugada en la proposa major, en esta caso "kan" (pote), es fada la parte du de la proposa.

En demandas, la proposa major ave tipal la verbo conjugada segueda par la sujeto, ma otra verbos es en la loca final:

• Kun jij je pen niet vinden? (leteral "Pote tu tua pen no trova?") "Tu no pote trova tua pen?"

En demandas cual comensa con pronomes o averbos de demanda, la verbo conjugada es parte du, con la sujeto a pos; otra verbos es a la loca final:

• Waarom kun jij je pen niet vinden? (leteral "Perce ia pote tu tua pen no trova?") "Perce tu no ia pote trova tua pen?"

Vocabulo

La vocabulo de nederlandes es, per la plu parte, germanica, con sirca 20% de otra orijinas. La influe plu grande ia es de franses, con sirca 6.8%. Latina furni parolas de relijio e siensa, con sirca 6.1%. Deutx e platdeutx ia contribui sirca 2.7%, an si multe ia es cambiada per conveni la fonetica de nederlandes. E, spesial en la sentenios resente engles ia contribui sirca 1.5%, an si multe plu es espetada en la futur.