Jergo

Jergo es lingua (parolas, espresas, etc) de un modo nonformal cual membros de grupos spesial como adolesentes, musicistes, o criminores prefere en loca de un lingua plu normal, per institui un identia per la grupo, per esclui los ci no parteni a la grupo, o ambos. Jergo es comun usada en un modo cual, a veses, persones de un state sosial plu alta ta critica los ci usa lo.

Linguistes no ave un defini simple e clar, ma acorda ce jergo es un fenomeno linguistica continual cambiante e un parte de cada sucultur tra la mundo. Algas sujesta ce jergo esiste car nos debe crea modos per defini esperias nova cual ia aveni con tempo e modernia. Linguistes Bethany K. Dumas e Jonathan Lighter ia atenta remedia la asentia de un defini clar par sujesta ce un espresa pote es videda como "jergo vera" si lo ave du de la cualias seguente:

1. Lo basi, si sola tempora, "la dinia de scrive o parla formal o seria"; en otra parolas, lo es tipal videda en esta contestos como un malusa clar de stilo.

2. Lo usa de lo sujesta ce la usor conose a cualce lo refere, o con un grupo de persones ci conose lo e usa la espresa o parola.

3. Lo es un parola o espresa cual es "tabu" en conversa con persones de un state sosial plu alta o potiosa.

4. Lo sustitui per un sinonim comun e bon comprendeda, per evita descomforta causada par la sinonim normal o la irita de la nesesa de esplica plu.

Jergo es comun traeda de media sosial como un sinia de consensa sosial e conose compartida de cultur popular. Esta ramo de jergo ia deveni plu comun pos la sentenio 21 como la resulta de la crese en popularia de redi, incluinte Facebook, Twitter, e Instagram. Estas ia crea vocabulos nova asosiada con cada media sosial nova como la usa de friending (engles per "amini"), usante un forma verbalida de friend (ami). Otra esemplos de la jergo de media sosial inclui un move jeneral a parolas cortida e acronimes. Twitter es spesial notable per cortis, car lo permete un cuantia limitada de sinias en un mesaje. Esta inclui la usa de hashtag (engles per "grilia") per indica la conteni xef de un mesaje o imaje, pe #comedas, #gatos, etc.

Esemplos

jergo cultural - un jergo de un etnico e sucultur, comun per mostra un identia separada de la majoria

• shelta - un combina de eres e engles, con la plu de parolas de eres e un gramatica plu como engles, e con parolas contorseda o prendeda de romani, usada par la travellers ("viajores", pd nomadas) eres.
• caló (o pachuco) - un combina de espaniol e engles usada en la desenios de 1930 e 1940, par seguores de la cultur pachuco en sites longo la borda entre Mexico e la SUA.
• jergo rimante - engles con parolas creada par crea un rima de un parola e usante sola parte de la rima, pe bread ("pan") per money ("mone") via bread and honey ("pan e miel"); orijinal usada par abitantes de London este (la area conoseda como Cockney), ma aora usada par multe otras.

jergo criminal - un jergo per comunica entre membros de la mundo criminal, e entre prisonides, e per oscuri intendes de la autoriosas, pd polisiores, gardores, etc. Pe:

• rotwelsch - deutx con parolas ides e romani, usada par criminores en Deutxland.
• bargoens - nederlandes con multe parolas de ides, usada par criminores e otras en Nederland en la sentenios 19 e 20.
• grypsera - polsce con parolas de deutx e de otra linguas slavica, usada par criminores en Polsca.
• fenia - rusce con parolas contorseda en modos variosa.
• louchébem - franses contorseda e desemblada par ajunta leteras o silabas en parolas, usada en la sentenio 20 temprana par prisonides, criminores, e par la resistentes en la Gera Mundal Du.

jergo de jovenes - un jergo tipal usada par adolesentes, per mostra parteni en un grupo e oscuri intendes de enseniores, jenitores, polisiores, e membros de otra grupos.

• verlan - franses usante parolas contorseda, comun par reversa silabas.
• pig latin ("latina de porcos") - engles con parolas desemblada par move silabas e ajunta leteras, usada par jovenes.
• nadsat - un jergo creada par Anthony Burgess per sua novela "A Clockwork Orange", per la jovenes crimin de la nara, un misca de engles e rusce.

jergo omosesal, jergo de musicistes, jergo de teatre, etc - jergos de grupos spesial, usada per mostra identia e comunia; los adota comun la parolas e espresas de lunlotra, e de otra linguas e jergos. Pe:

• polari - un combina de parolas de italian, franses, ides, e lingua franca, plu comun usada par ges engles de la sentenio 20 temprana.
• gayle - un combina de engles, africans, e linguas bantu, usada par ges en Sudafrica
• jive (djaiv) - un forma de engles, forte influeda par la engles de african-americanes, usada par musicistes e otras en la sentenio 20 temprana.
• lunfardo - espaniol e italian, orijinal usada par criminores, ma aora par multe otras en la area de Buenos Aires, popularida par la usa en la musica de la tango.

jergo tecnical - parolas tecnical xef usada per comunica fasil en campos de pratica e studia, e tipal no per oscuri intendes, ma ance usada per mostra parteni en un elite de espertas o autoriosas.

Referes

Dumas, Bethany K.; Lighter, Jonathan (1978). Is Slang a Word for Linguists?. American Speech. 53 (5): 14–15. doi:10.2307/455336.