Idiom neutral

Idiom neutral (')
Creada par:	Waldemar Rosenberger
Anio:	1902
Tota parlores:
Familia:	Linguas construida  lingua aidante internasional
Fonte:	Developada como un forma revisada de volapük
State ofisial
Regulada par:
Sifras
ISO 639-1:	[1]
ISO 639-2:	[2]
ISO 639-3:	[3]
SIL:	[4]
Mapa
Vide ance: Lingua – Lista de linguas

Idiom neutral es un lingua aidante internasional, publicida en 1902 par la Akademi Internasional de Lingu Universal, su la xefia de Waldemar Rosenberger, un injenior de San Petersburg, Rusia.

Istoria

La Academia, creada con la nom Kadem bevünetik volapüka a la confere en Munich en agosto 1887, ia es fundida per conserva e perfeti la lingua aidante volapük. Su la xefia de Rosenberger, ci ia deveni la dirijor de la Academia en 1892, la grupo ia comensa cambia la gramatica e la vocabulo. La plu de la vocabulo ia es cambiada a parolas plu simil a los de la linguas de Europa ueste, e formas gramatical de volapük cual no ia es simil a esta linguas ia es desprendeda. La resulta ia es un lingua nova, cual ia es nomida "idiom neutral". La nom de la Academia ia es cambiada a "Akademi Internasional de Lingu Universal" en 1898.

Disionarios con la gramatica ia es publicida en linguas european diversa en 1902 e 1903. Rosenberger ia comensa publici un jornal nomida Progres. La lingua ia es un de la linguas considerada en la confere de linguistes cual ia reuni en Paris en 1907 per eleje un lingua aidante internasional. La confere ia eleje ido, un varia de esperanto.

En 1908, la Akademi ia abandona idiom neutral per latino sine flexione, un simpli de latina creada par la matematiciste Giuseppi Peano. Peano ia es asiniada como la dirijor nova de la Akademi, e la nom ia es cambiada a Academia pro Interlingua.

En 1912, Rosenberger ia publici un varia reformada de idiom neutral nomida reform-neutral.

Spele e pronunsia

Idiom neutral usa 22 leteras de la alfabeta latina. La vocales es pronunsiada como en espaniol, e du vocales es pronunsiada separada, no como diftongos. La consonantes es pronunsiada como en elefen, estra ce c es pronunsiada como "tx" en lfn, sh como "x", k es usada per "c", e y per "i" consonantal. La leteras q, w, x e z no aveni. La regulas per asentua es simil a los de elefen. Esetas es indicada par un sinieta agu.

Gramatica

Idiom neutral no ave infletas per la casos gramatical. La plural es indicada par ajunta i a la fini de la parola.

Normal, ajetivos segue sua nomes. Ajetivos no cambia per acorda con sua nomes.

Per compara ajetivos, on usa plu... ka..., minu... ka..., leplu..., leminu..., e tale... kuale....

Tota ajetivos pote es usada como nomes, como en elefen.

Idiom neutral no ave articles de defini o nondefini.

Averbos es creada par ajunta e a ajetivos.

Alga preposadas es creada de otra parolas par ajunta u. Per esemplo, la ajetivo relativ deveni relativu (relativa a...).

Pronomes

		singular		plural
person	seso	sujeto/ojeto	posese	sujeto/ojeto	posese
1	–	mi	mie	noi	nostr
2	–	vo	votr	voi	vostr
3	mas	il	sie	ili	lor
	fema	ila		ilai
	cosa	it		ili

• on - on
• se - se (refletante)
• sue - sua (posesal de refletante)

Pronomes de mostra:

• ist, ist-kos, isto, ista, isti, ist-kosi - esta (jeneral, cosa, mas, fema, plural, cosas plural)
• el, el-kos, elo, ela, eli, el-kosi - acel (jeneral, cosa, mas, fema, plural, cosas plural)

Pronomes de demanda e relata:

• ki - ci
• kel, kekos, kelo, kela, keli, kekosi - ci, ce, cual (jeneral, cosa, mas, fema, plural, cosas plural)

Verbos

• Infinitivo: amar - ama
• Presente: mi am - me ama
• Pasada: mi amav - me ia ama
• Futur: mi amero - me va ama
• Ipotesal/sujuntiva: mi amerio - me ta ama

Comandas:

• Comanda, person du singular: ama! - (tu debe) ama!
• Comanda, person du, plural: amate! - (vos debe) ama!
• Ortativa, person un, plural: amam! - nos debe ama, ta ce nos ama!

Partisipios:

• Partisipio ativa/presente: amant - amante
• Partisipio pasiva/pasada: amed - amada

La formas perfeta (e la pasada de la ipotesal/sujuntiva) es creada con la verbo avar (ave) e la partisipio pasiva:

• Presente perfeta: mi av amed - me ama ja, me ia ama ja (ante aora)
• Pasada perfeta: mi avav amed - me ia ama ja (ante alora)
• Futur perfeta: mi avero amed - me va ama ja (ante alora)
• Ipotesal/sujuntiva pasada: mi averio amed - me ta ama (en la pasada)

La formas pasiva es creada con la verbo esar (es) e la partisipio pasiva:

• mi es amed - me es amada
• mi averio esed amed - me ta es amada
• etc

Per un gramatica completa, vade a https://web.archive.org/web/20110722025331/http://www.pagef30.com/2010/05/complete-grammar-of-idiom-neutral.html

Esemplos

Aparati deb esar adresed a shef de stasion Peterburg e deb esar asekured per vo e per votr kont; if aparati u partii de ili esero ruined u perded in voyaj, vo deb mitar nemediate otri, plasu aparati e partii ruined u perded.

"La aparatos debe es dirijeda a la xef de la stasion de san Petersburg e debe es securida par tu e par tu conta; si la aparatos o partes de los es ruinada o perdeda en la viaja, tu nesesa envia otras direta en loca de la aparatos e partes ruinada o perdeda."

Publikasion de idiom neutral interesero votr filio, kel kolekt postmarki, kause ist idiom es lingu praktikal pro korespondad ko kolektatori in otr landi.

"La publici de idiom neutral va interesa tu fio, ci colie selos de posta, car esta lingua es un lingua pratical per coresponde con coliores en otra paises."

Fonte

• Diksionar de Idiom Neutral par M.A.F. Holmes (1903).
• Complete grammar par M.A.F. Holmes (1903).