Medica e fisiolojia temprana
Sempre un parte de filosofia, psicolojia ave ance lias prosima a biolojia, spesial fisiolojia umana e medica. En cuando la mente es en alga modo juntada en alga modo a la corpo, esta es nonevitable. Ma, como tu sabe, lo ia prende un cuantia de leveri per libre la mente separa de sua lia relijiosa con un spirito nonmortal ante acel lia intima ia es asetada!
La anticas edita
"La mediciste prima", a min como la elinicas ia sabe, ia es Asclepio. El ia inisia un sosia o corpora cuasi mistica de medicistes cual ta ave un influe per multe sentenios seguente. En acel tempo, el ia gania la prestijia de un dio. An Socrate, cuando el ia reposa morinte de un supradosa de conio, ia instrui sua studiante Crito per sacrifia un gal per Asclepio, suposada per grasia el per un mori fasil.
Plu clar istorial es Acmeon de Croton (naseda 435 aec) en Italia sude. Un pitagorian en sua filosofia, el ia es conoseda per sua studias anatomial. El ia es la person prima de ci nos ave un rejistra, ci ia disesioni la oio e ia descovre la nervo otical. Sua teoria de mente ia inclui la idea ce la serebro es la loca de persepi e pensa, e ce on ave lias de tota sensas a la serebro. El ia crede ce lo ia es pneuma, sinifiante la respira o la spiritos animal, cual core tra la corpo como siniales neuronal.
Maladia, el ia teorida, es a min en parte la resulta de un perde de ecuilibra en la corpo. El proposa un colie de oposantes, spesial caldia e fria, moiada e seca, e amargia e dulsia, cual nos nesesa ecuilibra per manteni nosa sania, par controla nosa temperatur, nuri, etc.
Hipocrate (naseda 460 aec) de Cos en Anatolia, es plu bon conoseda. El ia es un Asclepiad, pd un membro de la corpora medical, e es la scrivor de la Jura Hipocratal (ma nota ce, contra crede popular, poca medicistes es obligada per jura esta o cualce otra promete!). Contra sua eleva, el ia prefere evita interpretes mistica e resta prosima a la evidentes empirical. Per esemplo, en un tese nomida Sur la maladia santa (epilesia), e ia rejeta la teoria comun de posese par demones, e ia sujesta ce lo ia es un maladia de la serebro eritada.
El es ance conoseda per sua teoria de umores. Seguente tradisiones elinica, on ave cuatro sustantias fundal: tera, acua, aira, e foco. Cada de estas ave un umor corespondente (un licuida biolojial) en la corpo: bile negra, muco, sangue, e bile jala, en acel ordina.
Esta umores, como la cuatro sustantias fundal, varia longo du dimensiones, calda - fria, moiada - seca, como esta:
| moiada | seca | |
| calda | aira/sangue | foco/bile jala |
| fria | acua/muco | tera/bile negra |
Como Acmeon ia dise, la taxe de la mediciste es la restora de ecuilibra cuando la proportios relativa de esta umores ia es disturbada. Ipocrates ia ance nota alga lias emosial a esta umores.
On debe nota ce, estra la teoria strana de umores, Hipocrates e, con el, Platon ia reconose coreta la importa de la serebro. Alga tempo plu tarda, sirca 280 aec, Erasistrato de Cios ia disesioni la serebro e separada la partes variosa.
Per la plu parte, natural, medica en esta sentenios, e en multe sentenios seguente, ia e composada de un misca de aida prima - la repara de osos, per esemplo - e remedias erbal, plu un cuantia de prea a la dios per interveni miraclosa!
En la Impero Roman, un otra mediciste ia gania fama cual ta dura tra la eda medieval. Galen ia nase en 130 ec en Pergamon en Anatolia - un sentro major de instrui a acel tempo. El ia vade a Alexandria - la sentro la plu major de instrui! - per studia anatomia. En la Impero Roman desesioni de umanas no ia es permeteda, fundida, natural, sur la teme superstisiosa de venja par la spiritos, no sur cualce sentis de dinia umana! Donce, Galen ia studia la primates grande en loca de umanas.
Con 28 anios, el ia reveni a sua propre pais per un periodo per servi como un sirurjiste per la gladiatores. Sua fama ia sperde, e el vade a Roma.
En ajunta a un cuantia grande de bon avisa concreta, el ia teori ce tota vive es fundida sur pneuma o spirito. Plantas ia ave un "spirito natural", cual causa crese. Animales ave un "spirito vivosa", cual permete move. E umanas ave un "spirito animal", de la parola anima, sinifiante la spirito mesma, cual es la funda de pensa. El ia crede ce la fluente serebrospinal es la spirito animal, e el ia nota ce lo es trovada en la vesiculas de la serebro en ajunta a en la corda spinal. El ia crede ce el ia viaja tra la nervos a la musculos, e ance de la organos de la sensas a la serebro. No mal!
Lo ia es Galen ci ia ajunta la idea de temperas a la cuatro umores:
| sangue | otimiste ("sanguin") |
| muco | nonajitable ("flegmatica") |
| bile jala | coler ("colerica") |
| bile negra | triste ("melancolica") |
Nota ce multe linguas ancora usa alga de la parolas en sinias de sita, e usa termas como "el ave un bon umor", "el ave un mal tempera" (como en "temperatur"), "el ave un umor seca", e "el es un testo calda". Disturbas entre esta states psicolojial, Galen ia crede, ia es causas partal de maladias. Natural, esta ia es la tipolojia psicolojia prima! Lo ia ave alga influe sur psicolojistes tan diversa como Alfred Adler, Ivan Pavlov, e Hans Eysenck. Los no crede leteral en la umores, ma los nota ce la tipos ave un realia.
La renase de medica edita
Sola pos multe sentenios nos pote vide alga progresa real en medica e fisiolojia. En 1316, Mondino de Luzzi ia publici la prima testo european sur anatomia, nomida conveninte Anatomia. Temprana en la sentenio de 1500, Leonardo da Vinci, crea multe desinias de cranios e serebros (e otra partes de la corpo), e an un molda de la ventriculos. En 1561, Gabriele Fallopio ia publici Oservas Anatomial, en cual el descrive, entre multe otra cosa, la nervos cranial e, natural, la tubos falopian (entre la garga e la oreas interna).
Progresa real debe resta per la inventa de la microscopio par Zacharias Jansen de Middleburg, Nederland, en 1595 (o par sua padre, Hans). Lo ta es refinada par Antonie van Leeuwenhoek en Nederland, Galileo en Italia, e Robert Hooke en England. (Nota ce, prosima pos, en 1608, un visina de Jansen, un om deutx nomida Hans Lippersberg ia inventa la telescopio.)
Un otra aveni major ia es la esplica par William Harvey (1578-1657) de la sirculi de la sangue en 1628. La plu medicistes, ancora usante la testo de Galen, ia crede ce la sangue esflue e enflue como un marea tra la corpo intera!
Sentros de educa medical ia developa en la universias a Padua, Italia e Leyden, Nederland. Asi, studiantes ia studia anatomia, fa operas pos mori, e an toca cual nos ta nomi aora patolojia. La ia fa studias de casos curante, con mesuras detaliosa.
Neurofilsiolojia ia developa paralel a tota otra developas medical e fisiolojial. On pote punta a la descrive anatomial de la serebro par Thomas Willis en 1664 como la prima paso major. Sua libro ia es imajida par Christopher Wren, la artiste e arciteta engles multe famosa. Willis ia crea la terma "neurolojia" en 1681. La sirculo de Willis - un sirculo de arterias su la serebro ia es descovreda par el e es nomida per el.
Un contribuor sinifiante a la developa de nos comprende de la serebro ia es no otra ca nosa ami vea, Rene Descartes. El ia proposa un sistem dualiste con un mente/spirito interatante con la serebro/corpo par un media de spiritos animal ("pneuma"). La vole (un aspeta de nosa spiritos) entra la serebro como animal spiritos tra la glande pineal, interata con la organiza de la nervos cual representa abituas instituida, corsa tra la nervos (videda como tubos pico) a la musculos, do lo causa ce los contrata e donce produi un condui! En la mesma modo, atas sur la neurones sensal presa sur la spiritos animal, cual corsa tra la nervos a la serebro, influente la strutur de la serebro par repete, e pasante a la spirito como persepis.
A veses, la atas de la sensas resulta en cuasi direta respondes par la musculos. Esta ta es nomida reflexes par un paisan de Descartes, Jean Astruc, e los ia es definida como sicles de ata cual no nesesa la interveni de la mente o spirito. Descartes ia inclui condui multe plu complicada como reflexes ca nos ta inclui oji.
Pasiones (cual nos ta nomi emosias) ance veni de estra la corpo, esensal como sensas. Los condui a un varia de cambias fisiolojia en ajunta a reflexes: On vide un urso, nos core a via de lo! En animales, esta pasiones es no plu ca sensas e reflexes. Ma nos esperia los con nosa mente/spirito como mervelia, ama, odia, desira, joia, e trisia, e sentis de combinas.
Esta ideas de Descartes, min la spirito, ta es promoveda par Julien Offay de la Mettrie (1709-1751) en un libro multe influente nomida Umanas como macinas (1748). Robert Whytt (1714-1766) ta ordina plu tarde la fundas neurolojia de la reflexe, e introdui la termas stimula e responde. En 1791, Luigi Galvani ia reali esta consetas con sua esperimentas famosa de stimula con eletrica la nervos de la gamas de ranas.
Sirca 1721, Dama Mary Montegu ia introdui un pratica medical strana cual el ia vide cuando visitante Turcia: vasini. En loca de permete ce un caso sever de variola dana sua pel, femes joven ia usa un poca pus de algun con un caso nonsever e injeta los su sua pel. No rie! Oji, persones ia injeta se con la venena botox per redui plietas de sua pel. Edward Jenner, plu tarde, ia comensa vasini persones contra la variola par vasini los con un varia de variola en boves. La anticorpos produida pos vasini resulta en la person deveni imune a variola en ajunta a plu casos de la varia en boves.
La sentenio de 1800 edita
Medica ia reseta sua impulsa la plu grande en la sentenios de 1800, spesial pos Louis Pasteur (1822-1895) ia ariva a la teoria ce maladias ia es causada par microorganismes. La campo nova de bateriolojia ia continua con la ami de Pasteur, Joseph Lister (1827-1912), ci ia introdui la idea nova de un situa antisepsica en sirurjia - spesia par lava sua manos! Pasteur ia dona sua nom a la pasteuri de lete; Lister ia dona sua nom a la antisepsica Listerine, developada en 1879 par Joseph Lawrence en San Louis, Missouri.
Charles Bell (1774-1855) e François Magendie (1783-1855) ia clari autonom de lunlotra la distingui entre la nervos de sensas e ata. Los notada ce la fibres sensal entra la radises posterior de la corda spinal, e la fibres de ata departe de la radises anterior. Bell es ance la person prima ci ia descrive la paralise de la fas nos nomi aora paralise de Bell. E Magendie (vide a supra) ia es la prima ci proba la funsione de la serebreta.
Franz Joseph Gall (1758-1828) de Wien e plu tarda de Paris, ia studia la formas de cranios e ia conclui ce la bultos e cavetas peti en la testa de cada person relatada a alga cualias de personalia. Esta ta deveni multe popular su la nom frenolojia, an si siensistes seria como Bell e Flourens ia pensa ce lo ia es asurda.
Marie-Jean-Pierre Flourens (1794-1867) ia conclui ce la serebro ia es la fonte de pensa e vole, e ce lo opera oliste - no como Gall ia sujeste. El ia nota ce la otra partes - serebreta, medula, etc - ave sua funsiones diferente, ma ce cada de los opera ance oliste en se mesma. Lo ia es Flourens ci ia introdui la estrae de texeda de un serebro de un animal per studia la lia entre la partes de la serebro e condui.
Ma cosas es nunca tan simple. Paul Broca (1824-1880), un sirurjiste franses, ia ave un paseinte ci ia perde sua capasia per parla, la resulta de un lesion en cual es aora nomida la area de Broca. Un otra sirurjiste, Carl Wernicke, ia publici un libro sur afasia en 1874. El, natural, ia descovre la sinifia de la area de Wernicke par condui un autopsia de un pasiente ci ia perde sua capasia per comprende parla.
En 1870, du rexercores, Eduard Fritsch e Gustav Hitzig, ia usa stimula eletrical direta a la serebro en un can per descovre, entre otra cosas, la cortexes de sensa e ata. Cuatro anios plu tarde, Robert Bartholow ia fa la mesma con un serebro de un person. Sua laboras ia demostra ce on ave serta alga grado de loci de funsion - ma lo no ave cualce relata a la bultos e cavetas peti sur la testo.
Johannes Müller (1801-1858), laborante en Berlin, ia developa la prinsipe de enerjia spesifada de nervos. Cada nervo, cuando stimulada, condui a sola un esperia sensal, an si lo es stimulada en un otra modo ca normal. Un esemplo simple es la lampis tu vide cuando tu presa sur tua oios. Esta ia resulta en un crede creseda en realisme nondireta, pd ce nos no esperia vera la mundo direta, e multe min esata como lo es.
Hermann von Helmhotz edita
Hermann von Helmholtz es posible la siensiste deutx la plu famosa en la sentenio 1800. El ia nase en 1821 en Potsdam, Deutxland, a Caroline e August Helmholtz. Sua padre, un ensenior e un ofisior en la armada Prus, ia comensa educa Hermann a sua propre casa, a causa de sua maladas. El ia atende "jinasio" (pd un liseo) de 9 a 17 anios de eda. El ia desira studia fisica, ma entra la universia per studia medica en Berlin en 1838. Sua jenitores no pote paia la custa sin la donada per studia per studiantes medical ci promete servi en la armada pos gradua.
Helmholtz ia deveni amis con alga otra omes joven ci ia es studiantes de Johannes Müller a la Universia de Berlin prosima. De sua amis, Emil Du Bois-Reymond ia descovre plu tarda la potensia de ata, e un otra, Ernst Brücke, ta ave un aidor de rexerca nomida Sigmund Freud. Esta studiantes de Müller, contrastante con sua profesor, ia jura un promete seria per evita vitalisme, la crede ce on ave alga cosa unica sirca materia vivente, oposada a materia nonvivente: "No otra fortias ca la fortias fisical e cimical comun, es ativa en la organisme. Helmholtz ia adota sua promete ance.
En 1842, el ia deveni un sirurjiste militar a Potsdam, e ia continua studia matematica e fisica par se mesma. En 1847, el ia presenta un paper a la Sosia de Fisica de Berlin, sur la conserva de enerjia. Si el no ia ave cualce otra ideas, esta ta gania per el un loca onorada en istoria.
Pronto pos, el ia deveni un profesor asosiada de fisiolojia a Königsberg e sposi. En esta periodo de sua vive, el ia mesura la rapidia de la impulsa neuronal. Ante esta, los ia pensa ce lo ta es o infinita o la rapida de lus. El ia trova ce lo es entre 24.6 - 38.4 metres per secondo. Lo ia pone ativia neurolojial bon en la limitas de la siensas de fisica e cimica normal. En pasante, en 1851, el ia inventa la oftalmascopio - la aparato cual dotores usa per vide en tua oio.
En 1855, el ia move a Bonn per es un profesor de anatomia e fisiolojia. Asi es ia comensa sua rexerca en vide e oia. En 1856, el ia publici la prima de sua tre volumes nomida la Manual de otica fisiolojial.
El ia move denova en 1858, esta ves como profesor de fisiolojia. En esta periodo, sua sposa ia mori. Ma plu tarda el sposi un fem de mundo. Sua labora filosofial ia foca sur epistemolojia, e el ia continua sua rexerca sur vide e oia. Sua esplica de vide color - ce lo es fundida sur tre conos sensosa a roja, verde, e violeta - es ancora recordada como la teoria de Young-Helmholtz (a la mesma tempo ce Thomas Young de England ia sujesta lo).
En 1870, el ia es ofreda la seja de fisicas (sua ama prima) a la Universia de Berlin. En ajunta a un salario grande, el ia es ofreda un aparte e un Institui de fisica nova. El ia publica alga paperes sur jeometria spesial la tipo noneuclidean cual ta es tan importante a persones como Albert Einstein en la sentenio de 2000. Sua foca major ia es sur fisica, natural, e un de sua studiantes spesial ia es Heinrich Hertz, ci ia es la person prima ci jenera ondas de radio en 1888.
Helmholtz ia viaja a la SUA en 1893 como la representor deutx a la Feria Mundal a Chicago. Un cade mal sur la barcon ia menasa seria sua sania. El ia mori de un emoraje serebral en setembre de 1894.