Fenomenolojia e esistentialisme

Parte un: La anticas

Parte du: Europa nova

Parte tre: La sentenio 19

Parte cuatro: La sentenio 20

Fenomenolojia es un tecnica de rexerca cual envolve la descrive atendente de aspetas de vive umana como los es viveda; Esistentialisme, derivante sua intuis de fenomenolojia, es la disposa filosofial cual vide vive umana de la interna, en loca de finje comprende lo de la esterna, "ojetal" perspetiva. Fenomenolojial esistentialisme como un filosofia e psicolojia, no es un sistem sever definida; ma sua aderentes es fasil per identifia par sua asentua de la importa de individuas e sua libria per partisipa en sua propre crea. Lo es un psicolojia cual asentua nosa prosedes creosa plu ca nosa adere a leges umana, natural, o divin.

Franz Brentano

Franz Brentano ia nase 16 janero 1838 en Marienberg, Deutxland. El ia deveni un prete en 1864 e ia comensa como un ensenior du anios plu tarda a la Universia de Wurzburg. Dutas relijiosa ia resulta con el parte de la pretia e resinia de sua posto de ensenior en 1873.

La anio seguente, el ia scrive "Psicolojia de un perspetiva empirical". En esta libro, el ia introdui la conseta cual es la plu asosiada con el: intensionalia (acc "ojetalia inerente"). Esta es la idea ce lo cual marca mente como diferente de cosas es ce atas mental es sempre dirijeda a alga cosa ultra la mente: Vide implica alga cosa videda, vole implica alga cosa voleda, imajina implica alga cosa imajinada, judi implica alga cosa judida. Intensionalia lia la sujeto e la ojeto en un modo potiosa. He ia es donada un posto como profesor a la Universia de Wien pronto.

En 1880, el ia atenta sposi, ma sua sposi ia es proibida par la governa osteraic, cual continua vide el como un prete. El parte de sua profesoria e moveda a Leipzig per sposi. La anio seguente, el ia es permeteda reveni a la Universia de Wien, como un lesonor.

El ia es popular con la studiantes. Entre los ia es Carl Stumpf e Edmund Husserl, la fundores de fenomenolojia, e Sigmund Freud. Brentano ia jubila en 1895, ma ia continua scrive asta sua mori a 17 marto 1917, en Zurich.

Carl Stumpf

Carl Stumpf ia nase 21 april 1884 en Wiesentheid en Baiern. El ia es forte influeda par Brentano. Como un lesonor a la Universia de Gottingen, el ia publici "La orijinas psicolojial de persepi de spasio" en 1870. En 1873, el deveni un profesor a la Universia de Wurzburg. Sua obra mestral, "Psicolojia de tono", ia es completida tra un serie de profesorias a Praha, Halle, e Munxen.

El ia deveni un profesor e la dirijor de la Institui de Psicolojia Esperimental a la Universio Friedrich-Wilhelm en Berlin en 1894, do el ia continua sua labora sur la psicolojia de musica, ia produi un jornal sur la sujeto, e ia comensa la arcivo de musica primitiva.

Stumpf ia jubila en 1921, e continua sua laboras asta sua mori a 15 desembre 1936 en Berlin. Con Husserl, el es comun videda como un cofundor de fenomenolojia e ia es spesial un inspira a la psicolojistes de gestaltes.

Edmund Husserl

Edmund Husserl ia nase 8 april 1859 en Prossnitz, Moravia. El ia studia filosofia, matematica, e fisica a Leipzig, Berlin, e Wien. (Nota ce studiantes en Deutxland move comun de un universia a un otra, per studia su sua idoles en sua campo.) El ia reseta sua diploma dotoral de la Universia de Wien en 1882 en matematica. La anio a pos, el comensa studia su Franz Brentano.

Husserl, naseda en un familia iudi, ia converti a luteranisme en 1886, e ia sposi Malvine Steinschneider en 1887, ci ia es ance un convertida. Los ia ave tre enfantes. En esta mesma anios, el ia vade per studia con Carl Stumpf a la Universia de Halle e deveni un lesonor ala. Los ia deveni bon amis es intercambia sua ideas.

Cuando a Halle, el ia angusa sur la lia entre matematica e la natur de la mente. El ia reconose ce sua ideas orijinal, cual ia envolve la idea ce matematica deriva de psicolojia, ia es malgidada. Alora, el ia comensa la developa de sua tipo de fenomenolojia como un modo de investiga la natur de esperia mesma. Esta ia resulta en la publici de "Investigas lojical" en 1900.

El ia es invitada per un profesoria a la Universia de Gottingen en 1901, do la studiantes ia comensa formi un sirculo sirca el e sua obras. El ia developa ance un amia con Wilhelm Dilthey, e ia es influeda par sua ideas sur la contesto istorial de siensa.

En 1916, el ia vade a la Universia de Freiburg. Ala, el ia scrive "Filosofia prima" (1923-1924), cual resoma sua crede ce fenomenolojia ofre un modo a developa de moralia e un mundo plu bon. El ia reseta multe onoras e dona lesones invitada a la Universia de London, la Universia de Amsterdam, e la Sorbonne en Paris, cual resulta en sua ideas deveni otenable a multe plu escutores nova.

El ia jubila en 1928. Martin Heidegger, con la suporta forte de Husserl, ia es asiniada per sua seguor. Cuando la laboras de Heidegger ia developa a un funda de esistentialisme, Husserl ia distanti se de esta ideas nova.

Cuando la nazis ia comensa domina en 1933, Husserl, car el ia nase como un iudi, ia es escluida de la universia. An tal, el ia continua furni suporta a sua amis en la resiste. El ia parla sur la crise european en Wien en 1935, an con el ia es su un regula de silentia. El ia parla ance a la Universia de Praha acel anio, do sua manoscritos nonpublicida ia es colieda e catalogida.

Sua obra final, "La crise de siensas european e fenomenolojia transendente" (1936) ia introdui la conseta de Lebenswelt. La anio seguente, el deveni malada e, a 27 april 1938, el ia mori.

Fenomenolojia

Fenomenolojia es un atenta a boni nosa comprende de nos mesma e nosa mundo par la descrive atendosa de esperia. A la surfas, lo pare no plu ca oserva natural e introspeta. Esamina lo alga plu prosima, e tu pote vide ce la suposadas fundal es multe diferente de los de la siensas umana orientada a esperimentas: Per fa fenomenolojia, on debe atenta descrive fenomenos sin redui acel fenomenos a "non-fenomenos" ci es suposada ojetal. En loca de apela a ojetalia per validi, on apela a acorda intersujetal, pd otra descrives par otra fenomenolojistes. On pote ance investiga la similias e diferes de descrives de sua esperias entre persones estra academia.

Fenomenolojia comensa con fenomenos - apares, acel cual nos esperia, acel cual es donada - e no vade a via de los. Lo no judi un esperia regardante sua cuali per es un esperia. En loca, par prende un disposa fenomenolojial, on demanda de esperia per dise a nos cual lo es.

La tipo de fenomenolojia la plu funda es la descrive de un fenomeno spesifada como un aveni de un momento, un cosa, o an un person, pd alga cosa plen de sua cualias unica. Herbert Spiegelberg (1965) descrive tre fases:

1. Intui - esperia o recorda la fenomeno, teni lo en tua consensa, o vive en lo, partisipa en lo, abitua en lo o sur lo. Nota ce, en psicolojia deutx, la parola "intui" inclui no sola avenis mental, ma la avenis como nos esperia los. On pote intui un pensa o un tas.

2. Analise - esamina la fenomeno. Xerca per...

la pesas, partes, en la sensa spasial;
la episodios e segues, en la sensa tempal;
la cualias e dimensiones de la fenomeno;
la situa, ambiente;
la nesesadas e efetos en tempo;
la perspetivas o prosimis on pote prende;
cores o focas e franjes o orizones;
la apare e desapare de la fenomeno;
la claria de la fenomeno.

E investiga esta multe aspetas en sua formas esterna - ojetos, atas, otras - e en sua forma interna - pensas, imajes, e emosias.

3. Descrive - rejistra tua descrive. Scrive lo como la lejor ia ave nunca esta esperia. Gida el tra sua intui e analise.

Cual fa ce esta tre pasos simple tan difisil es la disposa mental ce tu debe manteni cuando tu presenta los. Prima, tu debe ave un tipo de respeta per la fenomeno. Tu debe es atendosa ce tu es intuinte lo plen, de tota "angulos" posible, fisical e mental, e no omete no cosa estra la analise cual parteni ala. Herbert Spiegelberg ia dise ce "La vole sinsera per sabe nesesa un spirito de jenerosia e no lo de economia..."

Incluida en esta "jenerosia" es un respeta per avenis publica e privata, la "ojetal" e la "sujetal". Un de la plu fundal ideas en fenomenolojia es "intende", cual refere a la interelata o mutualia de la sujeto e la ojeto en esperia: Tota fenomenos envolve e ata intendente e o ojeto intendeda. Tradisional, nos ia asentua la valua de la polo de la ojeto e desvalua la polo de la sujeto. Ma, per sita Spiegelberg denova, "An fenomenos mera privata es fatos cual nos no ave la direto per iniora. Un siensa cual refusa inclui los como tal es culpable per supresa evidentes e va fini con un universo truncada".

A la otra lado, nos debe ance es vijilante contra inclui cosas en nosa descrives cual no parteni ala. Esta es la funsiona de braseti: nos debe puia a lado tota prejudis ce nos pote ave sur la fenomeno. Cuando tu ave un prejudi contra un person, tu va vide cual tu espeta, e no cual es vera ala. La mesma aplica jeneral a fenomenos: tu debe prosimi los sin teorias, ipoteses, suposas metafisical, credes relijiosa, o an conseta de "sensa comun". Ultima, braseti sinifia la suspende de judi sur la "natur vera" o la "realia ultima" de la esperia - an si lo esiste o no.

An si la descrive de fenomenos individua es se mesma interesante - e cuando lo envolve persones o cultures, un emprende masosa - nos veni comun a la punto do nos vole dise alga cosa sur la clase en cual la fenomeno es incluida. En fenomenolojia, on parla de xerca la esense o strutur de alga cosa. Posible on vole investiga la esense de triangulos, o de piza, o coler, o de la natur de esiste como un om o fem. Nos pote an vole xerca per la esense de esiste como un umana, cual es la sujeto de la esistentialistes fenomenolojial.

Husserl ia sujesta un metodo nomida varia imajinada libre: Cuando tu senti ce tu ave un descrive de la cualias esensal de un categoria de fenomenos, demanda de se mesma, "cual me pote cambia o no inclui sin perde la fenomeno? Si me color la triangulo blu, o construi lo de lenio de Brasil, esce lo ancora un triangulo? Si me oblida un angulo o curva la lados, esce lo ancora un triangulo?" Esta pote pare trivial e fasil, ma aora vide la fenomeno de "esiste como un umana": esce la corpo de un person morida un umana? esce un spirito sin un corpo fisical un umana? esce un person en un coma permanente un umana? esce un fosena con intelijentia e personalia un umana? un ovo apena fertilida? un feto con ses menses? Demandas multe difisil!

Con fenomenolojia, la mundo regania alga parte de sua solidia, la mente es denova permeteda un realia de se mesma, e un setica alga paranoica es reponeda par un curiosia plu jenerosa e ultima plu sasiante. Par reveni, como Husserl dise, a la "cosas se mesma" o a la "mundo como viveda" (Lebenswelt), nos ave un oportunia plu bon per developa un comprende vera de nosa esiste como umanas.

Martin Heidegger

Martin Heidegger ia nase 26 setembre 1889, en Messkirch, Deutxland. Sua padre ia es la mantenor de la eglesa local, e Heidegger ia segue par junta la jesuitas. El ia studia la filosofia e teolojia de la edas medieval, e ance alga obras plu resente, como los de Franz Brentano.

El ia studia con Heirich Rickert, un kantian bon conoseda, e con Husserl. El ia reseta sua diploma dotoral en 1914, e ia comensa instrui a la Universia de Freiburg la anio seguente. An si el ia es forte influeda par la fenomenolojia de Husserl, sua interesas ia es plu en la sinifia de esiste mesma.

En 1923, el ia deveni un profesor a la Universia de Marburg, e en 1927, el ia publica sua obra mestral "Esiste e tempo" ("Sein und Zeit"). Influeda par la elinicas antica en ajunta a Kierkegaard, Nietzsche, e Dilthey, lo ia es un esplora de la verbo "es", spesial de la perspetiva de un person en tempo. An si scriveda en un modo densa e oscurida, lo ia es bon resetada tra Europa, ma no en la mundo de parlores engles.

En 1928, el ia reveni a Freiburg como la seguor de Husserl. En la desenio de 1930, la nazis ia comensa presa la universias deutx per desemplea sua profesores iudi. La parocior a Freiburg ia resinia en protesta, e Heidegger ia es elejeda per prende sua posto. An si el ia coraji studiantes e profesores per manteni sua xerca per veria, el ia coraji ance ce los resta fida a Hitler. El ia junta an la partito nazi. Multe persones, incluinte la amirores de sua pensas, no ia pardona el per esta.

Per es justa, el ia resinia de sua posto como parocior en 1934, e pos la gera el ia parla sur nazisme como un sintom de la maladia de sosia moderna. El ia para ensenia en 1944, e pos la gera, la militar aliada ia preveni el de plu ensenia. Ma plu tarda los ia restora sua direto per ensenia car sua suporta de Hitler ia es pasiva, e no ativa. El ia mori en Messkirch a 26 maio 1976.

Heidegger ia spende sua vive intera en demanda un demanda: Cual es "esiste"? Pos tota nosa vives dial, e an pos tota nosa investigas de acel vive filosofial e siensal, perce nos "es" en cualce modo?

Fenomenolojia descovre la modos en cual nos "es". La ostaculo prima es nosa contrasta tradisional entre sujeto e ojeto, cual fende umanas como sabentes de sua ambiente como la sabedas. Ma en la disposa fenomenolojial, esperia no mostra esta fende. Sabente e sabeda es ambos liada nonestrable con lunlotra. En loca, lo pare ce la fende de sujeto e ojeto es un cosa ce nos ia developa tarda en istoria, spesial con la aveni de siensa moderna.

La problemes de la mundo moderna veni de la "cade" de pensa ueste: En loca de un conserna con la developa de nos mesma como umanas, nos ia permete tecnolojia e tecnica per rena sur nosa vives e condui nos a un modo falsa per "es". Esta aliena de nosa natur vera es nomida nonautenticia.

Multe de lo cual es difisil en leje Heidegger es ce el ia atenta redescovre la tipo de "es" cual ia esiste ante la fende de sujeto e ojeto par investiga la orijinas de parolas, spesial de parolas elinica. Car, la pensa vade, la elinicas antica ia es min alienada de se mesma e sua mundo, sua lingua ta ofre a nos indicas de sua relata a "es".

Heidegger ia dise ce nos ave un relata spesial a la mundo, a cual el refere par nomi la esiste umana Dasein. Dasein sinifia "es ala", e lo asentua ce nos es sumerjida completa en la mundo, ma nos estende a estra (ex-siste) ance. Nos es alga nonsentral, on pote dise, nunca vera stable, sempre movente e cambiante, sempre deveninte.

Un parte grande de nosa natur strana es ce nos ave libria. (Vide ance la capitol sur vole; nota ce nos pote usa la sinifia tradisional de vole, o un sinifia min nondeterministe, como lo de Bandura, cual el ia nomi "self-determination" en engles, en lfn "autodetermina", cual es la libria de la avenis en esta momento cual resulta de nos ia ave un "se mesma" sempre developante, cual deveni plu e plu tra tempo un determina partal estra la mundo.) Esta libria, Heidegger dise, es dolosa, e nos esperia vive como plen de ansia. Nosa potensia per libria suplica a nos per es autentica par ansia.

Un de la fontes sentral de ansia es la reconose ce nos debe mori. Nosa tempo limitada asi sur tera fa ce nosa desides es multe plu sinifiante, e la nesesa per deside per es autentica es urjente. Nos es, el dise, un esente-a-mori (Sein-zum-Tode). Esta ta es revisitada par Freud, Otto Rank, e otras, como la "instinto de moria".

Tro frecuente, nos sede en la fas de ansia e mori, un situa Heidegger nomi "cade". Nos deveni das Man - "la cualcun", no person spesial o spesifada, la om anonim, un de la fola o la manada.

Du cualias de "das Man" es parla sin sinifia e curiosia sin sinifia: parleta, sperdente rumor, interata en un modo basa; desira per diverti o distrae, xerca per la nova, interfere con la vives de otras. Per es un person vera, on debe es abri a lunlotra, con un capasia per mervelia. Nos deveni autentica par pensa sur "es", par fasa ansia e mori direta. Asi, el dise, on pote trova joia.

Jean-Paul Sartre

Sartre e Beauvoir

Un umana es un pasion sin usa. Lo es sin sinifia ce nos vive, e lo es sin sinifia ce nos mori.

Sartre es probable la esistentialiste la plu bon conoseda, e el monte la linia entre filosofiste e psicolojiste (e ativiste sosial). Jean-Paul Sartre ia nase a 21 junio 1905, en Paris, la sola enfante de Jean-Baptiste Sartre e sua sposa Anne-Marie. Sua padre ia mori un anio a ante de colite, e sua madre ia prende el per vive con sua duavo Carl Schweitzer, un profesor deutx a la Sorbonne, e la tio de la misionor-filosofiste famosa, Albert Schweitzer.

No comfortable en la casa disiplinante de sua avo, Anne-Marie e sua fio peti ma multe intelijente deveni prosima. Un maladia de enfantia ia causa ce Sartre deveni sieca en un oio, cual ia lisca a supra e a lado, e el ia pare como el ia es regardante a via. Solitar, el ia comensa scrive naras e presentas teatral como un evade.

Anne-Marie ia fuji de la casa de sua avo par sposi cuando Jean-Paul ia ave 12 anios. Jean-Paul ia deveni rebelante e nonmanejable, e donce el ia es enviada a un scola abitante. Ala, el ia continua sua tende a disturba la pas, e frecuente ia spende tempo en deteni.

Pos liseo, Sarte ia atende la Ecole Normal Superieure a la Sorbonne. Briliante ma desorganizada e nonatendente, el ia es a la basa de 50 studiantes en sua esaminas de gradua. La anio seguente, el ia studia con un fem joven nomida Simone de Beauvoir, e el ia gradua en 1929. Los ia es la plu alta de sua clase. Simone e Jean-Paul ta ave un ama forte, ma abri, asta sua moris.

Pos gradua, Sartre ia ensenia a un serie de liseos per multe anios. El ia spende un anio en Berlin atendente lesones par Edmund Husserl. Fenomenolojia ta es un parte importante en alga de sua obras filosofial, incluinte "Imajina" (1936), "Desinia per un teoria de emosia" (1939), e "La psicolojia de imajina" (1940).

En 1938, Sartre ia publici sua novela prima "Nausea". En esta novela, el ia scrive sur la nausea cual sua carater senti cuando el contempla la "spesia" de la mundo material, incluinte otra persones e sua propre corpo. La novela es strana, ma la descrives es eselente, e Sartre ia comensa crea un nom per se mesma.

En 1939, Sartre ia es enscriveda en la armada. El ia es prendeda como un prisonida en 1940 e relasada un anio a pos. Sua esperias como un partisipante en la resiste ta color multe de sua obras plu tarda. En junio de 1943, sua presenta teatral "La moscas" ia abri en Paris. An si lo ia es clar anti-nazi, la presenta ia es a veses atendeda par ofisiores nazi.

Ance en 1943, el ia publica sua obra mestral, "L'etre et le neante" (es e no cosa). En esta libro grande e difisil, el ia trasa sua teoria ce consensa umana es un tipo de "no-cosa", ensircada par la spesa de "es". Como un "no-cosa", la consensa umana es libre de determinisme, cual resulta en la situa difisil ce nos es ultima culpable per nosa vives. "Umanas es condenada per es libre". A la otra lado, sin un "esense" per furni dirije, consensa umana es ance ultima sin sinifia. "Tota cosas esistente nase per no razona, continua par debilia, e mori par acaso".

Posible sua idea filosofiste la plu bon conoseda es "esiste presede esense". En la caso de cosas nonumana, un esense es alga cosa cual aveni ante la esiste de la cosa. La esense de un table es en la intendes de sua creor o usor per lo, como avente un forma, partes, e un funsiona. La esense de un monax es sua erita jenetical, sua instintos, la detalias de sua ambiente. Sua vive intera es simil a la prosede de un program en un computador. Ma un umana, seguente Sartre, no ave un esense vera. Serta, nos ave nosa forma jeneral, nosa jeneticas, nosa detalias de eleva, etc. Ma los no determina nosa vives, los sola ordina la stadio. Nos mesma formi nosa vives. Nos es ci eleje cual nos ta fa con la materias natur ia furni per nos. Nos crea nos mesma. E nosa "esense" es sola clar cuando nosa vives intera es completida. Un otra modo per espresa esta es ce nosa "esense" es nosa asentia de esense, o nosa "esense" es nosa libria.

En 1944, el ia produi un de sua presentas teatral la plu famosa, "No sorti ("Huis-clos"). Esta presenta, e alga otras, presenta la problem de vive con otra persones, e los es multe pesimiste. "Enferno es otra persones" es un sita famosa de "No sorti".

Pos la gera, Sartre ia deveni plu consernada par la caso de culpablia sosial. El ia sujesta ce la state de libria sinifia no sola ce on es culpable per sua propre vive, ma ce on es culpable per la vives de tota umanas. Nos ia descrive esta idea en "Esistentialisme e umanisme (1946), e la novela "La vias de libria" (1945, nunca completida).

Ma si la esiste vera presede esense, umanas es culpable per lo cual los es. Donce, la move prima de esistentialisme es per fa ce cada om es consensa de cual el es, e per fa ce la culpablia plen de sua esiste resta su el. E cuando nos dise ce un umana es culpable per se mesma, nos no sola indente ce el es culpable per sua propre individua, ma ce el es culpable per tota umanas.

Sartre ia scrive ance esaminas psicolojial profonda de scrivores franses famosa: Baudelaire (1947), Jean Genet (1952), e Flaubert (du de tre volumes ia es completida en 1971 e 1972. En estas, el esamina esta scrivores de la perspetivas esistentialiste, psicoanalisal, e marxiste, en un atenta per crea depintas fenomenolojial la plu completa. Nonfortunosa, esta libros es cuasi nonlejable!

Sartre ia es un amiror de la scrives de Karl Marx, e de la Uni Soviet. Sua suporta de comunisme rusce ia fini en 1956, cuando la armada rusce ia marxa en Budapest per para la efortes de la magiares per ateni autonomia. Ancora esperante, el ia scrive un analise criticante de marxism en 1960. Lo ia suporta la ideas fundal de Marx, ma critica la forma rusce.

En 1963, el ia publica sua autobiografia "Les Mots" ("la parolas"). El ia es elejeda per la Premio de Nobel en la anio seguente, ma el ia refusa lo per razonas political. Asi es un esemplo de sua stilo evocante:

Me es un can. Me balia, la larmas rolante a su de mea jena, me senti los. Me es un arbor, la venta deveni caturada en mea ramos e secute los neblosa. Me es un mosca, me trepa a supra de la vitro de un fenetra, me cade, me comensa trepa denova. Aora e alora, me senti la caresa de tempo cuando el vade a pos. A otra tempos, la plu comun, me senti ce lo resta cuieta. Minutos tremante cade a su, inonda me, e mori tra un tempo longa. Paseante laborosa, ma ancora vivente, los es scopida a via. Los es reponeda par otras cual es plu fresca ma egal futil. Esta repulsa es nomida felisia.

A la fini de la desenio de 1979, la sana de Sartre ia comensa dejenera. Sua abituas mal ia inclui fuma du pacos de sigaretas franses sin filtros, la bevi multe de alcol, e la usa de amfetaminas per aida manteni sua velia per scrive. El ia mori a 15 april 1980 de canser de la pulmones. Simone de Beauvoir ia atenta resta con sua corpo e atendores debe trae el a via de la caxon. Sur prosede funeral ia es atendeda par plu ca 50 mil lamentores.

Esta filosofia de esistentialisme, tan difisil como lo es per esplica e vive, ia ave un efeto grande a multe pensores en la sentenio de 2000. Entre los es filosofistes como Simone de Beauvoir, Albert Camus, Martin Buber, Ortega y Gassett, Gabriel Marcel, Paul Tillich, Merleau-Ponty, psicolojistes como Ludwig Binswanger, Medard Boss, Erich Fromm, Rollo May, e Viktor Frankl, e an la eroes de posmodernisme, Foucault e Derrida. Min direta, esistentialisme ia influe psicolojistes american como Carl Rogers. La influe continua a oji.

*Spiegelberg, Herbert (1965). The Phenomenological Movement. The Hague: Martinus Nijhoff.