Un istoria corta de computadores
Psicolojia
Esta istoria de computadores es un lista de ideas e inventas relatante a la developa de la prosede de informa e la construi de computadores e aparatos relatada. Lo lista ance otra cosas como inovas en matematica e aparatos eletrical.
Anticia
editaSirca la sentenio de 600 aec
La abaco ia es developada en Xina. Plu tarda, lo ia es adotada par la japaneses e la rusces.
Sirca la sentenio de 600 ec
Numeros arabi - incluinte la zero (prima representada par un punto) - ia es inventada en India. Traduis arabi de testos de matematica de India ia introdui esta numeros a la europeanes. La numeros ia entra a Europa tra Espania sirca 1000 ec e deveni prima popular entre la mercatores italian sirca 1300. Asta alora, persones ia usa la sistem roman en Europa ueste, e la sistem elinica en Europa este. La numeros orijinal ia es simil a los de devanagari moderna como usada en India norde:
- ०.१.२.३.४.५.६.७.८.९
Developas temprana
edita1488
La primador con tipo movable ia es inventada par Johann Gutenburg.
1492
Francis Pellos de Nice, Frans, ia inventa la sinia desimal.
Sentenio 17
edita1600
Thomas Harriot ia inventa la simboles usada en aljebra. El ia desinia ance la mapas prima de la luna, e ia descovre manxas solal.
1600
Dr William Gilbert ia descovre eletrica statical, e ia introdui la terma en "De Magnete".
1614
John Napier ia inventa logaritmos.
1622
William Oughtred ia inventa la regla de calcula.
1623
Wilhelm Schickard ia construi sua "orolojo calculante".
1644 - 1645
Blaise Pascal, un matematiciste joven franses, ia developa la "pascalina", un aparato simple mecanical per soma numeros. Lo ia es composada de alga rotas con dentes posada a lado de lunlotra, de cual cada ia es marcada de 0 a 9 a intervales egal sirca sua perimetre. La inova importante ia es un funsiona automata per "porta la deses": cuando un rota completi un revolui, lo trae automata la rota a sua sinistra un desi de un revolui plu, ajuntante o "portante" un des. Pascal ia es ance un filosofiste respetada, e la inventor de la bus.
1660
Otto von Gürcke ia construi la "macina eletrica" prima.
1674
Gottfried Wilhelm von Leibniz ia desinia sua "calculador de pasos", simil a lo de Pascal, ma con ance la funsionas de multipli e divide, cual ia es construida par un om nomida Olivier de Paris. Leibniz ia es ance un filosofiste respetada, e la coinventor de calculo.
Sentenio 18
edita1752
Benjamin Franklin "catura" lampo.
1786
J. H. Mueller, de la armada hessian, ia conseti la idea de lo cual ta deveni nomida un "motor de diferes". Esta ia es un calculador spesial per calcula valuas de un polinomial. La atenta par Mueller per colie finansia ia fali, e la projeta ia es oblidada.
1790
Galvani ia descovre corente eletrical, e usa lo sur la gamas de ranas.
Sentenio 19
edita1800
Alessandro Volta ia inventa la pila.
1801
Joseph-Marie Jacquard ia developa la sistem de cartas perforada, cual pote es programida per automati la texe de motifes sur texadores.
1809
Humphrey Davey ia inventa la lampa de arco.
1820
Charles Xavier Thomas de Colmar de Frans ia construi sua "Aritmometre", la calculador prima produida en masa. Lo ia multipli usante la mesma modo jeneral como la calculador de Leibniz. Con la aida de la usor, lo ia pote ance divide. Lo ia es ance la calculador la plu fidable asta alora. Macinas de esta desinia jeneral, sufisinte grande per abita la plu de un buro, ia continua es vendeda per sirca 90 anios.
1822 - 1823
Charles Babbage ia comensa sua projeta, finansiada par la governa, per construi la prima de sua macinas, la "motor de diferes", per macini la solves de problemes en aljebra. La importa de sua labora ia es reconoseda par Ada Lovelace, la fia de senior Byron, ci, talentosa en matematica, ia crea un forma de aritmetica cual usa sola la numeros 0 e 1.
1825
La ferovia prima ia es abrida per usa par la publica.
1826
Fotografia ia es inventada par Benoit Fourneyron.
1830
Thomas Davenport de Vermont, SUA ia inventa la motor eletrical. El ia refere a lo como un jueta.
1831
Michael Faraday ia produi eletrica con la jenerador prima.
1832 - 1834
Babbage ia conseti, e ia comensa desinia, sua "motor analisal". On pote regarda esta como un calculador programable, multe prosima a la idea fundal de un computador. La macina ia pote soma en 3 secondos, e multipli o divide en 2 a 4 minutos.
1837
Samuel Morse ia inventa la telegraf.
1868
Christopher Latham Sholes de Milwaukee ia inventa la tapador comersial prima.
1872
Un de la computadores analoja grande prima ia es developada par senior Kelvin per predise la altia de la mareas en portos engles.
1876
Alexander Graham Bell ia inventa la telefon.
1877
Thomas Edison ia inventa la fonograf.
1881
Charles S. Tainter ia inventa la ditador.
1886
Dorr E. Felt de Chicago, ia construi sua "contametre", la calculador prima con teclas.
1887
E. J. Marey ia inventa la camera per filmas movente.
Eastman ia patenta sua camera caxin prima, movente fotografia de profesales a la popla jeneral.
1890
Herman Hollerith de MIT ia desinia un macina per leje cartas perforada. Lo ia es usada a modo efetosa en la conta de abitores de la SUA en acel anio. La cartas ia es eletrical lejeda.
1891
Thomas Edison ia developa la projetador de filmas movente.
1896
Guglielmo Marconi ia developa la radiotelegraf.
1899
Val Demar Poulsen ia developa la rejistrador magnetal.
1900
Rene Graphen ia developa la macina per fotocopia.
Sentenio 20 temprana
edita1901
Reginald A. Fessenden ia developa la radiotelefon.
1906
Henry Babbage, la fio de Charles Babbage, con la aida de la compania de R. W. Mundro, ia completi la motor analisal de sua padre, per mostra ce lo pote opera.
1913
Thomas Edison ia inventa filmas movente parlante.
1919
W. H. Eccles e F. W. Jordan ia publici sua desinia prima per un sircuito "flip-flop" (bistable).
1924
"Computing-Tabulating-Recording" ia deveni "International Business Machines" (IBM).
1925
J. P. Maxfield ia developa un fonograf intera eletrical.
1927
Philo T. Farnsworth, la inventor de televisa, ia presenta sua demostra prima.
1933
IBM ia introdui la tapador eletrical comersial prima.
Edwin H. Armstrong ia developa radio FM (de frecuentia modulada).
1936
Robert A. Watson-Watt ia developa radar.
Benjamin Burack ia construi sua macina lojical eletrical prima.
En sua tese, Claude Shannon ia demostra la relata entre sircuitos eletrical e lojica de simboles.
1937
Alan M. Turing, de la Universia de Cambridge, England, ia publici un monografia sur "numeros computable", cual ia introdui la computador teorial simplida cual on conose oji como la macina de Turing.
1938
Claude E. Shannon ia publici un monografia sur la reali de lojica de simboles usante reles.
1939
John V. Atanasoff e un studiante graduada Clifford Berry de la Universia de la Stato Iowa ia completi un calculador prototipal de 16 bitios. Esta ia es la macina prima capas de calcula con tubos vacua.
1940 - 1950
La computadores eletronical prima ia apare en la SUA, Britan, e Deutxland.
1941
Laborante con suporta limitada de la Institui de Rexerca Aironautical Deutx, Zuse ia completi la "V3", la calculador progamable operante prima. Zuse ia es un ami de Wernher von Braun, siensiste de rocetos.
1943
Howard H. Aiken e sua ecipo a la Universia de Harvard, finansiada par IBM, ia completi la "ASCC Mark I" (calculador automata controlada en segue Mark 1). La macina ia ave 15 metres de longia, 2,5 metres de altia, 5 tones de pesa, e 750 000 partes. Lo ia es la computador binaria prima construida en la SUA cual ia es operada par eletrica.
Max Newman, Wynn-Williams, e sua ecipo a la "Scola de codigo e sifra" secreta de la governa engles ia completi la "Heath Robinson". Esta ia es un macina spesialida per rompe sifras. (Heath Robinson ia es un cartuniste engles reconoseda per sua desinias de aparatos estrema complicada e bizara, composada de multe ojetos noncoerente.)
1945
John von Neumann ia produi un reporta descrivente un computador con programes internida, cual on ia nomi "computador von Neumann" a pos.
1945
John W. Mauchly e J. Presper Eckert e sua ecipo a la Universia de Pennsylvania ia completi un projeta secreta per la laboreria de rexerca de la militar american: la ENIAC (calculador e integrador numeral eletronical). Lo ia pesa 30 tones, ia ave 5 metres de altia e 24 metres de longia, ia covre sirca 93 metres cuadrida de solo, e ia usa 130 o 140 cilovates de eletrica. Lo ia conteni 17 468 tubos vacua e plu ca 500 000 lias soldada, e ia custa $SUA 487 000. Lo ia pote fa 5000 somas en un secondo, ma la sircuitos en la ENIAC pote es contenida aora sur un tableta con la grandia de un carta de jua. Un computador de table oji pote teni plu informa a miliones de veses e es plu rapida a 50 000 veses. La rapidia orolojial de ENIAC ia es 100 kHz.
A du dias ante natal, la transistor ia es perfetida.
1946
Zuse ia inventa Plankalkul, la lingua prima de programi, en sua asconde en Baiern.
La ENIAC ia es esibida a la popla. Un panel de lampas peti ia es ajuntada per mostra a jornalistes como rapida la macina es e cual lo ia es fante; e lo ia pare ce Hollywood ia nota.
1947
La memoria de tambur magnetal ia es inventada par persones diversa, e la esemplos prima ia es construida.
1948
Newman, Freddie C. Williams e sua ecipo a la Universia de Manchester ia completi un macina prototipal, la "Manchester Mark I". Esta ia es la macina prima cual cualcun ia nomi vera un computador, car lo ia es la prima con un capasia vera per reteni un program.
La rejistrador de banda prima ia es vendeda.
1949
Un sita de la jornal "Mecanica popular": "An si un computador como ENIAC ave 18 000 tubos vacua e pesa 30 tones, computadores en la futur va pote ave sola 1000 tubos vacua e pesa sola 1,5 tones".
Jay W. Forrester e sua ecipo a MIT ia construi la "Vortis de venta" per la Ofisia Marinal de Rexerca e Inventa de la SUA. Lo ia es la computador prima desiniada per labora en tempo real. Lo ia pote fa 500 000 somas o 50 000 multiplis per secondo. Esta ia permete ce la macina es usada per controla de trafica airal.
Forrester ia conseti ance la idea de un memoria de cores magnetal como lo ta es usada comun, con un matris de filos usada per controla la cores.
Sentenio 20 tarde
edita1950
Alan Turing ia publici "Macinas de computa e intelijentia".
1951
La ofisia de la conta de abitores de la SUA ia reseta la UNIVACS prima, orijinal developada par Eckert e Mauchly.
An Wang ia institui Laborerias Wang.
Ferranti Limitada ia completi la prima de sua computadores comersial. Lo ia ave 256 parolas de 40 bitios de memoria xef, e 16K parolas en la tambur. Oto de esta macinas ia es vendeda.
Grace Murray Hopper, de Remington Rand, ia inventa la conseta moderna de la compilador.
1952
La EDVAC ia es final completida. Lo ia ave 4000 tubos, 10 000 diodos cristal, e 1024 parolas de 44 bitios de memoria ultrasonal. Sua rapidia par orolojo es 1 MHz.
1953
Minsky e McCarthy ia comensa sua empleas de estate a Bell Laborerias.
1955
An Wang ia reseta la patenta numero 2 708 722, incluinte 34 declaras per la memoria de cores magnetal.
Schockley Semicondutador es fundida en Palo Alto, California.
John Bardeen, Walter Brattain, e William Shockley ia comparti la Premio Nobel en fisica per sua developa de la transistor.
1956
Rockefeller ia finansia la confere sur intelijentia artifis a Dartmouth.
La CIA ia finansia la projeta de tradui par macina GAT.
Newell, Shaw, e Simon ia developa Teoriste de Lojica.
1957
La Uni Soviet ia lansa Sputnic, la satelite prima.
Newell, Shaw, e Simon ia developa la "Solvador de Problemes Jeneral".
Fortran, la lingua de programi prima popular, ia es creada.
1958
McCarthy ia crea la forma prima de LISP, la lingua prima per prosede cadenas.
1959
Minsky e McCarthy ia institui la laboreria de intelijentia artifis a MIT.
Frank Rosenblatt ia introdui "persetrones".
COBOL, un lingua de programi per usa en comersia, ia es introduida.
1960
Edsger Dijkstra ia sujesta ce programes e datos debe es creada en formas normida e struturida, afin persones ta pote developa programes sur la obras de lunlotra.
Algol 60, un lingua de programi european e la asendente de multe otras (pe Pascal), ia es introduida.
1962
La robotes industrial prima ia es introduida (pe un robot per pila produidas sur paletas - la "paletador").
1963 - 1964
Doug Engelbart ia inventa la mus de computadores, inisial nomida "la X-Y indicador de posa".
1964
La program "studiante" par Bobrow ia solve problemes matematical en la forma de parolas.
John Kemeny e Thomas Kurtz de la Universia de Dartmouth ia developa la lingua de programi BASIC prima. PL1 ia ariva en la mesma anio.
Wang ia introdui la LOCI (strumento per calcula logaritmos), un calculador per la ofisia a la custa barata de $SUA 6700, multe min ca la custa de un computador sentral. En ses menses, Wang ia vende sirca 20 unias.
La sistem de banco de datos Sabre, enlinia comprable, ia ariva. Lo ia solve la problem de Airocompania American de coordina informa sur sentos de reservas per vola tra la continente a cada dia.
Philips ia introdui la caxeta compata.
1966
Weizenbaum e Colby ia crea ELIZA.
Hewlett-Packard ia entra a la mercato de computadores con la HP2116A, un computador de tempo real. Lo ia es desiniada per prosede datos otenida de strumentos eletronica de probas e mesuras. Lo ia ave 8K de memoria e custa $SUA 30 000.
Hewlett-Packard ia anunsia sua calculador de serie HP9100 con scermo CRT, vendeda per sirca $SUA 5000 per cada.
Intel ia es fundida e ia comensa vende un microtelia de semiconduador cual ia pote teni 2000 bitios de memoria. Wang ia es la prima ci ia compra esta, usante lo per sua calculadores per comersia, nomida la serie 600.
IBM ia vende plu ca 30 000 computadores sentra fundida sur la familia 360, cual ia usa memoria de cor.
1967
La MacHack par Greenblatt ia defeta Hubert Dreyfus a xace.
IBM ia construi la disco mol prima.
1969
La filma "2001" par Stanley Kubrick ia presenta un inteleto artifis.
Intel ia anunsia un telieta RAM de 1 KB, cual ia ave un capasia sinifiosa plu grande ca cualce telieta de memoria produida a ante.
La sistem de opera Unix, marcada per sua capasia multitaxal (dividente sua tempo entre taxes diversa), memoria virtual, desinia e securia multiusoral, ia es desiniada par Ken Thompson e Dennis Ritchie a la laboreria de AT&T-Bell.
Arpanet (la asendente de la interede) ia lia du computadores a UCLA e a la Instituida de Rexerca a Stanford. Dr Leonard Kleinrock e sua aidor Charley Kline a UCLA ia susede envia un comanda per entra a un macina a Stanford manejada par Bill Duval - la eposta prima.
La Universia de California a Los Angeles, la Universia de California a Santa Barbara, la Universia de Utah, e Stanford ia es la cuatro membros orijinal de Arpanet.
1970
Doug Engelbart ia patenta sua mus.
Niklaus Wirth ia developa Pascal, un lingua de programi.
1971
La custa de la Model 300 de calculador Wang ia cade a $SUA 600. Wang ia introdui la 1200 sistem de scrivador.
Stephen Wozniak e Bill Fernandez ia construi sua computador "Cream Soda".
Bowmar Instruments ia introdui la calculador de pox, fundida sur LSI (integra de grado grande) con cuatro funsionas (+, -, *, /), con LED, a un custa inisial de $SUA 250.
Intel ia introdui la microprosedador. Sua rapidia es 60 000 "somas" per secondo.
1972
Ray Tomlinson, la autor de la program prima per eposta, ia eleje la sinieta @ per usa en adirijes de eposta.
Ritchie ia inventa C, un lingua de programi.
Bill Gates e Paul Allen ia institui Traf-O-Data (cual ta deveni ultima Microsoft).
Stephen Wozniak e Steven Jobs ia comensa vende "caxas blu" (un aparato per jenera tonos usada en sistemes de telefon, cual ia permete ce persones comunica sin paia.
Eposta ia ariva per la popla.
1973
Stephen Wozniak comensa labora per Hewlett-Packard.
La jornal Radio Electronics ia publici un article par Don Lancaster, descrivente un "tapador-tele".
IBM ia developa la prima de la discos dur selida vera. Lo ia es nomida "Winchester" e ia usa du platos de 30 Mb.
1975
MIT ia introdui la computador personal prima: la Altair, en la forma de un paco per asembla par la compror. Lo ia es fundida sur un prosedador 8080 de 8 bitios e ia inclui 256 baites de memoria, un grupo de comutadores, e un panel LED. Un teclador, scermo, e aparato per reteni ia pote es juntada par usa cartas estendente.
La Apple 1 ia es construida!
1976
Greenblatt ia crea la macina LISP prima.
Rea Elizabeth de Britan ia es la prima xef de stato ci ia envia un eposta.
Shugart ia introdui la disco mol de 5,25 ditones.
Primi con jetas de inca ia es introduida par IBM.
IBM ia introdui un sistem de prosede completa. La sistem ia inclui un discador, lejador de cartes magnetal, e un scermo CRT. La primador ia usa jetas de inca, un movador automata de paper o envelopa, e la posible de eleje comunica eletronical.
Apple Computer ia abri sua ofisias prima en Cupertino e ia introdui la Apple 2. Lo ia es la computador personal prima con grafica en color. Lo ia ave un CPU 6502, un ROM de 16 kilobaites, un teclador, un carta madral con 8 ranures, controladores per juas, e BASIC ja cargada.
Commodore, un compania de eletronicales orijinal de Toronto, ia introdui la computador PET en 1976.
Tandy/Radio Shack ia introdui sua microcomputador prima, la TRS-80.
JVC ia introdui la formato VHS per rejistradores video.
1977
La discos audio dijital prima ia es demostrada par Mitsubishi, Sony, e Hitachi a la feria de audio a Tokyo.
1978
Apple ia introdui e comensa envia discadores per la Apple 2, e ia comensa la projeta de rexerca e developa de LISA.
BITNET (Because It's Time Network - "rede car esta es la momento"), un protocol per eposta, servadores de listserv, e transfere de fixes, es instituida como un emprende de la Universia de la Site de New York e la Universia de Yale.
Xerox ia relasa la computadores 8010 e 8020 Star.
IBM ia anunsia sua computador personal.
DEC ia anunsia sua computadores personal.
Hewlett-Packard ia introdui la computador tecnical HP 9000 con tecnolojia "supertelia" de 32 bitios. Lo es la "comutador sentral de ofisia" prima, tan potiosa como la computadores con grandia de un sala de la desenio de 1960.
1979
Kevin MacKenzie ia inventa la emoticon :-)
Grupos de novas "Usenet" ia comensa.
1980
La confere prima de AAAI ia aveni a Stanford per discute inteleto artifis.
Telnet ia es inventada, e labora de distantia longa ("telecomuta") per evita viajas dial ia es aora posible.
1981
Programes per listas de eposta Listserv ia comensa: Grupos de interesas enlinia e seminares virtual ia es formida.
Osborne ia introdui la computador portable prima.
MS-DOS es introduida.
1982
Discos compata (12 cm, 74 minutos) e juadores ia es relasada par Sony e Phillips en Europa e Japan. A un anio plu tarda, la tecnolojia de CD ia es introduida en la SUA.
1983
IBM anunsia la PCjr.
Apple ia anunsia Lisa, la computador prima per usas comersial con un interfas grafical. Lo ia ave un CPU 68000 de 5 MHz, un disco mol de 860 kilobaites e 5,25 ditones, un scermo blanca-negra scermo de 12 ditones, un teclador desfisada, e un mus.
1984
Apple ia introdui la disco mol de 3,5 ditones.
La computador personal Macintosh ia es introduida par Apple. La prima ia ave 128 kilobaites de memoria e un discador de discos mol de 3,5 ditones e 400 kilobaites. La sistem de opera ia inclui un interfas grafical blanca-negra e un scrivador (MacWrite) e desiniador (MacPaint).
La sistem de nomes per dominas ia es instituida (la sufisas como .com, .gov, .org, .nl, etc).
1985
La tecnolojia CD-ROM (discos e discadores) ia es developada par Sony e Phillips.
La inventa de la protocol per transfere de fixes (FTP).
1987
Microsoft ia introdui Windows 1.01.
Tim Berners-Lee ia inventa la WWW ("world-wide-web") cuando el ia labora a CERN, la laboreria de fisica de particulas en Genev, Suiz. El ia gania la Premio de Technolojia de Suomi en april 2004. La premio de $SUA 1,2 milion ia es presentada par Tarja Halonen, presidente de Suomi.
1990
Archie, un util per xerca la rede FTP, ia es fabricada par Peter Deutsch de la Universia de MacGill.
1991
La tecnolojia de CD-R (discos compata rejistrable) ia es relasada.
Xercador WAIS ia es inventada par Brewster Kahle de Thinking Machines Company.
Gopher (pd gofer) es creada a la Universia de Minnesota.
La servador WWW ia combina la sintatica de adirijes URL, la lingua per documentos HTML, e la protocol per comunica HTTP.
Senator Al Gore ia introdui la Ata per Computa e Comunica de Funsiona Alta (conoseda como la Gore Bill) per promove la developa e usa de la interede. Entre otra cosas, lo ia finansia la developa de la surfador Mosaic en 1993. Pos un intervisa en 1999, sua oposores political malsita Gore, disente ce el ia atesta ce el ia inventa la interede.
1992
La interede ia es composada de sirca 20 servadores.
1993
La colie universal de sinias codigida con baites multiple (UCS) ia es publicida par la Organiza Internasional per Normi (ISO). Lo ia ave la intende de inclui ultima tota leteras e otra sinias usada en tota linguas scriveda en la mundo, como ance tota simboles matematical e otras.
La surfador grafical de la WWW, Mosaic, ia es developada par Marc Andreessen. La interfasa grafical per usores ia causa ce la WWW deveni un competor per Gopher. La produi de pajes per la rede ia deveni un taxe fasil, an per amatores.
La interede ia es composada de plu ca 200 servadores.
1994
Labyrinth, un surfador grafical tridimensional (VRML) ia es construida par Mark Pesce. Lo ia furni asede a la realia virtual de ojetos tridimensional (cosas, construidas, vistas, etc).
Netscape, surfador de la WWW, ia es developada par Marc Andreessen.
1995
La formato RealAudio de difusa fluente ia es introduida.
La lingua de programi Java ia es developada par Sun Microsystems. Prosede de datos en la surfador de la usor ia pote es fada con microprogrames ("applets") secur e descargable.
La xercador Metacrawler ia es introduida. La contenida de la WWW ia pote es catalogida en modo ativa e automata.
La libreria enlinia prima, Amazon.com, ia es introduida en Seattle par Jeffrey Bezos.
AltaVista, un catalogador de la WWW, ia es construida par Digital. Un xerca multe rapida de 30-50% de la WWW ia es alora posible.
1996
Google ia comensa como un projeta de rexerca par Larry Page e Sergey Brin cuando los ia es studiante a Stanford.
La interede ia es composada de 100 000 servadores.
1997
La interede ia es composada de sirca 650 000 servadores.
"Deep Blue 2" ("blu profonda") ia vinse Kasparov, la juor xef de xace en la mundo. La mundo como nos sabe lo ia fini.
La tecnolojia de DVD (videador e filmas) ia es relasada. Un norma es creada per DVD rejistrable.
Televide par la rede ia es introduida.
1998
Kevin Warwick, profesor de sibernetica a la Universia de Reading en Britan, ia deveni la umana prima ci es un "ospitor" per un microtelia. La capsula de vitro, con grandia de 23 mm par 3 mm, con alga microprosedadores diversa ia resta en la braso sinistra de Warwick tra 9 dias. Lo ia es usada per proba la interata de la implantada con portes e luminas controlada par computador en un construida de ofisias "intelijente".
La interede ia es composada de 3,6 milion servadores.
1999
La interede ia es composada de 4,3 milion servadores.
Netomat, un surfador nonlinial, par la artiste Maciejl Wisniewski de New York ia es introduida. La program abrida ia usa Java e tecnolojia de XML per naviga la rede par la datos (testos, imajes, sonas) cual lo conteni, en contrasta con la surfadores tradisional (Mosaic, Lynx, Netscape, Explorer, etc) cual naviga mera la pajes de la rede.
1999 - 2000
"2000 Today", un program global de televide, ia reporta direta sin para per 25 oros sur la selebras de la anio nova en 68 nasiones tra la mundo. Lo ia es la program prima de acel dura e covre jeografial. La crea de la program ia nesesa plu ca 6000 persones e un estende de 60 satelites de comunica per ateni mil milion vidores de tota zonas de tempo tra la globo.
Wikipedia ia comensa como un estende de Nupedia par Jimmy Wales e Larry Sanger.
Sentenio 21
editaLa saga continua!
Fontes major
edita- Chronology of Digital Computing Machines, Mark Brader (no plu disponable)
- From the Abacus to the Apple: a Timeline, Bobbi A. Kerlin (no plu disponable)
- Global Networking: a Timeline, T. Matthew Ciolek - http://www.ciolek.com/GLOBAL/milestones.html
E otras no plu recordada.