La orijinas de la teoria de evolui
Psicolojia
La teoria de evolui es probable la idea la plu disturbante de la sentenio 1800, e nos no ia vide ancora la tota de sua efetos. Lo ia deveni la funda de biolojia. Asi es la nara de sua comensa.
Charles Robert Darwin
edita
Charles Darwin (1809-1882) ia nase en Shrewbury, England, en 2 febrero 1809. Sua padre ia es Robert Waring Darwin, un mediciste e fio de Erasmus Darwin, ance un mediciste e un scrivor e naturiste multe respetada. Sua madre ia es Susannah Wedgwood Darwin. El ia mori cuando Charles ia ave 8 anios.
Charles ia es educada en la scola local, enseniada par Dr Samuel Butler. En 1825, Charles ia vade a Edinburgh, Scotland, per studia medica, ma el ia comprende pronto ce el no ia ave un stomaco forte per lo. Donce, el ia cambia universias e move a Cambridge, suposada per deveni un eglesor. El ia es vera plu interesada en entomolojia - spesial scarabes - e en la xasa. El ia gradua de la Scola de Cristo de Cambridge en 1831.
Algas ia dise ce, an cuando el ia es un om joven, el ia ave un mente pasiente e abrida, e ce el ia spende multe oras coliente esemplos de un tipo o un otra e pensante sur ideas nova. La idea de evolui ia es multe en la aira en esta eda: Lo ia es cresente clar a naturistes ce spesies cambia, e ia es cambiante per multe milenios. La demanda cual resta ia es como esta cambias aveni?
Un de sua instruores, John Henslow, ia coraji ce el aplica per la posto (nonpaiada) de naturiste en un mision de jeometre sur la barcon aora famosa, la Beagle, su la comanda de capitan Robert Fitz-Roy. Charles ia parti de England per la ora prima en sua vide en 27 desembre 1831. El no ta reveni asta 2 otobre 1836.
La parte la plu grande de la viaja de la barcon ia es spendeda mesurante la costa de America Sude e isolas prosima, ma lo ta ance visita isolas variosa en la Pasifica, e Zeland Nova e Australia. Lo ia es la Isolas Galapagos cual ia impresa Darwin la plu. Ala el ia trova pinsones cual ia evolui un varia de becos - cada beco conveninte a un comeda spesifada. Varia natural ia es elejeda en cualce modo per caxi la nix ecolojial disponable sur la isolas peti.
Cuando el ia reveni a England, Darwin ia scrive alga libros fundida sur sua rexerca sur jeolojia e la spesies de plantas e animales cual el ia oserva e colie. El ia publici ance sua jornal con la nom Jornal de un naturaliste. El nota ce el ia es la plu impresada par la modos en cual animales simil ia ajusta a ecolojias diferente.
De un tempo temprana, Darwin ia reconose ce eleje ia es la prinsipe cual umanas ia usa tan susedosa cuando eleva animales. Cual el ia nesesa aora ia es un idea sur como natur pote fa acel taxe sin la aida de intelijentia!
En 1838, el ia leje un libro par Malthus nomida Population (cuantia de abitores). Malthus ia introdui la idea ce compete sur recursos ta manteni la cuantia de abitores stable en natur. El ia averti ance ce la cuantia de persones, cuando lo tensa recursos, ta sufri ance!
En 29 janero 1839, Darwin ia sposi Emma Wedgewood, un cusina. Los ia abita en London per alga anios, e alora move a la vila de Down, 15 milias estra London, do los ta vive per la resta de sua vives. Darwin ia comensa sufri de un maladia ce el ia developa probable de un morde de un inseto en la Andes multe anios a ante. Francis, sua fio, no ta pote parla sufisinte sur como la dedica de sua madre ia aida la bonstate de sua padre. Sin el, Darwin ta es multe min produinte. Darwin e Emma ta continua per ave du fias e sinco fios.
Darwin ia scrive un contorni de sua teoria en 1842. En 1844, el ia scrive un letera cual dise "Final, la brilias de lus ia veni, e me es cuasi convinseda (multe contra la opina con cual me ia comensa) ce spesies no es nonmutable (lo es como confesa un mata)"
Un esposa completa de sua ideas ia es sirca dui completa, cuando el ia reseta un esajo de A. R. Wallace con un demanda per comentas. La esajo ia contorni un teoria de eleje natural! Wallace ia leje ance Malthus e, en 1858, malada con febre, la idea completa ia veni a el en un lampi. Darwin, con sua esita, ia pospone revela sua ideas a la publici siensal per 20 anios.
Darwin ia envia la esajo a sura ami, Charles Lyell de la Sosia Jeolojial, como Wallace ia demanda. Lyell ia envia la esajo, con un esajo par Darwin, per un presenta a un confere siensal.
La idea ia es clar: Como persones pote esajera un o un otra varia minor par eleje canes o boves per reprodui, natur pote eleje varias simil, par permete sola la varias plu susedente per survive e reprodui en la luta sur recursos limitada. An si la cambias ta es peti e lente, la milenios ta permete la diversia clar de natur! Darwin ia nomi esta "eleje natural".
En 1859, Darwin ia publici final sua obra mestral: La orijina de spesies par la modo de eleje natural. La libro ia es un susede direta. On ave ance, serta, multe debates, la plu consernante la contrasta entre eleje natural e la esplicas de relijio tradisional.
Eleje natural ia es comun confusada con un idea plu temprana de la naturaliste franses, Lamarck. El ia sujeste ce la cualias developada en la vive de un animal ia es pasada a sua enfantes. La esemplo famosa es como la estende repeteda de la colo de un jirafa, tra multe jeneras, ta esplica la apare strana de la animal. Esta teoria - lamarcisme - ia es la competor de eleje natural per desenios plu.
En 1868, Darwin ia publici La varia de animales e planta su doma. Alora, en 1871, el publici la desende de umania, e eleje en relata a seso. Esta ia es vera du libros en un. La parte du es sur eleje sesal. Esta esplica, per esemplo, la colores briliante en multe avias mas. Ambos la color de la mas e la atrae a la color par la fema en cortea es elejeda car esta varias benefica la enfantes: En la nido, la fema es cuasi nonvidable par predores, ma predores es atraeda par la mas. Donce, la ovos e enfantes, protejeda par la fema, survive per reprodui plu.
La parte de la libro La desende de umanas es un introdui corta a la idea ce nos es ance la resultas de eleje natural. Esta parte ta resulta en multe desacordas furiosa!
En 1872, La espresa de emosia ia es publicida. A esta ves, Darwin ia discute la evolui de la siniales cual animales usa per comunica - e el ia relata esta siniales a la espresa de emosia en umanas. Esta es la paso prima a cual nos nomi aora sosiobiolojia (e psicolojia evolual)
En ajunta a esta libros influente, Darwin ia joia ance studia e scrive sur plantas. En 1862, el ia scrive Ferili de orcideas. En 1875, el publici Plantas trepante e Plantas insetivor. En 1877, Formas diferente de flores sur plantas de la mesma spesies ia veni. En 1880, el ia scrive, con sua fio Francis, La potia de move en plantas E en 1881, el ia publici la libro famosa, La formi de mofo vejetal tra la ativia de vermes!
Charles Darwin ia mori 19 april 1882. El ia es enterada a la Abaderia de Westminster. El ia es reportada como un om jentil e compatiosa, amada par sua familia e amis. Estra de sua viaja sur la Beagle, el ia parti rara de sua casa en Down. Esitante, el ia sede sua credes relijiosa e abitua se con un agnostica cual no ia preveni el de partisipa con sua parocia en obras de caritas.
Alfred Russel Wallace
edita
Alfred Wallace ia nase en 1823 en la vila de Usk en Monmouthshire, England. Sua posibles ia es limitada car sua padre ia mori cuando Alfred ia es ancora un om joven. Donce, prendente vantaje de un talento natural, el ia deveni un ensenior de desinia.
El ia vade a un mision a America Sude con sua ami Henry Bates. El ia spende 4 anios en la junglas de Brasil. Durante sua reveni a England, la barcon ia ensende e afonda - con sua 4 anios de notas e colies de spesies. La ecipo e pasajores ia es salvada, fortunosa, par un barcon pasante. Esta aventuras ia es la funda de Viajas sur la Amazona e la Rio Negra, publicida en 1853.
Pronto pos, el ia parti a un viaja du, esta ves a Malaisia. Esta ta dura 8 anios. En esta mision ce el, malada con febre, ia ave la idea per eleje natural, e en du dias el ia scrive un esajo sur la tema e ia envia lo a Darwin. Pos sua reveni de Malaisia, el ia publici La arcipelago Malaisia, un jornal detaliosa sur la plantas, animales, e popla de la isolas.
El ia mori 7 novembre 1913. An ce el ia es ofreda un loca a Abaderia Westminster, sua familia ia prefere ce el es enterada prosima a sua propre casa. Sua entera es marcada, conveninte, par un tronco de un arbor petrida.
Thomas Henry Huxley
edita
Thomas Huxley ia nase 4 maio 1825, la fio de George Huxley, un mestre de scola, e Rachel Huxley. El ia reseta du anios de educa formal a la scola de sua padre, e ia es, per la resta de sua vive, autoinstruida.
An ce el ia es elevada como un anglican, el ia deveni interesada en unitarianisme e sua pensas naturiste. Esta interese ia condui el per comensa studia biolojia con sua frate par sposi. Sua studias ia resulta en un dona per studia a la ospita a Charing Cross en London, do el ia gania premios en fisiolojia e cimica organica.
El ia servi como un sirurjiste aidante sur la HMS Rattlesnake, cual ia es jeometrente la acuas sirca Australia e Gine Nova. Per pasa la tempo, el ia comensa investiga la formas variosa de vivente de la mar.
Huxley ia encontra e deveni enamada par Nettie Heathorn en Sydney en 1847. El alora ia continua sua rexerca biolojial en acel parte de la mundo. Pos reveni a England, el ia es elejeda a la Sosia Real en 1850, ma no ia pote trova un posto academial. Depresada e coler, el ia comensa suporta ideas controversa - incluinte la nega de la varia cristian de jeolojia.
En 1854, el ia comensa instrui a la Scola Governal de Minas. Final fundida como un senior, el ia trae la pasiente Nettie a England e los sposi en 1855.
Huxley ia encontra Darwin en 1856, e los ia developa un amia longa e intima. El ia comensa un campania per la teoria de Darwin, cual ia gania per el la nometa "la buldog de Darwin". Spesial, el ia combate contra la eglesa e per la conseta de evolui de umana de primates. En la mesma periodo, el ia es un promovor grande de siensa jeneral e educa siensal spesifada.
Huxley ia es la fonte de multe rexerca, de sua obra orijinal sur viventes de la mar a sua obra plu tarda sur la evolui de vertebratos. El ia ance developa la idea de agnosticisme - par cual el ia intende la crede ce realia ultima ta es sempre ultra la estende de umania. E el es la orijina de la metafisica conoseda como epifenomenalisme.
En 1882, sua fia deveni demente. El ta mori 5 anios plu tarda su la cura de Jean-Martin Charcot, la psiciatriste franses. Huxley ia deveni multe depresada e ia jubila de sua rol como profesor. Per un periodo, el ia promove un idea nomida darwinisme sosial (vide a su), ma retira anios plu tarda per dise, con Darwin, ce umilia es la plu bon servida par promove etica en loca de instintos.
El ia mori de un ataca de cor durante un parla, 29 junio 1895.
Herbert Spencer
edita
Herbert Spencer ia nase 27 april 1820, en Derby, England. Sua padre ia es un mestre de scola, e ambos sua parentes ia es "disentores" (pd nonconformistes relijiosa). Spencer ia es clar talentosa e ia es, per la plu parte, autoinstruida.
Un scrivor eselente, el ia scrive articles sur problemes sosial per jornales variosa de la eda e an ia deveni un editor de La economiste per alga anios. En 1855, el ia publica La prinsipes de psicolojia. Esta ia deveni un parte de un serie de libros, cual el ia nomi La filosofia sinteseda, cual ia inclui biolojia e sosiolojia en ajunta a psicolojia.
Orijinal, el ia crede en la erita de cualias aprendeda (lamarcisme), ma el ia deveni un seguor de la teoria de Darwin. Lo ia es, vera, Spencer ci ia introdui la espresa "survive de la plu bon cabente". Ma es ia ance cambia la teoria a un teoria sosial cual coraji individualisme estrema a politicas economial laissez faire (pd mercatos libre de governa) nomida darwinisme sosial.
Fundal, survive de la plu bon cabente ia es aplicada a persones competente contra otra persones, e el ia implica ce lo ia es un debe sosial per aseta la fato ce alga persones ta deveni rica e algas ta deveni povre - e ce la seguentes de povria debe no es disturbada. An sosias intera - como England - ia es en un luta per survive cual no ta permete debilia de vole o tro multe compatia
Darwinisme sosial no es cualce cosa cual Darwin ta aproba. Lo conteni la falasia de falsa analojia: Sosia umana no es un paralel bela de la mundo biolojia de nonumanas. Triste, darwinisme sosial pare asi per sempre, e lo pote es videda en ajendas faxiste, conservaliste, e libertariste, en en filosofia personal como lo de Ayn Rand.
An tal, Spencer es videda como un de la pensores la plu produosa de sua eda. El ia mori 8 desembre 1903, en Brighton, Sussex.
Vide ance Evolui e Charles Darwin.