Psicolojia positiviste e posmoderniste
Psicolojia
De positivisme a posmodernisme
editaLa filosofia cual veni per domina rexerca en psicolojia en la dui prima de la sentenio de 1900 ia es nomida positivisme lojical. Esta filosofia ia comensa con la encontras de filosofistes e fisicistes en Wien e Berlin en la desenio de 1920. La nomes cual es plu asosiada con positivisme lojical es Moritz Schlick (la fundor) e Rudolph Carnap.
La idea fundal de positivisme lojical es ce tota sabe es fundida sur oserva empirical, aidada par le usa atendente de lojica e matematica. La metodo ideal en siensa es la proba de ipoteses. En fato, cualce declara teorial ave sinifia sola si lo pote es probada empirical. Esta idea es nomida la prinsipe de serti.
Los sinifia en la scema plu grande ce tota declaras metafisical (e, natural, teolojial) es sin sinifia. La sola usa de filosofia, seguente la positivistes lojical, es la investiga de la sinifia de declaras siensal. Tra tempo, positivisme lojical ta domina la pensa de la plu de siensistes en fisica e cimica, e multe en biolojia e psicolojia. La conduistes ia adota lo la plu zelosa, e multe de los ia porta lo con se cuando los ia move a la psicolojia cognisial.
Ma en la dui du de la sentenio de 1900, un filosofia nova nomida posmodernisme ia veni con alga criticas potiosa de positivisme lojical e tota filosofia moderna. La nomes la plu bon conoseda asosiada con posmodernisme es Michel Foucault e Jacques Derrida.
Posmodernisme ia comensa en arciteta, cuando alga arcitetores joven en la sentenio tarda de 1900 ia rebela contra lo cual sua enseniores ia dise a los sur la modos "coreta" e "noncoreta" per desinia construidas. Sua enseniores a acel tempo ia es, per la plu parte, modernistes, ci ia gusta linias direta e formas jeometrial, como nos vide en multe rascasielos. Donce, la rebelores ia nomi se posmodernistes. Ante, la asentua ia es sur manteni un filosofia arcitetal o un otra, un stilo o un otra. La posmodernistes dise ce on pote rompe la regulas! Misca la stilos! Jua con spasio! Nega gravita, si tu gusta!
(Nota: La construidas posmoderniste pote es plu fasil trovada en Europa, spesial en Nederland e Txesco. La construis moderniste pote es plu fasil trovada en la sites de la SUA)
En filosofia, modernisme refere a la filosofia cual ia comensa con la Lumina. Alora, filosofistes ia xerca per un Veria singular, monolitin. Ma, comensante con la seticisme de Hume e la filosofia critica de Kant, filosofistes ia deveni plu consensa de la limitas de filosofia. An comun ascondeda par la popularia de ideas como la asolutisme de Hegel e la positivisme de Comte, esta linia de pensa setica o critica ia continua tra la sentenio de 1800 a la perspetivisme de Nietzsche e la praticalisme de William James.
La idea fundal de posmodernisme es ce realia ojetal o veria ultima a cual nos pote ave asede direta no esiste. Veria es un caso de perspetiva o punto-de-vista. Cada individua construi sua propre comprende de realia, e nun es capas de evade sua perspetiva.
En la curso de istoria, alga construis de realia ia es vantajida, per dise, suportada par un elite potiosa - omes rica de Europa e la SUA, per usa un esemplo comun. Otra construis ia es supresada. Esemplos de construis supresada inclui la vistas de femes, la povre, e cultures nonueste.
Tota es videda tra "oculos" - sosial, cultural, an individua. An siensa! Thomas Kuhn, un filosofiste de siensa, ia indica ce siensa es un conserna desordinada, plen de influes personal, cultural, an political. "Veria" es cualce cosa ce la siensistes con la autoria a presente - a min asta esta situa es inondada par contradises. Alora un "revolui siensal" - un desloca de modeles aveni, e la xerca recomensa denova.
La util major de posmodernisme es nomida desconstrui. Desconstrui es la mostra ce alga sistem de pensa es ultima noncompleta o nonrazonante an par sua propre ideas e razona interna. Lo es como un varia estendeda de "redui a asurdia" - critica de la interna a estra.
Par desconstrui alga de nosa filosofias, istorias, leteratures, e siensa tradisional, posmodernisme causa ce nos deveni consensa de la prejudis nos no pote vide fasil car acel prejudis es tro prosima a nos, tro multe un parte de nos. Esta ia es la taxe, per esemplo, de femisme.
Femisme ia comensa como un clama per atende a femes plu seria. Per miles de anios, la vives de femes ia es videda como no plu ca un nota basa a los de omes, e nos debe atende a femes como temas de interesa seria e como pensores en sua propre direto. Sola resente, per esemplo, algas ia descovre ce Maria Anna Mozart, la sore de Mozart, ia es ance un musiciste e composor multe talentosa. Ma, cuando el ia ateni la eda cuando sposi ia es espetada, el no pote continua sua consertas e composa. La rol de femes alora ia es sposi e produi enfantes. Mozart ia adora sua sore, e el ia loda sua jenio multe veses, ma... la rol de femes ia es asetada par cuasi tota membros de sua sosia como "natur" e "la vole de dio".
Femistes dise ce, si un es filosofiste (o artiste, o istoriste, o siensiste) mas, on es nonconsensa prejudida en esta modo. Si on desira boni sua sabe de nosa mundo, nos nesesa ave la perspetiva fema ance. Estas es multe bon puntos!
Un otra promove posmodernisme es multiculturisme. Lo es razonada ce pensores de la mundo ueste es nonconsensa prejudida par sua suposas cultural, strutures sosial, e istorias. Per multe anios, per esemplo, on ia ave un tende per vide europeanes e sua desendentes como "normal", e otra poplas e sivilias en alga modo inferior o deviante.
Oji, la plu de siensistes sosial es consensa de la perspetivas de otra cultures, e ia esamina sua propre prejudis. Siensa sosial ia bonveni jeneral la contribuis de un cuantia sempre estendente de siensistes de orijina nonueste.
Un otra prejudi es lo cual veni de clase sosial. Asta resente, la plu de siensistes e profesores ia es membros de la clases alta, con poca compati per, e multe min comprende de, la clase de povres laborante. An oji, nos debe demanda de nos mesma, per ci nos como siensistes labora? Plu frecuente, lo es per instituis, academial o corporada. Nos fa, consensa o no, lo cual nosa seniores demanda de nos!
Nonfortunosa, alga sujeste ce la viste de la clases basa de sosia es plu bon ca la vista de la alta. Simil, alga femistes sujesta ce la perspetiva fema es esensal plu bon ca la perspetiva mas. Esta vistas iniora la posible ce omes pote vinse sua prejudis, e la posible ce alga femes pote es egal prejudida. Nos trova la mesma tende entre suportores de otra filosofias critica. Lo no es nesesada vera ce, si un teoria es clar european, ce lo era, o ce lo es nonueste ce lo es perfeta. E an algun ci rexerca per corporas multinasional pote, a veses, es coreta. (Oce, probable no.)
A la otra lado, no tota perspetivas es egal valuosa. Astrolojia e frenolojia pote es perspetivas sur personalia, ma los es, en fato, clar noncoreta. La esplicas de condui umana par xamanes, an si multe interesante e importante per studia, es no plu probable per es coreta ca la esplicas de la pensores temprana european.
Desconstruisme e filosofias posmoderniste jeneral tende es filosofias negativa. Los critica, ma no comun ofre alternativas. Sua razona comun ave suporta minima empirical, o an pensa razonante. Nota ce los critica nosa capasia per es empirical o razonante!
Prima, tradisionaliste ia es impresada e ia deveni interesada en reconose sua limitas. Omes, en ajunta a femes, ia deveni femistes, europeanes e esuanes e otras ia abrasa multiculturisme. La plu ia bonveni la varia de perspetivas.
Ma ultima, algas ia nota: Si tota veria es relativa (en la mesma modo como si tota moralia es relativa), alora femisme, multiculturisme, etc, no es esensal cualce plu vera o valuable ca masismel (comun nomida "sesisme") o eurosentrisme, etc. Si nos no pote judi cual es o no es vera, como nos pote progresa? Como nos pote boni se mesmas e nosa sosias cuando "progresa" es tota en la oios de la regardor?
Si nos crede ce tota perspetivas es egal valida, alora la sola cosa cual leva un perspetiva supra cualce otra, como Nietzsche ia nota, es potia. Si filosofia e siensa es reduida a lutas de potia entre "autorias", nos ia vade a retro, do nos ia comensa, a 17 febrero 1600, cuando la eglesa ia arde Giordano Bruno a un palo.
Donce, pos nos ia deveni plu conoseda (e resta conoseda!) de nosa limitas e prejudis, consensa an de la limitas de empiricalisme e razonalisme mesma, nos debe ancora reveni a empiricalisme e razonalisme, como la sola modos ce nos pote a min prosimi veria, posible como la sola modo par cual nos pote survive como un spesies. Nos debe aprende la lesones de posmodernisme, e alora reveni a nosa laboras!
La situa per psicolojia
editaAlora: do nos es oji, en la anios prima de un milenio nova?
La teorias de Freud es lente desaparente. Sua intuis ia es asorbeda en un psicolojia clinical jeneral cual es dominada par praticas umaniste fundida plu sur Carl Rogers ca sur Sigmund Freud. La scola de relatas de ojetos ia atenta resta con Freud, ma lo no es multe plu ca un reconose tarda de ideas umaniste reconstruida en la lingua de psicoanalise. La psicolojia de Jung es ance desaparente. Jung continua e la studia de mitos e simbolisme e en la popularia strana de la categorias de Myers e Briggs. Adler, a la otra lado, ia es "redescovreda" e sua intuis integrada en psicolojia umaniste e esistentialiste. La mesma pote es notada per "neo-adlerians" como Karen Horney e Erich Fromm.
Sensa e persepi, la sujetos de la plu de la fundores de psicolojia como un siensa, reseta min atende tra la anios. La psicolojia de gestaltes ia es asorbeda en la corente dominante, e ia perde sua rol como un teoria separada. Sua du enfantes, psicolojia clinica umaniste e la campo de psicolojia sosial es, natural, vivente e sana.
Psicolojia sosial ia deveni un misca de consernas umaniste e rexerca esperimental multe inventosa. Nonfortunosa, lo ia rejeta sua radises fenomenolojiste, e on ave poca teori coerente o programes de rexerca per la futur. La plu de psicolojia sosial es composada de proba ipoteses intuida e no interliada.
Otra campos, como psicolojia de personalia e de developa, ia segue la mesma model como psicolojia sosial. Personalia tende es restrinjeda a rexerca cuantial, per la plu parte en diferes entre individuas o grupos. La model xef es la crea de esaminas usante analise de fatores, an si analise de fatores es un metodolojia debil cual pote relata plu a semantica ca a construis con referes psicolojial real.
Psicolojia de developa ia deveni cresente la studia de aplicas, spesial en relata a educa e la eleva de enfantes. Un avansa es a la considera de la vive intera, de nase a mori. Esta cambia ave ance lias a areas aplicada, como la problem sosial de un popla cresente vea.
Fenomenolojia como un metodo ia deveni un parte de un move plu jeneral nomida metodos cualial. Esta metodos ia deveni popular en alga campos, spesial educa e curoria, e en alga perspetivas, como femisme e multiculturisme. Triste, la metodos no es sempre usada bon. Los es par natur multe plu afetable par prejudi, e multe de la rexerca no es multe plu ca esplora.
Esistentialisme ia fusa con umanisme, a veses contribuinte sua profonda filosofial, a otra veses sola ajunta sua jergo confusante. Alga umanistes ia verje a la campo de psicolojia transpersonal, cual investiga cosas como states noncomun de consensa e esperias spirital. An si on ave rexerca cual es valuable asi, la plu de esta es un forma de misticisme de la "eda nova" desemblada como un siensa psicolojial.
Conduisme, simil a psicolojia de gestaltes, ia es asorbeda en la psicolojia de la corente dominante. Studiantes continua memori la modeles de condisiona de Pavlov e Skinner, ma lo es plu comprendeda ce estas no es multe usosa per studia la condui de umanas. Vera, sola Tolman e Bandura ia ave un efeto durante. La conduiste seria es movente a la studia de prosedes fisiolojial.
Psicolojia cognisial ia deveni deludente. Lo ia comensa con la laboras de Neisser, e la influe de la studia de intelijentia artifis, lo pare ce Neisser e la rexercores de "IA" ia abandona la program. Neisser ia pensa ce psicolojia cognisial ia iniora realia e deveni un tipo de jua inteletal. Rexercores de "IA" ia trova ce lo no es nesesada per modeli la prosedes de cognisio umana per esede la funsiona de umanas. Cuando la computador "Deep Blue" ia vinse sur la mestre grande de xace Garry Kasparov, la loca secur de umanas a la culmina de creada pare es finida.
Un resulta ladal de psicolojia cognisial es un interesa nova en tal problemes tradisional de filosofia como la natur de consensa. Car lo es videda comun como la demanda psicolojia "ultima", lo ia jeneral alga stimula a conferes. Ma la "problem ultima" no debe es un problem: lo es sola un problem si on insiste, contra tota razona, resta como un materialiste!
La parte la plu ativa de psicolojia oji es psicolojia fisiolojial. Prima, la progresa stonante en mapa an la serebro vivente e operante con la tecnolojia de la "CT", "PET", e "MRI" va pronto resulta en un imaje cuasi completa de la sircuitos de la serebro. Du, la descovre de drogas nova efetosa cual opera a la sinapse ia revolui psicolojia clinical. E tre, la completa de la mapa de la jenom umana eraldi la comensa de un comprende multe plu completa de la lias entre jenetica e condui. A la otra lado, psicolojistes fisiolojial es identifiante se plu e plu con sua colaborores biolojial e medical, e distantinte se de la lado "plu mol" de psicolojia. Ambos va regrete esta.
Relatada a la developas en psicolojia fisiolojia es la efeto de sosiobiolojia sur teoria psicolojial. Frecuente nomida psicolojia evolual (los no difere), esta vista ia produi un cuantia sinifiante de ipoteses interesante sur a orijinas de condui umana e la esiste de instintos cual limita, o an defini, nosa natures. Nonfortunosa, sosiobiolojia ia ofre poca ipoteses demostrable (o la demostras no es "validida" par esperimentalistes).
A esta momento, psicolojia es fratida, con un divide mult grande entre la psicolojia umaniste e aplicada e un psicolojia biolojia multe reduiste. Cual nos nesesa es un teoria uninte, un cual evita la estremas fasil. Esta teoria debe es informada par la critica posmoderniste, ma debe ultima funda se sur un empiricalisme vasta e un razonalisme sever. Lo ia es prosimida en la pasada: William James ia fa lo en la desenio de 1890; Gardner Murphy ia fa lo en la desenio de 1950. Lo pare ce psicolojistes no ia es preparada per reconose la implica intera de sua laboras e la laboras de otras. Posible nos va es preparada cuanto un teoria jeneral apare en la futur.
En la entretempo, la studia de la istoria de psicolojia e sua radises en filosofia, medica, e otra campos de studia pote ave un loca importante en nosa educas: Par regarda cosas de la perspetiva grande de istoria, e de la "aspeta de eternia" nos reseta par studia filosofia, posible nos va ave progresa en psicolojia plu pronto e no plu tarda.