Psicolojia de condui

Conduisme es la teoria filosofial cual dise ce psicolojia, per es un siensa, debe foca sua atende a lo cual es oservable - la ambiente e condui - e no a lo cual es sola esperiada par la individua - persepis, pensas, imajes, emosias, etc. Estas es sujetal e imune a mesura e donce pote nunca condui a un siensa ojetal

Sechenov

Bechterev

La conduistes prima ia es rusce. La individua prima ia es Ivan M. Sechenov (1829-1905). El ia es un fisiolojiste ci ia studia a la Universia de Berlin con siensistes famosa como Muller, DuBois-Reymond, e Helmholtz. Dedicada a un fusa de asosisme e materialisme, el ia conclui ce tota condui es causada par stimulas.

En 1863, el ia scrive "Reflexes de la serebro". En esta libro sinifiante, el ia introdui la idea ce on ave no sola prosedes stimulatne en la sistem de nervos, ma prosedes inibinte ance.

Vladimir M. Bekhterev (1857-1927) es un otra conduiste rusce temprana. El ia gradua en 1878 de la Academia Medical Militar en San Petersburg, un anio ante Pavlovl ia ariva ala. El ia reseta sua diploma de dotor medical en 1881 con sola 24 anios, e alora ia vade per studia con DuBois-Reymond e Wundt en Berlin, e Charcot en Frans.

El ia funda la laboreria prima de psicolojia en Rusia a la Universia de Kazan en 1885, e alora reveni a la Academia Medical Militar en 1893. En 1904, el ia publica un paper titulida "Psicolojia ojetal", cual el estende a tre volumes.

El ia nomi sua teoria "reflexolojia", e ia defini lo como la studia ojetal de lias de stimulas e respondes. Sola la ambiente e la condui debe es discuteda! E el ia descovre lo cual el ia nomi la reflexe asosiada - cual Pavlov ta nomi la reflexe condisionada.

Ivan Pavlov

Ivan Pavlov

Cual condui nos a la rexercor la plu famosa de Rusia, Ivan Petrovich Pavlov (1849-1936). Pos studia per la pretia, como sua padre, el ia cambia sua studias a medica en 1870 a la Academia Medical Militar en San Petersburg. Lo debe es notada ce el ia pasea de sua casa en Ryazan prosima a Moscva sentos de miles a San Petersburg!

En 1879, el ia reseta sua diploma en siensas natural, e en 1883, sua diploma medical. El ia vade per studia a la Universia de Leipzig en Deutxland. En 1890, el ia es ofreda un posto como profesor de fisiolojia a sua universia orijinal, do el ia spende la resta de sua vive. Lo ia es en 1900 ce el ia comensa studia reflexes, spesial la responde salival.

En 1904, el ia es donada la Premio de Nobel en fisiolojia per sua labora sur dijesta, e en 1921, el ia reseta la Premio de la Eroe de la Revolui de Lenin se mesma.

Condisiona Pavlovian (o clasica) es fundida sur reflexes: On comensa con un stimula noncondisionada e un responde noncondisionada - pd, un reflexe. Alora, on asosia un stimula neutra con la reflexe par presente lo con la stimula noncondisionada. Tra alga repetes, la stimula neutra solitar va evoca la responde.

Per vide la idea como Pavlov ia vide con sua canes: alga polvo de carne sur la lingua causa ce un can saliva. Toca un campana a la mesma momento, e pos alga repetes, la can va saliva cuando lo oia la campana solitar, sin ce el es donada alga polvo de carne.

Pavlov ia acorda con Sehenov ce on ave inibi en ajunta a stimula. Cuando la campana es tocada multe veses sin la polvo de carne, la can va para saliva a la sona de la campana. Acel es nomida estingui. Ma dona alga polvo de carne un ves plu, e lo es como la responde ia es estinguida nunca: el recomensa saliva a la tono de la campana. La recovre spontan sujesta ce la abitua ia es presente tra la periodo sin la polvo de carne. La can ia aprende simple per inibi sua responde.

Pavlov pote, clar, condisiona no sola stimula ma ance inibi. On pote ensenia la can ce el no va reseta carne tan fasil como on pote ensenia la can ce el va reseta lo serta. Per esemplo, un campana pote indica la ariva de come, e un otra pote indica ce come es finida. Si la campanas es tro simil, o si los es tocada simultan, multe canes ta ave alga cosa simil a un crise mental, cual Pavlov ia nomi neurose esperimental.

En fato, Pavlov ia clasi sua canes en cuatro personalias diferente, como la elinicas antica: canes cual deveni coler el ia nomi colerica, los cual comensa dormi el ia nomi flegmatica, e los ci ia cexa ia es melancolica, e la poca cual ia manteni sua bon umor ia es sanguin. La fortias relativa de la canes per ativa sua sistem de nervos e cuieta lo denova ia es la esplicas. Esta esplicas ta es usada plu tarda par Hans Eysenck per comprende la diferes entra introvertidas e estrovertidas.

Un otra grupo de termas cual veni de Pavolv es la sistem de siniales prima e la sistem de siniales du. La prima es cuando la stimula condisionada ata como un sinial ce un aveni importante va aveni. La sistem de siniales du es cuando simboles acaso comensa representa la stimula, como parolas en lingua umana.

Edward Lee Thorndike

Thorndike

En America, cosas ia es aveninte ance. Edward Lee Thorndike, an tecnical un funsionaliste, ia es developa un varia american de conduisme rusce. Thorndike ia reseta sua diploma laural de la Universia Wesleyan en Connecticut en 1895, e sua diploma mestral de Harvard en 1897. Cuando el ia es ala, el ia ave James como un instruor, e lo deveni bon amis. El ia reseta un posto suportada a Columbia, e el reseta sua diploma dotoral en 18998. El ia resta a Columbia asta sua jubila en 1940.

El va es sempre recordada per sua gatos e caxas rompetestal mal construida. Esta caxas ia ave aparatos per evade de complicas variosa cual nesesa ce la gatos fa plu ca un condui en segue. De sua rexerca, el ia conclui ce on ave du leges de aprende.

1. La lege de eserse, cual es fundal la mesma como la lege de frecuentia de Aristotele. La plu frecuente ce un asosia (o lia neuronal) es usada, la plu forte la lia. Natural, la min ce lo es usada, la plu debil la lia. Esta de ia es nomida la lege de usa e desusa, en ordina.

2. La lege de efeto. Cuando un asosia es segueda par un "situa sasiante", la lia es fortida. E simil, cuando un asosia es segueda par un "situa nonsasiante", lo es debilida. Estra la parolas mentaliste ("sasia" no es un condui o un aspeta de la ambiente), esta es la mesma cosa como la condisiona operante de B. F. Skinner.

En 1929, sua rexerca ia condui el per abandona tota de la leges a supra, estra la parte prima de lege du, cual nos nomi aora reforti.

Thorndike es ance conoseda per sua studia de transfere de instrui. On ia crede en sua eda (e ancora oji par multe) ce si on studia sujetos difisil - an si on usa los nunca - lo ta aida on car lo ta "forti" sua mente, como eserse la musculos. La idea ia es usada per justi forsa enfantes per aprende latina (como oji, on usa esta idea per justi forsa enfantes per aprende calcula). El ia trova ce sola la similia de la sujeto du a sujeto un pote aida aprende la sujeto du. Donce, latina pote aida tu per aprende italian, o aljebra pote aida tu per aprende calculo, ma latina no ta aida tu per aprende calculo, etc.

John Broadus Watson

Watson

John Watson ia nase 9 janero 1878 en un vileta estra Greenville, Carolina Sude. El ia eleva a un cultiveria par un madre estrema relijiosa e un padre ci gusta alcol e femes. Cuando John ia ave 12 anios, los move a Greenville, ma un anio plu tarda, sua padre ia abandona la familia. John ia deveni un joven problemosa e apena fini scola.

Cuando el ave 16 anios, el ia comensa atende la Universia Furman, ance en Greenville, e el ia gradua a 22 con sua diploma mestral. El ia vade alora a la Universia de Chicago per studia su John Dewey. El ia trova Dewey "noncomprendable" e cambia sua intereses de filosofia a psicolojia e neurofisiolojia. Multe povre, el ia labora como un servor a un restorante, scopi la solo de la laboreria de psicolojia, e nuri la ratas per paia per sua studias.

En 1902, el ia sufri de un crise mental, cual on pote ia espeta. El ia sufri de un teme intensa de oscuria e enfantia - la resulta de naras el ia oia en enfantia sur la diablo laborante en la note - e esta ia mali a depresa.

Ma, pos alga reposa, el ia completi sua studias dotoral la anio seguente, ia reseta un aida finansial con sua profesor, la funsionaliste respetada James Angell, e ia sposia un studiante en sua clase sur introdui a psicolojia, Mary Ickes. Los ta ave du enfantes (e la ator Mariette Hartley es sua neta).

La anio seguente, el ia deveni un instruor. El ia developa un laboreria de animales bon operada do el usa ratas, simias, e sternas como sujetos de sua esperimentas. La Universia de Johns Hopkins ia ofre el un posto como un profesor plen e un laboreria en 1908, pos cuando la profesor presedente ia es trovada en un bordel.

En 1913, el ia scrive un article nomida "Psicolojia como un conduiste vide lo" per la Revista Psicolojial. Asi, el descrive un program conduiste. Esta ia es segueda la anio seguente par la libro "Conduisme: Un introdui a psicolojia comparante". En esta libro, el ia presa la studia de ratas como un model usosa per comprende umanas. E, par 1915, el ia asorbe la labora de Pavlov e Behterev sur reflexes condisionada, e ia inclui los en sua paco conduiste.

En 1917, el ia es clamada per servi en la armada, do el ia servi asta 1919. En acel anio, el produi la libro "Psicolojia de la vista de un conduiste", fundal un estende de sua article orijinal.

A esta tempo, el ia estende sua labora per inclui enfantes umana. Sua esperimenta la plu bon conoseda ia es conduida en 1920 con la aida de sua aidor de laboreria, Rosalie Rayner. "Peti Albert", un enfante de 9 menses, ia es condisionada per teme un rata blanca par asosia lo 7 veses con un ruido forte produida par colpa un bara de aser con un martel. Sua teme ia jenerali rapida a un coneo, un jacon de pelo, un masca de Santa Claus[, e an coton. Albert no ia es "descondisionada" car sua madre e el ia move a via. Ma lo ia es clar ce la condisiona tende desapare (estingui) alga rapida, e donce nos suposa ce Albert ia vinse sua teme. Esta sujesta ce teme condisionada no es vera la mesma como un fobia. Plu tarda, un otra enfante de 3 anios nomida Peter ia es condisionada e alora descondisiona par asosia sua teme de un coneo con lete e biscotos e otra cosas positiva gradal.

En acel anio, sua adultera con Rosalie Rayner ia es descovreda, e sua sposa ia divorsa el. La dirijores a Johns Hopkins ia demanda sua resinia. El ia sposi pronto Rosalie e comensa xerca per oportunes comersial.

El ia trova se laborante per la V. Walter Thompson ajenteria de anunsia. El ia teni un varia grande de postos en la compania, e ia deveni vispresidente en 1924. Par la normas de sua eda, el ia es multe susedosa e rica. El ia crese la vende de cosas como un crema de belia "Ponds", cafe de "Maxwell House", e la polvo per bebes "Johnsons", e es crededa como ia inventa la slogan "LSMFT - Lucky Strikes Means Fine Tobacco" (Lucky Strikes sinifia bon tabaco).

El ia publica sua libro "Conduisme", desiniada per la lejor comun, en 1925, e ia revisa lo en 1930. Lo ia es sua esplica final de sua pensa.

Psicolojia, seguente Watson, es un siensa de stimulas e respondes. Nos comensa con reflexes e, par condisiona, nos developa respondes aprendeda. Prosedes en la serebro no importa (el nomi la serebro un "caxa misteriosa"). Emosias es sola respondes fisical a stimulas. Pensa es parla suvose. Consensa es no cosa.

Plu importante, el ia nega la esiste de cualce instintos umana, eritada capasias o talentos, o temperas. Esta ambientisme radisal es refletada en cual es posible sua sita la plu bon conoseda:

Dona des-du enfantes sana, bon formida, e mea propre mundo spesifada en cual per eleva los, e me ta garantia per prende cualcun acaso e condisiona el per deveni cualce tipo de spesialiste me ta eleje - dotor, legiste, artiste, mercator-xef, e, si, an un mendicor o furor, sin regarda de sua talentos, tendes, capasias, inspiras, e raza de sua asendentes. (en Conduisme, 1930)

En ajunta a scrive articles popular per jornales como McCall's, Harper's, Collier's, etc, e la publici "Cura psicolojial de la bebe e enfante" en 1928. Entre otra ideas, el ia crede ce lo ia es plu probable ce jenitores ta ruina la developa sana de sua enfante ca no, e ia disputa multe forte contra tro multe abrasa e otra mostras de ama.

En 1936, el ia es empleada como la vise-presidente de un otra ajentia, William Esty e Compania. El ia dedica se a comersia asta el jubila des anios a pos. El ia mori en New York Site a 25 setembre 1958.

William McDougall

McDougall

William McDougall no vera conveni en esta capitol. Ma sua odia per la tipo de conduisme ce Watson sujesta ce nos inclui el. El ia nase a 22 junio 1871 en Lancashire, England. El ia entra la Universia de Manchester con 15 anios, e ia reseta sua diploma medical de la Hospital de San Tomas en London en 1897. El plu comun ia refere a se como un antropolojiste, spesial pos un mision de un anio per la Universia de Cambridge per visita la tribus de Borneo sentral.

De 1898, McDougall ia teni postos de ensenia a Cambridge e Oxford. Sua reputa ia developa en England con la publica de alga testos, incluinte "Introdui a psicolojia sosial" en 1908 e "Corpo e mente" en 1911. En 1912, el ia es elejeda como un membro de la Sosia Real.

En la Gera Mundal 1, el ia servi en la corpo medical, e trata soldato ci sufri de "xoca de cartux", cual nos nomi aora la sindrom de stresa postraumal. Pos la gera, el se mesma ia reseta terapia de Carl Jung.

El ia es ofreda un posto como profesor de psicolojia a Harvard en 1920. El ia vide se como un seguor de William James, donce el ia vide esta como un onora grande. En la mesma anio, el ia publici "La mente de la grupo", segueda en 1923 par la "Resoma de Psicolojia".

En 1924, el ia partisipa en "La batalia de conduisme" (publicida en 1929). Esta ia es un debate con John Watson a la asembla de la Club de Psicolojia en Washington DC en acel anio. La escutores ia vota (apena!) ce McDougall ia es la vinsor, ma el ta es Watson ci ta gania la favore de psicolojia american per multe anios a pos.

McDougall ia resinia de sua posto como xef de psicolojia a Harvard en 1926, e ia comensa instrui a Universia Duke en 1927. On debe nota ce el ia ave un relata forte con sua sposa, e en 1927, el ia dedica sua libro "Carater e la condui de vive" a el con la parolas "A mea sposa, de ci sua comprende intuosa me debe cual comprende de natur umana ce me ia oteni". El ia mori en 1938.

McDougall ia es un eritiste asta sua mori, promovente un psicolojia fundida sur instintos. El mesma ia refere a sua teorias como psicolojia de evolui. Plu, el ia es la critica xef de conduisme de sua eda. El ia odia spesial la materialisme tro simple de Watson.

McDougall no ia es bon gustada par sua studiantes o colegas. La jornales american (spesial la New York Times) ia es spesial antagoniste a el. La razonas ia es clar: McDougall ia prende sua posa eritiste a un tempo cuando la teorias ambientiste ia rena en la opina popular e psicolojia american.El ia nomi se un "elitiste democrata" e videda la aristocratia de inteleto de un nasion un tesoro cual debe es protejeda. Plu, el ia crede en la natur eritada de diferes entre grupos, nasional e razal, e ia proposa la institui de programes de eujenetica. Per defende el, on debe nota ce el no ia ave cualce simpatia con nazisme e sua varia de eujenetica!

McDougall ia es, per la plu parte, oblidada - asta plu resente, con jenetica e psicolojia evolual deveninte popular.

McDougall ia vide instintos como avente tre composantes:

• persepi - nos atende a stimulas cual es sinifiante per nosa goles instintosa.
• condui - nos presenta atas cual sasia nosa goles instintosa.
• emosia - instintos ave emosias asosiada, negativa e positiva.

Nota ce instintos es intendeda, pd dirijeda a goles. Esta no es un conduisme de stimula-respondes.

Asi es un lista de instintos e sua emosias asosiada:

• evade - teme
• combatea - coleria
• repulsa - desgusta
• proteje - ama, dulsia
• apela per aida - angusa
• copula - libido
• curiosia - misterio
• sede - inferioria
• sertia - superioria
• sosialia - solitaria
• xerca per comeda - apetito
• cumula - avaria
• construi - produosia
• rie - diverti

Clark Hull

Clark Leonard Hull ia nase a 24 maio 1884 prosima a Akron, New York, en un familia povre e campanian. El ia es educada en un scola de un sala, e an ensenia ala per un anio cuando el ia ave sola 17 anios. Cuando el ia es un studiante, el ia sufri seria de febre tifoide.

El ia vade a la Universia Alma en Michigan per studia injenia de minas. El ia labora per un compania de minas per du menses cuando el ia developa poliomielite. Esta ia forsa ce el xerca per un carera min stresante. Per du anios, el ia es la mestre de la mesma scola cual el ia atende como un enfante - aora composada de du salas. El ia leje la obras de William James e ia salva sua mone per vade a la Universia de Michigan.

Pos sua gradua, el ia ensenia per un tempo, e alora vade a la Universia de Wisconsin. El ia reseta sua diploma dotoral en 1918 e resta ala per ensenia asta 1929. Esta es do sua ideas su un psicolojia conduiste ia es formida.

En 1929, el ia deveni un profesor de psicolojia a Yale. En 1936, el ia es elejeda presidente de la Asosia Psicolojial American. El ia publica sua obra mestral, "Prinsipes de condui", en 1943. En 1948, el ia sufri de un ataca de cor major. El ia pote completa un libro du, "Un sistem de condui", en la mesma anio. El ia mori de un ataca de cor du a 10 maio 1952.

La teoria de Hull es marcada par defini par restrinje seria de variables como prosedes esperimental, e par un descrive multe matematical. Asi es la variables cual Hull ia regarda cuando condisiona sua ratas:

Variables nondependente:

• S, la stimula fisical.
• Dura e priva, o la dura e intensia de stimulas dolente.
• G, la grandia e cualia de la reforti.
• La retarda de tempo entre la responde e la reforti.
• La tempo entre la stimulas condisionada e noncondisionada.
• N, la cuantia de atentas,
• La tempo en cuando la rata ia es ativa.

La variables interveninte:

• s, la trasa de la stimula.
• V, la dinamica de intensia de la stimula.
• D, la forsa o motiva o nesesa xef (dependente sur priva, etc).
• K, la grado de motiva de la reforti (dependente de la cuantia o cualia de reforti)
• J, la motiva fundida sur la retarda de reforti.
• sHr, la fortia de la abitua, fundida sur N, G (o K), j, e tempo entre stimulas condisionada e noncondisionada.
• Ir, inibi reatante (pe fatiga resultante de la ativia de la rata a ante).
• sIr, la inibi condisionada (la resulta de otra condisiona)
• sLr, la limina de reata (la nivel de reforti nesesada per cualce aprende).
• sOr, la osila de condui a la momento - pe variables acaso no incluida su otras.

La variable interveninte xef, sEr, nomida potensia de stimula, cual es la resulta de tota la variables a supra:

• sEr = V x D x K x J x sHr - sIr - Ir - sOr - sLr.

La variables dependente:

• Rapidia de la responde.
• Fortia de la responde.
• Resiste a estingui.
• Frecuentia (la probablia de la responde).

Tota de estas es mesuras de R, la responde, cual es un funsiona de sEr.

La esense de la teoria pote es resomada par dise ce la responde es un funsiona de la fortia de la abitua multipliada par la fortia de la motiva.

Hull ia es la conduiste la plu influente en la desenios de 1940 e 1950. Sua studiante, Kenneth W. Spence, ia manteni acel popularia tra multe de la desenio de 1960. Ma la teoria, asetable en sua forma cortida, ia es tro masosa en la opina de otra conduistes, e no pote es fasil jeneralida de esperimentas multe controlada sur ratas a la complicas de vive umana. Lo es no plu ca un nota istorial.

E. C. Tolman

Tolman

Un teoria multe diferente ia ave alga popularia ante conduisme ia sede la sena de esperimental a la cognisialiste: La conduisme cognisial de Edward Chase Tolman.

Edward ia nase 14 april 1886 en Newton, Massachusetts. Sua padre ia es un comersior, sua madre un fem de casa e zelosa cuecer. Edward e sua frate plu vea ia vade a MIT (la instituida de tecnolojia de Massachusetts). Sua frate ta deveni un fisiciste famosa.

Tolman ia es influeda par leje la obras de William James, e alora ia vade a Harvard en 1911. Cuando ala, el ia spende un estate en Deutxland studiante con Kurt Koffka, la psicolojiste de gestalt. El reseta sua diploma dotoral en 1915.

El ia vade seguente per instrui a Universia Northwestern. Ma el ia es un ensenior timida, e un pasiste en la Gera Mundal 1, e la universia ia desemplea el en 1918. El ia comensa ensenia a la Universia de California a Berkeley. El ia ance servi en la OSS (ofisia de servis stratejial) per du anios en la Gera Mundal 2.

La Universia de California ia esije sur jura de fida a la nasion de profesores ala, un esije inspirada par Joe McCarthy e la "panica roja" - teme per comunistes. Tolman ia condui protestas e ia es pronto desempleada. En 1959, el ia jubila, e ia reseta un diploma dotoral onoral de la mesma universia! Triste, el ia mor la mesma anio, a 19 novembre.

An si el ia gusta la proposa de conduistes per crea un psicolojia como un siensa vera ojetal, el ia senti ce Watson e otras ia deveni tro estrema:

1. La conduisme de Watson ia es un studia de "spasmas" - la model de stimula-responde es tro minima. On debe studia conduis integra e sinifiante.

2. Watson ia vide sola causa e efeto simple en sua animales. Tolman ia vide condui intendente, dirijeda a goles.

3. Watson ia regarda sua animales como macinas stupida. Tolman ia vide los como creante e probante ipoteses fundida sur esperia presedente.

4. Watson no ia ave un usa per prosedes internal o "mentaliste". Tolman ia demostrada ce sua ratas ia es capas de un varia de prosedes cognisial.

Un animal, en la prosede de esplora sua ambiente, developa un mapa cognisial de la ambiente. Esta prosede es nomida aprende ascondeda, pd aprende en la asentia de recompensas o punis. La animal developa espetas (ipoteses) cual es suportada o no par plu esperia. Recompensas (o punis) deveni sinifiante cuando los es motivantes per un condui ia aprendeda, no como causas de aprende mesma.

El mesma ia reconose ce sua conduisme ia es plu como psicolojia gestalt ca como la conduisme de Watson. De nosa perspetiva oji, el pote es videda como un de la asendentes de teoristes como Gardner Murphy.

B. F. Skinner

Skinner

Burrhus Frederic Skinner ia nase 20 marto 1904 en la vila peti de Susquehanna, en Pennsylvania. Sua padre ia es un avocato, e sua madre un fem de casa forte e intelijente. Sua eleva ia es tradisional e laborosa.

Burrhus ia es un xico ativa e sosial, ci ia ama natur e construi cosas, e joia scola. Sua vive no ia es sin trajedia: sua frate ia mori con 16 anios de un aneurisme serebral.

Burrhus ia reseta sua diploma luaral de la Universia a Hamilton en New York norde. El no ia ajusta bon ala, e no joia selebras de sua frateria o la juas de futbal. El ia scrive per la jornal de la scola, incluinte articles cual critica la scola, la profesores, e an Phi Beta Kappa (un sosia de onora). Plu, el ia es un ateiste, en un scola cual esije atende a la eglesa dial.

El ia intende deveni un scrivor e ia atenta lo, enviante poesias e naras corta a publicores. Cuando el ia gradua, el ia construi un studio en la suteto de la casa de sua jenitores per foca sur sua scrive, ma lo no ia aida.

Ultima, el ia resinia se per scrive articles per la jornal dial sur problemes de la sindicatos local, e ia trova un abitada en Greenwich Village en New York City como un "boemian" o bitnic. Pos alga viaja, el ia deside reveni a scola, esta ves a Harvard. El ia reseta sua diploma mestral en psicolojia en 1930, e sua diploma dotoral en 1931, e ia resta ala per continua sua rexerca asta 1936.

Ance en acel anio, el ia move a Minneapolis per instrui a la Universia de Minnesota. Ala, el ia encontra e sposi Yvonne Blue. Los ia ave du fias, fia du de ci ia deveni la enfante prima ce ia es elevada en un de la inventas de Skinner, la "leteta airal". An si lo no ia es plu ca un combina de un leteta e ensirca con lados de vitro e frescador, lo pare tro plu como reteni un bebe en un acueria per deveni popular.

En 1945, el ia deveni la xef de la departe de psicolojia a la Universia de Indiana. En 1948, el ia es invitada per veni a Harvard do el ia continua asta sua mori. El ia es un om multe ativa, con rexerca e la gida de sentos de aspirores dotoral, e scrive de multe libros. An si el no ia deveni susedosa scrivente naras e poesias, el ia deveni un scrivor de psicolojia susedosa, incluinte la libro "Walden 2", un reporta imajinal de un comunia cual opera par prinsipes conduiste.

18 agosto 1990, B. F. Skinner ia mori de leucemia pos deveni posible la psicolojiste la plu famosa pos Freud.

Teoria

La tota sistem de Skinner es fundida sur condisiona operante. La organisme es en la prosede de "opera" sur la ambiente, cual en parolas plu comun sinifia ce la animal (o person) es bondinte en sua caje (o vila), fante cual lo (o el) fa normal. En esta opera, la organisme encontra un stimula spesial nomida un stimula refortinte o, plu simple, un reforti. Esta stimula spesial ave la efeto de cresente la opera, pd la condui aveninte apena ante la reforti. Esta es condisiona operante: "La condui es segueda par un efeto, e la natur de la efeto altera la tende per repete la condui en la futur".

Imajina un rata en un caje. Esta es un caje spesial (nomida un "caxa de Skinner") cual ave un bara o pedal a un mur cual, cuando presada, causa un macina peti per relasa un gran de comeda. La rata es bondinte en sua caje, fante lo cual ratas fa, cuando el, para acaso, presa la bara e - ta-da! - un gran de comeda cade en la caje! La operante es la condui apena ante la reforti, cual es la gran de comeda, natural. En alga repetes, la rata es pedalinte furiosa a la bara, cumulante sua monton de granes en un angulo de la caje.

Un condui segueda par un stimula refortinte resulta en un crese en la probablia ce la condui aveni en la futur.

Cual aveni si on no dona plu granes a la rata? Lo pare ce la rata no es un fol, e pos alga atentas futil, el para sua condui de presa la bara. Esta es nomida la estingui de la condui operante.

Un condui no plu segueda par un stimula refortinte resulta en un descrese de la probablia ce la condui aveninte en la futur.

Alora, si tu engrana denova la macina de granes de comeda, afin la presa de la bara furni denova la granes a la rata, la condui de presa de la bara ta reveni como majia, multe plu rapida ca la tempo nesesada per la rata aprende la condui la ves prima. Esta es car la reveni de la reforti aveni en la contesto de un istoria de reforti cual estende tota via ante a la ves prima cuando la rata ia es refortida per presa la bara.

Skinner gusta relata como el ia "acaso" (pd operante) ia ariva a sua descovres variosa. Per esemplo, el parla sur cuando el ia no ave sufisinte granes de comeda en la media de un prosede. En acel tempo, lo no ave ja spesial comedas per ratas como nos ave oji, e donce, Skinner ia debe fabrica la granes par se mesma, cual ia es un taxe iritante. En esta ves, el is deside redui la cuantia de refortis ce el ia usa per cualce condui el ia atenta condisiona, e el ia es surprendeda ce la ratas continua sua conduis condisionada, e a un frecuentia stable! Esta es la modo en cual Skinner ia descovre la ajendas de reforti.

Ajendas de reforti

La prosede orijinal es nomida reforti continuante: cada ves la rata presenta la condui (pe presa la bara), el reseta un regala.

1. La ajenda de la proportio fisada ia es la prima ce el ia descovre: si la rata presa la bara, pe, tre veses, el reseta un regala. O sinco veses, dudes veses, o "x" veses. On ave un proportio fisada entre la conduis e la refortis.

2. La interval fisada usa un aparato de cronometri de alga tipo. Si la rata presa la bara a min un ves entre un estende fisada de tempo (pe 20 secondos), el reseta un regala. Si el fali, el no reseta un regala. Ma an si el presa la bara 100 veses en acel 20 secondos, el reseta sola un regala. Un cosa strana aveni apare es ce la ratas tende cambia sua rapidia de responde: los lenti la frecuentia direta pos la reforti, e aselera cuando la tempo per un reforti deveni plu prosima.

Skinner ia ance regarda proportios variante. Proportio variante sinifia ce on cambia la "x" con cada responde - a prima, pe, lo debe presa 3 veses per reseta un regala, alora 10, alora 1, alora 7, etc. La interval variante sinifia ce tu cambia la longia de la interval - prima 20 secondos, pe, alora 5, alora 35, alora 10, etc.

En ambos formas de la proportios variante, la ratas tende atende plu. Con la ajenda de la interval variante, los no plu reposa entre un estende de tempo, car los no pote developa un "ritmo" entre condui e reforti. Plu importante, esta ajendas es multe resistente a estingui. Esta es razonable, car lo es sempre posible ce sola un plu presa pote sempre es sufisinte per produi la reforti, e si lo no aveni, sola un plu presa, etc.

Esta, seguente Skinner, es la macina de juas de aposta: tu no ta pote gania a cada ves, ma tu ta conose nunca esce on ta gania ancora. Lo pote es la ves seguente, e si tu no aposta aora, tu pote perde la gania de la sentenio!

Formi

Un demanda a cual Skinner ia debe responde comun ia es como nos pote developa tipos plu complicada de conduis. El responde par introdui la idea de formi, o "la metodo de aprosimas seguente". Fundal, esta envolve prima reforti un condui sola neblosa simil a lo desirada. Cuando esta es condisionada, on debe espeta per varia cual es plu prosima a lo cual on desira, e alora continua en esta modo. Skinner e sua studiante ia es multe susedosa en instrui animales simple per fa atas estracomun, per esemplo condisiona pijones per aprende boling.

Ultra esta esemplos simple, formi ance esplica la conduis multe complicada. On no deveni un sirurjiste de serebros par tropeza en un sala de operas, talia la testo de algun, susede estrae un tumor de sua serebro, e final es refortida con prestijia e un bon salario, en la modo de un rata en un caxa de Skinner. En loca, tu es formida jentil par sua ambiente, incluinte familia, amis, colaborores, etc, per gusta alga ativias, susede en scola, esperia alga clases en biolojia, vide presentas de dotores a la televide, ave un bon esperia a un ospital, entre universia per studia medica, es corajida per move a sirurjia de la serebros como un spesiali, etc. Esta pote es alga cosa cual tua familia atenta, simil a un rata en un caje, ma lo es multe plu probable ce esta ia es alga cosa multe plu nonintendeda.

Stimulas negativa

Un stimula negativa es la oposada de un stimula reforti, alga cosa cual on pote esperia como nonplasente o dolosa. Un condui segueda par un stimula negativa resulta en un descrese de la probablia de acel condui aveninte en la futur.

Esta defini un stimula negativa e descrive la forma de condisiona conoseda como puni. Si on xoca un rata per condui x, el fa min la condui x. Si tu colpa Jani per lansa sua juetas a sua sore, el va lansa sua juetas min (cisa).

Si on sutrae un stimula negativa pos un rata o Jani presenta un condui spesifada, on es usante reforti negativa. Si on para xoca la pedes de un rata cuando el sta sur sua pedes anterior, el va sta plu. Si tu para tua tormenta de me cuando me trae la dejetas a via, esta ata va es plu probable (cisa). On pote dise ce lo senti tan bon cuando la stimula negativa para ce esta servi como un reforti: Un condui segueda par la sutrae de un stimula negativa resulta en un crese de la probablia ce acel condui aveni en la futur.

Nota como difisil ce lo pote es per distingui alga formas de reforti negativa de reforti positiva: si me causa ce tu fami, esce la comeda cual me dona a tu cuando tu fa cual me vole, es positiva, pd un reforti? O esce esta un esemplo de reforti negativa, pd la sutrae de la stimula negativa de fama?

Skinner (contra alga stereotipos de conduistes) no suporta la usa de stimulas negativa. Ma no car los dole sua sentis de moralia, ma car los no opera multe bon. Nota como ce Jani va para lansa sua juetas a sua sore - cisa? Esta es car lo cual ia reforti la conduis mal no ia es sutraeda, como en estingui. Esta reforti es sola "ascondeda" par un stimula negativa cual desacordante. Donce, serta, a veses la enfante va condui se plu bon, ma lo senti bon alora per lansa acel juetas. Si Jani pote restrinje se asta sua jenitores sorti de la sala, o si el pote trova un modo per evade la puni, e el va continua sua lansa de juetas. Plu, car Jani aora sola pote joia sua reforti (la joia de lansa juetas) a veses, el es alora en un ajenda de reforti variante, e el va es an plu resistente a estingui ca sempre!

Altera de condui

Altera de condui (en engles: behavior modification, o "B-mod") es la tecnica de terapia fundida sur la obras de Skinner. Lo es multe direta: Estingui la conduis no desirable (par sutrae la reforti) e repone lo con un condui desirable par reforti. Lo ia es usada per multe tipos de problemes psicolojial - abituas a drogas, neuroses, timidia, autisme, e an scizofrenia - e lo opera spesial bon con enfantes. On ave esemplos de psicosicas ci no ia comunica con otra per anios ci ia es condisionada per condui se en modos desirable e cuasi normal, como come con un cotel e force, cura per sua propre nesesas de ijenia, vesti se mesma, etc.

On ave un developa de esta nomida la economia de fixes. Esta es usada xef en instituis como ospitales de psiciatria, casas per jovenes problemosa, e prisones. Regulas es clar indicada en la institui, e si on condui se en un modo desirable, on es recompensada con un fix (biletas, fixes de pocer, mone falsa, etc). Alga conduis videda como no desirable es comun seguente par un sutrae de esta fixes. La fixes pote es intercambiada per cosas desirada, como confetos, sigaretas, filmas, periodos estra la institui, etc. Esta ia es usada con bon efeto en manteni ordina en esta instituis frecuente difisil per maneja.

On ave un problem con la economia de fixes: cuando un membro de un de esta instituis parti, el reveni a un ambiente cual reforti la tipos de condui cual ia causa ce los es enviada a la instituis a la comensa. La familia de la psicosica pote es multe malfunsionante. La ofendor joven pote vade denova a la visinia do nun dona fixes a el per come cortes. La sola refortis es posible la atende desirada per mal condui, o alga gloria en la gang per fura un boteca. En otra parolas, la ambiente no viaja bon.

Walden 2

Skinner ia comensa sua carera studiante leteratur engles, scrivente poesias e naras. Serta, el ia scrive un cuantia grande de paperes e libros sur conduisme. Ma el es probable recordada xef per la lejor tipal per "Walden 2", en cual el descrive un comunia utopin cual usa sua prinsipes.

Alga persones, spesial la relijiosa, critica la libro forte. Los ia dise ce sua ideas sutrae nosa libria e dinia como umanas. El ia responde a esta mar de criticas con un otra libra (ance un de sua scrives plu bon) nomida "Ultra libria e dinia". El ia demanda: Cual nos intende cuando nos dise ce nos vole es libre? Tipal, nos intende ce nos no desira es un parte de un sosia cual puni nos per fa cual nos vole fa. Oce - stimulas negativa no opera bon en cualce caso, donce a via con los! En loca, nos ta usa sola refortis per "controla" sosia. E si nos eleje la refortis coreta, tota de nos ta senti libre, car nos ta es fa cual nos senti nos desira fa.

La mesma per dinia. Cuando nos dise "el ia mori con dinia", cual es nosa intende? Nos intende ce el ia continua mostra sua condui bon an sin cualce clar motivas estra un desira per condui se bon. En fato, el ia reteni sua dinia car sua istoria de reforti ia condui el per vide condui se en acel modo "diniosa" como plu reforti ca causa problemes per otras.

La mal cual nos fa es causada par la fato ce la mal es refortida. La bon cual nos fa es car la bon es refortida. En nosa sosia presente, nosa refortis per condui bon e mal es caososa e estra nosa controla - lo es un caso de ave fortuna bon o mal con nosa "eleje" de jenitores, instruores, amis, o otra influes. En loca, nos debe prende controla, como un sosia, e desinia nosa cultur en un modo en cual la bon es compensada e la mal es estinguida. Con la tecnicas coreta, con pote desinia nosa cultur.

Libria e dinia es esemplos de cual Skinner nomi construis mentaliste - no oservable e donce no usosa per un psicolojia siensal. Otra esemplos inclui modos de defende, la suconsensa, arcetipos, finalisme final, stratejias per ajusta, autoreali, consensa, an cosas como fama e side. La esemplo la plu importante es cual el nomi la homunculus - latina per "om peti" - cual nos suposa esiste en nos e es usada per esplica nosa condui, ideas como la spirito, la mente, la vole, la ego, la se-mesma, e natural personalia.

En loca, Skinner sujeste ce psicolojistes foca sur oservables, cual es per dise, la ambiente e nosa condui en la ambiente.

Skinner ia joia popularia grande en la desenio de 1960 e plu. Ma ambos la promove umaniste en la campo de terapia, e la promove cognisial en la campo de esperimentas, ia comensa rapida per combate sua conduisme. Ante sua mori, el ia lamenta ce la mundo ia fali aprende de sua ideas.